વડોદરા જિલ્લાના પાદરા તાલુકાના ગામેઠા ગામમાં રહેતા દલિત સમાજના ઉંમરના કારણે અવસાન પામેલા 65 વર્ષિય વૃધ્ધના ગામના એક માત્ર સ્મશાનમાં સવર્ણોએ અંતિમ સંસ્કાર કરવા ન દેતા ભારે વિવાદ સર્જાયો છે. કલાકો સુધી મૃતદેહ પડી રહ્યા બાદ મોડી સાંજે સ્મશાનથી દૂર અંતિમ સંસ્કાર કરવાની દલિતોને ફરજ પડી હતી. આ ઘટનાને પગલે દલિત સમાજમાં ભારે રોષ ભભૂકી ઉઠ્યો છે. સમાજના લોકો આજે વડુ ખાતે પહોંચ્યા હતા અને અંતિમ સંસ્કાર અટકાવનાર 13 લોકો સામે વડુ પોલીસ મથકમાં ફરિયાદ નોંધાવી હતી.

મળેલી માહિતી પ્રમાણે પાદરા તાલુકાના ગામેઠા ગામમાં આવેલા દલિતવાસમાં રહેતા 65 વર્ષિય કંચનભાઇ વણકરનું ઉંમરના કારણે બુધવારે અવસાન થયું હતું. પરિવારજનોના રોકકડ વચ્ચે અંતિમ યાત્રા કાઢવામાં આવી હતી. અંતિમ યાત્રામાં મોટી સંખ્યામાં ફળિયાના અને સમાજના લોકો જોડાયા હતા. અંતિમ યાત્રા ગામના એક માત્ર સ્મશાનમાં પહોંચ્યા બાદ ડાઘુઓ દ્વારા અંતિમ સંસ્કારની તૈયારી કરવામાં આવી રહી હતી. તે સમયે ગામના સવર્ણો પહોંચી જઇ અંતિમ સંસ્કાર અટકાવી દેતા ભારે હોબાળો મચ્યો હતો.

અંતિમ સંસ્કાર અટકાવી દેતા દલિત સમાજ અને સવર્ણો વચ્ચે ભારે વિવાદ સર્જાયો હતો. સવારે અવસાન પામેલા કંચનભાઇના મૃતદેહના મોડી સાંજ સુધી અંતિમ સંસ્કાર થયા ન હતા. વિવાદ સર્જાતા વડુ પોલીસ સ્મશાનમાં પહોંચી ગઇ હતી. અને મામલો થાળે પાડવાનો પ્રયાસ કર્યો હતો. આખરે મૃતક કંચનભાઇના અંતિમ સંસ્કાર ગામના સ્મશાનથી દૂર ખૂલ્લી જગ્યામાં દલિત સમાજને ફરજ પડી હતી.

જોકે,ગામેઠા ગામમાં બુધવારે દલિત સમાજ સાથે થયેલા જાતીવાદના કૃત્યના દલિત સમાજમાં ભારે રોષ ભભૂકી ઉઠ્યો હતો. આજે પાદરા તાલુકા તેમજ વડોદરા દલિત સમાજના અગ્રણીઓ ભરતભાઇ સહિતના લોકો વડુ પોલીસ મથકે પહોંચી ગયા હતા. અને ગામના સ્મશાનમાં દલિત સમાજના વ્યકિતના અંતિમ સંસ્કાર થવા ન દેનાર ગામના નગીનભાઇ પટેલ સહિત 13 સામે ફરિયાદ નોંધાવી હતી.

દલિત સમાજના અગ્રણીએ આક્ષેપ કરતા જણાવ્યું હતું કે, અમારા દલિત સમાજના વ્યક્તિનું મોત નીપજતા ગામના સવર્ણોએ ગામના સ્મશાનમાં અંતિમ સંસ્કાર થવા દીધા નથી. જાતી વિરૂધ્ધ અપશબ્દો બોલી ધમકી આપવામાં આવી છે. અમે દલિત સમાજને રક્ષણ આપવાની માંગણી કરી છે. અને અંતિમ સંસ્કાર કરવા ન દેનારાઓ વિરૂધ્ધ વડુ પોલીસ મથકમાં ફરિયાદ નોંધાવી છે,

વડુ પોલીસ મથકના પી.આઇ. વી.એમ. ટાંકે જણાવ્યું હતું કે, ગામેઠા ગામના દલિત સમાજના વૃધ્ધનું અવસાન થયું હતું. ગામ લોકોએ તેઓના અંતિમ સંસ્કાર ગામના સ્મશાનમાં થવા દીધા ન હતા. આજે દલિત સમાજના લોકોએ વડુ પોલીસ મથકમાં ગામેઠા ગામના સરપંચના પતિ નગીનભાઇ પટેલ સહિત 13 લોકો સામે ફરિયાદ નોંધાવી છે. પોલીસે ગુનો દાખલ કરી કાર્યવાહી હાથ ધરી છે.

ભરૂચમાં નર્મદા મૈયા બ્રિજ નીચે તાજેતરમાં જ નર્મદા નદીમાં યુવાનોની કાર ડૂબી હોવાનો વિડીયો સામે આવ્યો હતો અને સ્થાનિકો, માછીમારો અને તરવૈયાઓએ ભારે જહેમતે બાદ નદીમાંથી માંડ માંડ કાર બહાર કાઢી હતી ત્યારે આવીજ બીજી ઘટના શ્રાવણ માસ નો આરંભ થતાં જંબુસરના દરિયા કાંઠેથી સામે આવેલ કાવી- કંબોઈ સ્થિત સ્તંભેશ્વર તીર્થ સ્થાનેભક્તોનું ઘોડાપૂર ઉમટી પડ્યું હતું ત્યારે એક દર્શનાર્થી કાર દરિયામાં તણાઈ ગઈ હતી.

પવિત્ર શ્રાવણ માસ નો પ્રારંભ થતાં દક્ષિણ ગુજરાતના મીની સોમનાથ એવા સ્તંભેશ્વર તીર્થ સ્થાને સોમવતી અમાસે ભક્તોનું ઘોડાપૂર ઉમટી પડ્યું હતું અને સ્તંભેશ્વર તીર્થ સ્થાને આવેલ દર્શનાર્થી મધ્યપ્રદેશ પાસિંગની કાર દરિયા કિનારે પાર્ક કરી દર્શન કરવા ગયા હતા.

સોમવતી અમાસે સ્તંભેશ્વર તીર્થ સ્થાને દર્શન કરી સાંજે પરત આવતા દર્શનાર્થીએ કિનારે મુકેલી કાર અમાસની ભરતીના લીધે પાણીમાં તણાઈ ગઈ હતી અને કારને બહાર કાઢવા ભારે જેહમત કરી પરંતુ કાર બહાર ના નીકળતા સ્થાનિકો તેમજ અન્ય દર્શનાર્થીઓ સહીત પોલીસ દરિયામાં ડૂબતી કારને બહાર કાઢવા મદદે આવી હતી અને કારને દોરડા થી બાંધી દોરડાનો એક છેડો એક ટેમ્પા માં બાંધી ટેમ્પા સહીત 20 થી 25 લોકોએ કલાકો સુધી કારને પાણીમાંથી બહાર કાઢવા દોરડું ખેંચ્યું અને આખરે મહેનત રંગ લાવી અને ભારે જેહમત બાદ કારને બહાર કાઢવામાં સફળતા મળી હતી

વડોદરા જિલ્લાના પાદરા જંબુસર હાઇવે પર આવેલ કુરાલ ગામ નજીક ગોકુલ હોટલ પર ચા પીવા ગયેલ 66 વર્ષીય આધેડનું ડમ્પરની અડફેટે મોત નીપજ્યું હતું ઘટના ની જાણ વડું પોલીસને થતા પોલીસ સ્ટાફ ઘટના સ્થળે દોડી આવ્યો હતો અને કાયદેસરની કાર્યવાહી હાથ ધરી હતી

પાદરા તાલુકાના સાંપલા ગામ ખાતે રહેતા 66 વર્ષીય ભીખાભાઈ મેલાભાઇ વસાવા વરસાદ પડતા પાદરા જંબુસર હાઈવે પર આવેલ ગોકુલ હોટલ ખાતે ચા પીવા ગયા હતા અને ચા પીને ભીખાભાઇ હોટલના ખુલ્લા મેદાનમાં લઘુશંકા કરવા ગયા હતા તે દરમિયાન ખુલ્લા મેદાન માં પાર્ક કરેલ ડમ્પર ચાલકે પાછળ જોયા વગર ડમ્પર રિવર્સ લેતા ડમ્પરની પાછળ લઘુશંકા કરતા ભીખાભાઇ ડમ્પર નીચે કચડાઈ જતા ઘટના સ્થળે જ તેમનું કમકમાટી ભર્યું મોત નીપજ્યું હતું

વડુ પોલીસે ઘટના સ્થળે પહોંચી ભીખાભાઇ ના મૃતદેહનો કબ્જો લઇ મૃતદેહ ને પીએમ અર્થે હોસ્પિટલ ખાતે ખસેડ્યો હતો અને ડમ્પર ચાલક વિરુદ્ધ ગુનો નોંધી અકસ્માત કરી ડમ્પર ઘટના સ્થળે છોડી ફરાર થઈ ગયેલ ડમ્પર ચાલક ની શોધખોળ ના ચક્રો ગતિમાન કરી કાયદેસરની કાર્યવાહી હાથ ધરી હતી