વિકસિત ગુજરાતની વાસ્તવિકતા: વાઘોડિયાના ખોયા ગામમાં કાદવ-કીચડ અને ભરાયેલા પાણીમાંથી કાઢવી પડી અંતિમયાત્રા

• કાદવ-કીચડમાંથી અંતિમયાત્રા: વાઘોડિયાના ખોયા ગામમાં પાકા રસ્તા ન હોવાથી ગ્રામજનો કાદવ વચ્ચેથી લાશ લઈ જવા મજબૂર બન્યા.
• પ્રાથમિક સુવિધાઓનો અભાવ: ગામમાં સ્મશાનગૃહ અને સારા રસ્તા જેવી પાયાની સગવડો ન હોવાથી લોકોમાં ભારે રોષ છે.
• સોશિયલ મીડિયામાં વાયરલ દ્રશ્યો: આ ઘટનાના દ્રશ્યો વાયરલ થતાં તંત્ર અને નેતાઓ વિકાસના દાવાઓની પોલ ખુલી ગઈ છે.
• ગ્રામજનોની ઉગ્ર માંગ: વહીવટી તંત્ર તાત્કાલિક ધોરણે ગામમાં પાકા રસ્તા અને સ્મશાનગૃહની સુવિધા ઊભી કરે તેવી માંગ કરાઈ છે.

વડોદરા/વાઘોડિયા: ગુજરાતમાં સરકાર દ્વારા ‘વિકસિત ગુજરાત’ અને ‘વિકાસશીલ ભારત’ના મોટા-મોટા દાવા કરવામાં આવી રહ્યા છે, પરંતુ વાસ્તવિક સ્થિતિ કેટલી દયનીય છે તેની સાક્ષી પૂરતા હૃદયદ્રાવક દ્રશ્યો વડોદરા જિલ્લાના વાઘોડિયા તાલુકાના ખોયા ગામમાંથી સામે આવ્યા છે. રસ્તાઓ પર ભરાયેલા વરસાદી પાણી અને અસહ્ય કાદવ-કીચડ વચ્ચેથી ગ્રામજનોને મજબૂર થઈને અંતિમયાત્રા કાઢવી પડી છે.

❓શું છે સમગ્ર વેદના?

ખોયા ગામમાં પાકા રસ્તા અને સ્મશાનગૃહ જેવી પ્રાથમિક સુવિધાઓનો સંપૂર્ણ અભાવ હોવાને કારણે સ્થાનિક રહીશો નરકાગાર જેવું જીવન જીવવા મજબૂર બન્યા છે. પરિસ્થિતિ એટલી હદે ગંભીર છે કે ગામમાં જીવતા લોકોની હાલાકી તો ઠીક, પરંતુ હવે મૃત્યુ પામનાર વ્યક્તિની અંતિમયાત્રા કાઢવી પણ દુષ્કર બની ગઈ છે. પરિવારજનો અને ગ્રામજનોએ ભારે મુશ્કેલીઓ વચ્ચે કાદવ ખૂંદીને અંતિમ સંસ્કાર માટે જવું પડ્યું હતું, જેના દ્રશ્યો હાલ સોશિયલ મીડિયામાં વાયરલ થઈ રહ્યા છે.

🧐તંત્ર સામે ઉગ્ર સવાલો:

આ વાયરલ દ્રશ્યો સામે આવ્યા બાદ સ્થાનિક વહીવટી તંત્ર અને જનપ્રતિનિધિઓની કામગીરી સામે ગંભીર સવાલો ઊભા થયા છે. સોશિયલ મીડિયા પર લોકો કટાક્ષ કરી રહ્યા છે કે, “વિકસિત ગુજરાતની તસવીરો વરસાદના ટાણે રસ્તાઓ પર તો જોઈ જ લીધી, હવે જરા ગામડાઓની આ વાસ્તવિક હાલત પણ જોઈ લો.” સ્થાનિક ગ્રામજનોએ તંત્ર સમક્ષ ઉગ્ર માંગ કરી છે કે વહેલી તકે ખોયા ગામમાં પાકા રસ્તા અને સ્મશાનગૃહનું નિર્માણ કરવામાં આવે, જેથી નાગરિકોને આ અસહ્ય પીડામાંથી મુક્તિ મળી શકે.