ધારાસભ્યોની વાત સાચી પડી, સરકારી તંત્ર પાસે કામ કરાવવું યુદ્ધ લડવા સમાન અઘરું!, વરણામા ગ્રામ પંચાયતને થયો કડવો અનુભવ!

(મૌલિક પટેલ-એડિટર) જાન્યુઆરી માસમાં વડોદરા જીલ્લાના પાંચ ધારાસભ્યોએ મુખ્યમંત્રીને પત્ર લખ્યો હતો જેમાં સામાન્ય માણસને પોતાનું નાનું કામ સરકારી કચેરી માંથી કરાવવું એ એક યુદ્ધ લડવા જેવું અઘરું બની ગયું છે અને મોટા અધિકારીઓથી લઈને નાના કર્મચારીઓ પોતાની મનસ્વીતા દર્શાવતા થઇ ગયા છે અને અંધાધુન વહીવટ ચલાવવામાં આવી રહ્યો છે. તેવો ઉલ્લેખ કરવામાં આવ્યો હતો. આજે આવો જ એક અનુભવ વડોદરા તાલુકાની એક ગ્રામ પંચાયતને થયો છે. જેમાં જીલ્લામાં ગ્રામ્ય કક્ષાએ વિકાસ કરવો હોય તો તંત્ર જ ગ્રામ પંચાયતને સહકાર ન આપતું હોવાના પુરાવાઓ સામે આવ્યા છે. જ્યાં કોર્ટના હુકમ બાદ જે ગામમાં પોલીસ મથક વર્ષોથી સ્થાપિત થયેલું છે ત્યાં પણ ગામના દબાણો દુર કરવા માટે પુરતો પોલીસ બળ ઉપલબ્ધ નથી તેવો લેખિત પત્ર આપીને દબાણો દુર કરવામાં વિલંબ કરવામાં આવી રહ્યો છે. આમ તો જયારે વીઆઈપી મુવમેન્ટ હોય અને કોઈ નેતાને શક્તિ પ્રદર્શન કરવું હોય ત્યાં જીલ્લામાં પુરતો પોલીસ કાફલો મળી જાય છે. પણ જ્યાં લોકહિત માટે ગામના દબાણો દુર કરવા હોય ત્યાં પોલીસ પાસે સ્ટાફની અછત સર્જાય છે.

મળતી માહિતી પ્રમાણે વડોદરા તાલુકાના વરણામા ગામે ગામની અંદર ગેરકાયદેસર રીતે ઉભી થયેલી દુકાનો દુર કરવા માટે ગ્રામ પંચાયતે દુકાનના કબજેદારોને નોટીસ આપી હતી. આ દુકાનો તોડી પાડીને સરકારી જમીનનો કબજો પરત ગ્રામ પંચાયત પાસે મેળવી લેવા માટે ગ્રામજનોએ મુહિમ ઉપાડી હતી. આ મુહિમ સામે થયેલી કાર્યવાહીમાં દુકાનો નહિ તોડવા માટે કબજેદારોએ કોર્ટના દ્વાર ખખડાવ્યા હતા. જ્યાં કોર્ટ દ્વારા દબાણકર્તાઓ પાસે માલિકી હક્કના પુરાવાઓ મંગાવ્યા હતા. જોકે કબજેદારોએ પુરાવા રજુ નહિ કરતા કોર્ટે દબાણ દુર કરવા માટે ગ્રામ પંચાયતને પરવાનગી આપી દીધી હતી.

જે બાદ ગત 27 મેના રોજ મદદનીશ કલેકટર અને સબ ડીવીઝનલ મેજીસ્ટ્રેટ દ્વારા દબાણો દુર કરવા માટે ગ્રામ પંચાયતને પોલીસ બંદોબસ્ત પૂરો પાડવા વરણામાં પોલીસ મથકને પત્ર લખ્યો હતો. જેમાં સ્પષ્ટ ઉલ્લેખ હતો કે, સીનીયર સિવિલ જજ વડોદરા સમક્ષ ચાલી ગયેલ રેવન્યુ મુકદમા 748 થી 752 ના હુકમ પ્રમાણે વરણામા ગ્રામ પંચાયતમાં ગેરકાયદેસર રીતે બાંધેલી દુકાનો/દબાણ તોડી પાડવા માટે 5 જુને પોલીસ બંદોબસ્ત પૂરો પાડવાનો રહેશે.

ફરીથી આજે 04 મેના રોજ મદદનીશ કલેકટર અને સબ ડીવીઝનલ મેજીસ્ટ્રેટ દ્વારા “તાત્કાલિક/અગત્યનું” તેવા શેરા સાથે પોલીસ બંદોબસ્ત ફાળવવા માટે વરણામા પોલીસ મથકના પોલીસ અધિકારીને પત્ર લખ્યો હતો. જ્યાં સ્પષ્ટ લખવામાં આવ્યું હતું કે, “વરણામા ગ્રામ પંચાયત દ્વારા નક્કી કરેલ સમય દરમ્યાન સરકારશ્રીના ધારાધોરણો અને નિયમ પ્રમાણે પોલીસ બંદોબસ્ત ફાળવી આપવા આપને જણાવવામાં આવે છે.”

સિનયર સિવિલ જજ વડોદરાના હુકમ અને ત્યાર બાદ વડોદરા ગ્રામ્ય SDM દ્વારા “તાત્કાલિક/અગત્યનું” તેવા શેરા સાથે લખેલા પત્ર બાદ જે ગામમાં દબાણ તોડવાનું છે તેજ ગામમાં દબાણ વાળા વિસ્તારથી માત્ર 100 મીટરના અંતરે પોલીસ સ્ટેશન ધરાવતા વરણામા પોલીસ મથકના ઇન્ચાર્જ PI દ્વારા બંદોબસ્ત ફાળવવા માટે લખેલા પત્રની વિગતો વાંચી તમે આશ્ચર્યમાં મુકાઈ જશો. દબાણ દુર કરવાની તારીખ અને સમયના 12 કલાક પહેલા જ ઇન્ચાર્જ  PI જે. કે ડાંગર પત્રમાં જણાવે છે કે, “અત્રેના વરણામા પોલીસ સ્ટેશનના સ્થાનિક PI 8 જૂન સુધી રજા પર હોય, તેમજ પોલીસ સ્ટેશનમાં આશરે 10 જેટલા પોલીસ માણસો પણ અન્ય કામગીરીમાં રોકાયેલા હોય તથા 6 પોલીસ કર્મીઓ રજા પર હોય, ગામમાં કાયદો અને વ્યવસ્થાની પરિસ્થિતિ બગડે તેવી શક્યતાઓ હોય જેથી દબાણ દુર કરવાની કામગીરી પાંચ દિવસ પછી રાખવામાં જણાવવામાં આવે છે.”

વિચારવા જેવી વાત એ છે કે, કોર્ટના હુકમ બાદ તમામ સરકારી પ્રક્રિયાઓ પૂર્ણ કર્યા બાદ પણ એક ગ્રામ પંચાયત પોતાના ગામની સરકારી જમીન પર દબાણ દુર કરવામાં લાચારી અનુભવી રહ્યા છે. જ્યાં દબાણ દુર કરવામાં પોલીસ બંદોબસ્ત મેળવવા માટે ધમપછાડા કરવા પડે છે. વરણામા ગામ માંજ વરણામા પોલીસ મથક આવેલું છે. છતાય ગામના કાયદો અને વ્યવસ્થાની સ્થિતિ સાચવવા માટે પોલીસ સ્ટેશન પાસે પુરતો સ્ટાફ કે ફરજ પર અધિકારી હાજર ન હોય પોલીસે પણ પોતાની લાચારી પત્રમાં સ્પષ્ટ જણાવી દીધી છે. વિઆઈપી મુવમેન્ટ અને નેતાઓના શક્તિપ્રદર્શન માટે રાતોરાત બંદોબસ્ત મળી જતો હોય, ત્યાં એક ગ્રામ પંચાયતને 100 પોલીસ મથકથી 100 મીટરના અંતરે બંદોબસ્ત મળતો નથી. જીલ્લા પોલીસના પોલીસ મથક પાસે પુરતો સ્ટાફ ન હોય તો પોલીસ હેડ ક્વાર્ટરમાં રહેલો રીઝર્વ સ્ટાફ પણ બંદોબસ્ત માટે આપી શકે છે. પણ અહિયાં તો જેમ જાન્યુઆરીમાં જીલ્લાના પાંચ ધારાસભ્યોએ મુખ્યમંત્રીને પત્ર લખ્યો હતો તેમ વાત સાર્થક થઇ રહી છે. “સામાન્ય નાગરિક તો ઠીક, ગ્રામ પંચાયતને પણ સરકારી તંત્ર પાસે કામ કરાવવું એ યુદ્ધ લડવા સમાન મુશ્કેલ થઇ ગયું છે!”