વડોદરા શહેર -જિલ્લામાં તસ્કરોનો આતંક દિન પ્રતિ દિન વધી રહ્યો છે. તસ્કરોમાં પોલીસનો કોઈ ખોફના રહ્યો હોય તેમ બેખોફ થઇ પોલીસને પડકાર ફેંકાતા રોજબરોજ અનેક ચોરીની વારદાતને અંજામ આપી પોલીસના પેટ્રોલિંગના ધજાગરા ઉડાવી રહ્યા છે. બેખોફ બનેલ તસ્કરો શિયાળાની ઋત્તુ શરૂ થતા જ સક્રિય બન્યા છે. અને શિનોર તાલુકામાં એક જ રાત્રીમાં ત્રણ મકાનના તાળા તોડી તસ્કરોએ રોકડ રકમ તેમજ સોના ચાંદીના દાગીનાની ચોરીની વારદાત ને અંજામ આપતા રહીશોમાં ભયનો માહોલ જોવા મળી રહ્યો છે.

શિનોર તાલુકામાં આવેલ શ્રીજી-1 તથા શ્રીજી-2 સોસાયટીમાં એક જ રાત્રીમાં ત્રણ મકાનના તાળા તોડી તસ્કરોએ રોકડ રકમ તેમજ સોના ચાંદીના દાગીનાની ઉઠાંતરી કરી હતી. તસ્કરો હાથ ફેરો કરતા બોડેલી ખાતે નર્મદા નિગમ સરદાર સરોવર માં જુનીયર કલાર્ક તરીકે નોકરી કરતા રતનભાઇ જેસંગભાઈ તડવીના ઘરમાંથી રૂપિયા 30 હજાર રોકડ રકમની ઉઠાંતરી કરી હતી. જયારે વતનમાં ગયેલ પ્રદિપભાઇ જગદિશપ્રસાદ શર્માના બંધ મકાનનું તાળું તોડી તસ્કરો ઘરમાં બીજા રૂમમાં મુકેલ લોખડની તિજોરીનું લોક તોડી તેમાં મુકેલ સોનાની ચુડી, સોનાની ચેઇન, સોનાની વીંટી તથા મંગળસુત્ર સહીત રૂ. 2.10 લાખની કિંમતનું 6 તોલા તથા રોકડા રૂપિયા 40 હજારની ચોરી કરી હતી. સાથે કુણાલભાઈ જગદિશચન્દ્ર ભટ્ટ તેમજ ઉદારામ જવારાજી સુથારના બંધ મકાનના દરવાજાનો નકુચો તોડી તસ્કરોએ સોનાના દાગીના, રોકડ રકમ સહીત કુલ 2.80 લાખ ની ચોરીની વારદાતને અંજામ આપી ફરાર થઇ ગયા હતા.

શિનોર પોલીસે અજાણ્યા ત્રણ તસ્કરો વિરુદ્ધ ગુનો નોંધી તેમને ઝડપી પાડવાના ચક્રો ગતિમાન કર્યા છે. તો બીજી તરફ શિયાળાની ઋતુ શરૂ થતાં તસ્કરો સક્રિય થઈ રહ્યા હોઈ શિનોર નગરની છેવાળાની સોસાયટી વિસ્તારમાં પોલીસ પેટ્રોલિંગ સઘન થાય તેમજ પોલીસ બંદોબસ્ત મુકવામાં આવે તેવી રહીશો દ્વારા માંગ ઉઠવા પામી છે.

શહેરમાં વિદેશી શરાબનો જથ્થો ઘુસાડવા બુટલેગરરો અવનવા કીમિયા અપનાવતા હોય છે. ત્યારે વડોદરાના અવાખલ ગામ પાસેથી ટ્રકમાં પશુ દાનની આડમાં ટ્રકમાં લઇ જવાતો વિદેશી શરાબનો રૂપિયા 30.33 લાખની કિંમતનો જથ્થો શિનોર પોલીસે ઝડપી પાડ્યો છે. પોલીસે ટ્રક ચાલક સહિત બેની ધરપકડ કરી 525 પેટી વિદેશી શરાબના જથ્થા સહીત પશુ દાન, ટ્રક મળી કુલ્લે રૂપિયા 46 લાખનો મુદ્દામાલ કબજે કરવા કરી કાર્યવાહી હાથ ધરી છે. જ્યારે ત્રણ આરોપીઓને વોન્ટેડ જાહેર કરી તેઓની શોધખોળ હાથ ધરી છે.

શિનોર પોલીસ મથકના પી.એસ.આઇ. એ.આર. મહિડાને બાતમી મળી હતી કે, એક ટ્રક જે સેગવા ચોકડીથી સાધલી પાસેથી પસાર થનાર છે. જેમાં મોટી માત્રા માં વિદેશી શરાબ નો જ્થ્થો ભરેલ છે. જે બાતમીના આધારે શિનોર પોલીસ મથકની અલગ-અલગ ટીમો બનાવી બાતમી આધારિત સ્થળ સેગવાથી સાધલી વચ્ચે વોચ ગોઠવી હતી. દરમિયાન અવાખલ તરફ જવાના રસ્તા ઉપર થી એક બાતમી આધારિત ટ્રક પસાર થતા પોલીસે તે ટ્ર્કને રોકી કોર્ડન કરી તપાસ કરતા પ્રાથમિક તબક્કે ટ્રકમાં પશુ દાન અને કુસ્કી ભરેલા કોથળા જણાઇ આવ્યા હતા.

જોકે પોલીસને શંકા જતા ટ્રકમાં વધુ તપાસ કરતા ટ્રકમાં પશુ દાનની આડમાં છુપાવવામાં આવેલ વિદેશી શરાબની 525 પેટી મળી આવી હતી. પોલીસે અમજેરા, જિ. ધાર, મધ્યપ્રદેશના રહેવાશી ટ્રક ચાલક સગીરખાન ઉર્ફ મુન્નો બાબુખાન પઠાણ અને બબલુ અમરતલાલ ભંડોર ની અટકાયત કરી ટ્રક ચાલકની પૂછપરછ કરતા તેણે આ વિદેશી શરાબનો જથ્થો જુનાગઢના કેશોદના અજાણી વ્યક્તિને આપવાનો હોવાની કબૂલાત કરી હતી પોલીસે ટ્રક ચાલક તેમજ ટ્રકમાંથી મળી આવેલ અન્ય ઈસમ સહીત વિદેશી શરાબનો જથ્થો મોકલનાર ઇન્દોર ના નૌશાદખાન શૌકતખાન ખાન તેમજ સેલવાસ ના લડ્ડુ અને દારુ મંગાવનાર જુનાગઢના કેશોદની અજાણી વ્યક્તિ સામે ગુનો દાખલ કર્યો હતો.

પોલીસે વિદેશી શરાબની પેટીઓ ટ્રક માંથી ખાલી કરી ગણતરી કરતા રૂપિયા 30, 33, 600ની કિંમતની 12,504 નંગ બોટલો મળી આવી હતી પોલીસે વિદેશી શરાબના જથ્થા સહીત ટ્રકમાંથી રૂપિયા 64,300ની કિંમતનું 173 બેગમાં ભરેલું પશુદાન અને કુસ્કી, તેમજ ટ્રક મળી કુલ્લે રૂપિયા 46,09,630 નો મુદ્દામાલ કબજે કરી. બે આરોપીની ધરપકડ કરી ત્રણ આરોપીઓને વોન્ટેડ જાહેર કર્યા હતા

સાયબર માફિયા ગેંગ બાદ હવે જિલ્લામાં ધરતીપુત્રો સાથે છેતરપિંડી આચરતી ઠગ ટોળકીઓ સક્રિય થઇ ગઇ છે ગુજરાત સરકારના ” ગુજરાત એગ્રો ઇન્ડસ્ટ્રીઝ કોર્પોરેશન” માંથી આવીએ છે તેમ જણાવી ઠગ ટોળકી દ્ધારા દરેક ગામમાં બે ખેડૂતોને ” શક્તિમાન રોટાવેટ ” મશીન 40 ટકા સબસિડી કાપીને આપવાનું આપવાનું જાણાવી ભેજાબાજોએ ચાર જેટલા ખેડૂતો સાથે રૂપિયા 33,200 ની છેતરપિંડી કરી આચરી હોવાની ફરિયાદ કરજણ પોલીસ મથકના ચોપડે નોંધાતા કરજણ પોલીસે તપાસ આરંભી છે

ભેજાબાજ ત્રિપુટીએ મશીન નોંધાવવા માટે રૂપિયા 9,600 ભરીને નોંધણી કરાવવાનું જણવ્યું હતું અને ત્યાર બાદ બાકીના રૂપિયા 40 ટકા સબસિડી કાપીને 6 હપ્તામાં ભરવાના રહેશે તેમ જણાવતા હું પણ ગામમાં સાત વિઘા જમીન ધરાવતો હોવાથી મને પણ શક્તિમાન રોટાવેટ ની જરૂરીયાત હોઇ, હું ભેજાબાજ ત્રિપુટીની જાળમાં ફસાઇ ગયો હતો અને ભેજાબાજ ત્રિપુટીએ આપેલ ચિરાગ ઉપાધ્યાય નામના ઇસમના મોબાઇલ નંબર ઉપર ગુગલ પે થી રૂ. 9600 જમા કરાવી દીધા હતા રકમ જમા થયા બાદ ભેજાબાજ ત્રિપુટીએ મને જણાવ્યું કે, ચાર દિવસમાં શક્તિમાન રોટાવેટ ” મશીનો લઇને તમને ડેમો બતાવવા માટે આવીશું અને બે દિવસમાં તમારા ઘરે આવીને મશીન આપી જઇશું અને ત્યાર બાદ ત્રિપુટી રવાના થઇ ગઇ હતી

કરજણ પોલીસે ખેડૂત મહેન્દ્રસિંહ અટોદરીયા ની ફરિયાદના આધારે ભેજાબાજ ત્રિપુટી વિરુદ્ધ ગુનો દાખલ કરી તપાસ હાથ ધરી છે સાથે ત્રિપુટી ભેજાબાજો નો ભોગ બનેલા અન્ય ખેડૂતોની પોલીસે અરજીઓ લઇ તપાસ શરૂ કરી છે ગુજરાત સરકારના ગુજરાત એગ્રો ઇન્ડસ્ટ્રીઝ કોર્પોરેશન ના નામે ખેડૂતો સાથે છેતરપિંડી આચરતી ત્રિપુટી ઝડપાયા બાદ મોટું કૌંભાડ બહાર આવવાની શક્યતાઓને નકારી શકાય તેમ નથી ભેજાબાજ ત્રિપુટીએ માલોદ ગામ સહીત અન્ય ગામોના ચાર ખેડૂતો પાસેથી મશીન આપવાની લાલચ આપી રૂપિયા 33,200 ની છેતરપિંડી આચરી હોવનું હાલ સામે આવ્યું છે અને આગામી દિવસો માં આ આકડો વધી શકે છે