GSFCમાં ફૂલોથી તાળાબંધી: વર્ષોથી સેવા આપતા કામદારોએ અનોખી રીતે નોંધાવ્યો વિરોધ

• અનોખો વિરોધ: કંપનીના ગેટને ફૂલોના હાર પહેરાવી તંત્રને ‘સદબુદ્ધિ’ મળે તેવી પ્રાર્થના.
• 16 મહિનાથી પગાર બંધ: આર્થિક સંકટમાં ફસાયેલા 120 કામદારો ન્યાયની આશામાં.
• કોર્ટના હુકમની અવગણના: 75 કામદારોને વેતન ચૂકવવાના કોર્ટના આદેશનું પાલન ન થતું હોવાનો આક્ષેપ.
• ઉગ્ર ચીમકી: કોર્ટના આદેશનો અનાદર કરનાર અધિકારીઓ સામે કાર્યવાહીની માંગ સાથે આંદોલન તેજ.

વડોદરા: વડોદરાની જાણીતી જીએસએફસી (GSFC) કંપનીમાં વર્ષો સુધી સેવા આપનારા અને હાલ છૂટા કરાયેલા કામદારોએ પોતાના હક માટે અનોખા વિરોધ પ્રદર્શનનો માર્ગ અપનાવ્યો છે. કંપનીના મુખ્ય ગેટને ફૂલોના હાર પહેરાવીને પ્રતિકાત્મક રીતે તાળાબંધી કરવામાં આવી હતી, જેમાં કામદારોએ કંપનીના સત્તાધીશોને ‘સદબુદ્ધિ’ મળે તેવી પ્રાર્થના કરી હતી.

❓શું છે સમગ્ર મામલો?

વર્ષ 2001થી જીએસએફસીના ટિસ્યુ કલ્ચર અને સરદાર અમીન યુનિટમાં ફરજ બજાવતા આશરે 120 કામદારોને વર્ષ 2020માં છૂટા કરી દેવામાં આવ્યા હતા. ફેબ્રુઆરી 2025 સુધી તેમને વેતન મળતું હતું, પરંતુ છેલ્લા 16 મહિનાથી પગાર બંધ થઈ જતાં કામદારો અને તેમના પરિવારો ગંભીર આર્થિક મુશ્કેલીમાં મુકાયા છે.

🧐કોર્ટના આદેશ છતાં અન્યાયનો આક્ષેપ:

કામદારોએ જણાવ્યું હતું કે, આ મામલે કોર્ટે 75 કર્મચારીઓને બરતરફ ન કરવા અને નિયમિત વેતન ચૂકવવા સ્પષ્ટ આદેશ આપ્યો હતો. જ્યારે અન્ય 30 જેટલા કર્મચારીઓનો કેસ હજુ પણ કોર્ટમાં પેન્ડિંગ છે. કામદારોનો આક્ષેપ છે કે કોર્ટના આદેશ છતાં કંપની તંત્ર દ્વારા પગાર કે નોકરી બાબતે કોઈ હકારાત્મક પગલાં લેવામાં આવી રહ્યા નથી.

🗣️કામદારોનો રોષ:

વિરોધ પ્રદર્શન દરમિયાન કામદારો કાળા કપડાંમાં જોવા મળ્યા હતા. તેમણે “નોકરી અને પગાર આપો” તેમજ “કોર્ટના આદેશનું પાલન કરો” લખેલા પ્લેકાર્ડ સાથે કંપનીના ગેટ પર સૂત્રોચ્ચાર કર્યા હતા. કામદારોએ ચીમકી ઉચ્ચારી છે કે જો કોર્ટના હુકમનો અનાદર કરનાર જવાબદાર અધિકારીઓ સામે કડક કાર્યવાહી નહીં કરવામાં આવે, તો આગામી દિવસોમાં આંદોલન વધુ ઉગ્ર બનાવવામાં આવશે.