• 2019માં ઉજ્જ્વલા કનેક્શન માટે અરજી કરનારને તેઓની અરજી રિજેક્ટ થઈ હોવાનું કહ્યું હતું.
• લાભાર્થીઓને જાણ થતાં પહોંચ્યા વડું પોલીસ સ્ટેશન,ફરિયાદ આપતા પોલીસે તપાસ આરંભી

પ્રધાનમંત્રી ઉજ્જવલા યોજના અંતર્ગત દેશભરમાં ગરીબ પરિવારોને ચૂલા માંથી મુક્તિ અપાવવા માટે મફત ગેસ કનેક્શન આપવામાં આવ્યા હતા. જ્યાં અનેક પરિવારોએ સરકારની આ ગેસ કનેક્શન સુવિધાનો લાભ પણ લીધો હતો. ઉજ્જવલા યોજના અંતર્ગત મળતા ગેસ કનેક્શનમાં સીલીન્ડર રીફીલ કરાવવા માટે પણ સબસીડી આપવામાં આવતી હતી. જોકે વર્ષ 2020 પછી આ સબસીડી સરકાર દ્વારા બંધ કરી દેવામાં આવી છે.

પાદરા તાલુકાના વડુ ગામે વર્ષ 2019માં સ્થાનિક ગેસ એજન્સી દ્વારા ગરીબ લાભાર્થીઓને ઉજ્જવલા યોજના અંતર્ગત કનેક્શન આપવામાં આવ્યા હતા. જેમાંથી કેટલાક લાભાર્થીઓએ અરજી કરી હોવા છતાંય તેઓના ફોર્મ રદ્દ થયા છે તેમ કહીને કનેક્શન આપવામાં આવ્યું ન હતું. જયારે હવે લાભાર્થીઓને જાણ થઇ છે કે, ઉજ્જવલા યોજના અંતર્ગત કનેકશનો તેઓના નામે ફાળવીને અન્ય કોઈને પધરાવી દેવામાં આવ્યા છે.

સમગ્ર ઘટનામાં લાભાર્થીઓએ ભેગા થઈને મોભા ગામે આવેલી ગેસ એજન્સી સામે વડું પોલીસ મથકે છેતરપીંડીની ફરિયાદ આપી છે. એજન્સીમાં કામ કરતા કર્મચારી કે તેઓના મળતિયાઓ દ્વારા લાભાર્થીઓને મળવા પાત્ર ગેસ કનેક્શન બરોબાર ઈશ્યુ કરીને અન્ય કોઈને આપી દીધા હોવાની ફરિયાદ આપી છે. જયારે પોલીસે સમગ્ર મામલે તપાસ શરુ કરી છે.

આણંદ જિલ્લાના બાલુપુરા ગામના એક યુવકને ગામની એક યુવતી સાથે આંખો મળી જતા પ્રેમ સંબંધ બંધાયો હતો અને એક વર્ષથી બંને એકબીજા ના પ્રેમમાં હતા જોકે યુવતીના પરિવારે યુવતીના લગ્ન તેના પ્રેમી સાથે કરવાની ના પાડતા પ્રેમી યુવકે ગત તા. 7 ફેબ્રુઆરીના રોજ પાદરા તાલુકાના મુજપુર ગામના ગંભીરા બ્રિજ પરથી મહીસાગર નદીમાં ઝંપલાવ્યું હતું. તેનો મૃતદેહ બે દિવસ પછી આજે મળી આવ્યો છે.

આ અંગે પ્રાપ્ત માહિતી અનુસાર આણંદ જિલ્લાના બાલુપુરા ગામના જુના રસ્તા ભાથુજી મંદિર પાસે રહેતા ઉમેશભાઈ ઠાકોરનો 21 વર્ષનો દીકરો મિતેશ ગામની એક યુવતી સાથે એક વર્ષથી પ્રેમ સંબંધ ધરાવતો હતો. એક વર્ષના પ્રેમમાં પાગલ બંનેલ પ્રેમી યુગલ વારંવાર મળતા મિતેશે તેની સાથે લગ્ન કરવાનો નિર્ણય કર્યો હતો. તેથી યુવતીના પરિવારને જઇને મળ્યો હતો. આ યુવતીના પરિવારે યુવતીના લગ્ન તેની સાથે કરવાની ના પાડી હતી તેથી મિતેશને લાગી આવ્યું હતું અને ગત સાતમી તારીખે ઘરેથી કહ્યા વગર નીકળી ગયો હતો. મિતેશ પાદરા તાલુકાના મુજપુર ગામના ગંભીરા બ્રિજ પર પહોંચ્યો હતો. અને પ્રેમિકા વગર જીવી નહી શકાય તેમ માની મહીસાગર નદીમાં ઝંપલાવ્યું હતું. મિતેશ ઘરે નહિ આવતા તેના પરિવારજનો એ શોધખોળ શરુ કરી હતી. દરમિયાન મિતેશનો મૃતદેહ બે દિવસ પછી મળી આવ્યો હતો. પાદરા પોલીસે સમગ્ર મામલે વધુ તપાસ હાથ ધરી છે

વડોદરા જિલ્લાના પાદરા ખાતે આવેલ ચોક્સી બજારમાં એક ચોક્સીની દુકાનમાં ગ્રાહક બની બ્રેસલેટ અને નાકમાં પહેરવાની કડીની ખરીદી કરવા આવેલ બે બુરખાધારી મહિલાઓએ દુકાનદારને વાતો માં ભેળવી તેની નજર ચૂકવી હાથ ચાલાકી કરી એક બ્રેસલેટ અને નાકમાં પહેરવાની કડીની ચોરી કરી ફરાર થઇ જતા દુકાનદારને શંકા ઉપજતા દુકાનદારે બને બુરખાધારી મહિલાઓનો પીછો કરી એક મહિલાને ઝડપી પાડી પોલીસ હવાલે કરી હતી.

આ અંગે પ્રાપ્ત માહિતી અનુસાર વડોદરા જિલ્લાના પાદરા તાલુકામાં આવેલ ચોક્સી બજારમાં સીલપનભાઇ ગીરીશભાઇ ચોક્સી સોના-ચાંદીના દાગીનાની ચોક્સી પ્રવિણલાલ ચીમનલાલ નામની દુકાન ધરાવે છે ગતરોજ બપોરના સમયે સીલપનભાઇ ચોક્સી દુકાનમાં એકલા હતા. તે દરમિયાન બે બુરખાધારી મહિલાઓ ગ્રાહક તરીકે દુકાનમાં આવી હતી અને
બ્રેસલેટ અને નાકમાં પહેરવાની કડીની ખરીદી કરવી છે તેમ જણાવતા દુકાન માલિક સીલપનભાઇએ અલગ અલગ ડિઝાઇન ના સોનાના બ્રેસલેટ અને નાકમાં પહેરવાની કડીઓ ટ્રેમાં ગોઠવીને મહિલાઓની સામે મૂક્યા હતા


દરમિયાન એક બુરખાધારી મહિલાએ દુકાનદાર સીલપનભાઇને વાતોમાં પેરવી દેતા અન્ય બુરખાધારી મહિલાએ સીલપનભાઇની નજર ચૂકવી ટ્રેમાં ગોઠવેલ રૂપિયા 65 હજારની કિંમતનું 1 ગ્રામ વજનનું બ્રેસલેટ પોતાના હાથમાં પહેરી લીધું હતું જયારે બીજી મહિલાએ નાકમાં પહેરવાની રૂપિયા 2 હજારની કિંમતની 200 મીલીગ્રામની કડી પોતાના પર્સમાં મૂકી મહિલાઓએ દુકાનદાર સીલપનભાઇને બ્રેસલેટ અને કડીઓ અમને પસંદ નથી તેમ કહી બંને મહિલાઓ કુલ્લે રૂપિયા 67 હજારનો મુદ્દામાલ ચોરી કરી ફરાર થઇ ગઇ હતી. આ સમગ્ર ઘટના દુકાન સ્થિત લાગેલા સીસીટીવી માં કેદ થઇ ગઈ હતી

બુરખાધારી મહિલાઓ દુકાનમાંથી હાથફેરો કરી નીકળ્યા બાદ દુકાનદાર સિલપનભાઇ ચોક્સીની નજર ટ્રેમાં મુકેલ બ્રેસલેટ અને નાકની જડ પર પડતા દાગીના ઓછા હોવાનું જણાઈ આવતા સિલપનભાઇ ચોક્સી તરત પોતાની મોટરસાયકલ લઇ બજારમાં બુરખાધારી મહિલાઓનો શોધવા નીકળ્યા હતા પરંતુ મહિલાઓએ બુરખા કાઢી નાંખ્યા હોય મહિલાઓને ઓળખવી મુશ્કેલ થઇ ગઇ હતી. પરંતુ કાળો ડ્રેસ પહેરેલ એક મહિલા પર સીલપનભાઇને શંકા જતા તેને ઝડપી તેની તપાસ કરતા બ્રેસલેટ તેની પાસે થી મળી આવતા મહિલાને પોલીસ હવાલે કરી હતી. પાદરા પોલીસે બંને મહિલાઓ સામે ગુનો દાખલ કરી બીજી મહિલાની શોધખોળ હાથ ધરી છે.