વડોદરા: અટલાદરા ગામમાં મારામારીની ઘટના, બંને પક્ષોના 11 આરોપીઓ વિરુદ્ધ ગુનો નોંધી ધરપકડ

• પાર્કિંગ માટે રાડારાળ: મોટરસાયકલ પાર્કિંગ અને હોર્ન વગાડવા જેવી સામાન્ય બાબતે થયો લોહિયાળ જંગ.
• સામ-સામે હુમલો: પાઈપ અને ઈંટોનો ઉપયોગ થતા બંને પક્ષોના લોકોને ઈજા પહોંચી.
• 11 ની ધરપકડ: અટલાદરા પોલીસે બંને પક્ષના કુલ 11 આરોપીઓને ગણતરીના કલાકોમાં દબોચી લીધા.
• કડક પોલીસિંગ: અટલાદરા પોલીસ મથકે ગુનો નોંધી કાયદેસરની તપાસ શરૂ કરવામાં આવી છે.

વડોદરા: વડોદરા શહેરના અટલાદરા ગામ ખાતે પાર્કિંગ જેવી સામાન્ય બાબતે બે પક્ષો વચ્ચે થયેલી ઉગ્ર મારામારીની ઘટનામાં પોલીસે કડક કાર્યવાહી કરતા કુલ ૧૧ આરોપીઓની ધરપકડ કરી છે. આ ઘટનાને પગલે સમગ્ર વિસ્તારમાં ભારે ચકચાર મચી ગઈ હતી.

❓શું હતી ઘટના?

ગઈકાલે બપોરે અટલાદરા ગામના કોઠી ફળિયા ખાતે મોટરસાયકલ પાર્ક કરવા અને ઇકો ગાડી અંદર લાવવા માટે વારંવાર હોર્ન મારવાની સામાન્ય બાબતે બે પક્ષો વચ્ચે ઝઘડો થયો હતો. આ તકરાર એટલી હદે વણસી ગઈ કે બંને પક્ષો સામ-સામે આવી ગયા હતા. જેમાં હાથાપાઈ સાથે સ્ટીલની પાઈપો વડે હુમલો અને છૂટા ઈંટોના ટુકડા ફેંકવાની ઘટના બની હતી. આ મારામારીમાં બંને પક્ષના લોકોને નાની-મોટી ઈજાઓ પહોંચી હતી.

🚨પોલીસની ત્વરિત કાર્યવાહી:

બનાવની ગંભીરતાને ધ્યાને લઈ અટલાદરા પોલીસે બંને પક્ષોની ફરિયાદના આધારે ભારતીય ન્યાય સંહિતાની વિવિધ કલમો હેઠળ બે અલગ-અલગ ગુનાઓ દાખલ કર્યા હતા. પોલીસ ઈન્સ્પેક્ટર પી.યુ. ત્યાગીના માર્ગદર્શન હેઠળ સર્વેલન્સ સ્ટાફે સ્થાનિક સાક્ષીઓ અને હ્યુમન રિસોર્સના આધારે ગણતરીના કલાકોમાં જ બંને પક્ષના કુલ 11 આરોપીઓને ઝડપી પાડી કાયદેસરની કાર્યવાહી હાથ ધરી છે.

👮ધરપકડ કરાયેલા આરોપીઓ:

પોલીસે અટલાદરા ગામના કોઠી ફળિયાના પવનકુમાર ચાવડા, મિલન ચાવડા, દેવ ચાવડા, મહેન્દ્રભાઈ ચાવડા, વિનોદ ચાવડા, શ્રીજીત પરમાર તથા બીજા પક્ષના યોગેશભાઈ ચાવડા, દીપકભાઈ ઉર્ફે અજય ચાવડા, નિલેશ ચાવડા અને વિશાલ ચાવડા સહિત કુલ 11 શખ્સોની અટકાયત કરી છે.

​પોલીસ કમિશનરના આદેશ અનુસાર, ગંભીર ગુનાઓમાં તાત્કાલિક કાર્યવાહી કરવાના નિર્દેશોના પાલનરૂપે અટલાદરા પોલીસે આ કડક પગલાં લીધા છે, જે અસામાજિક તત્વો માટે લાલબત્તી સમાન છે.