ઉત્તર વડોદરામાં તીવ્ર દુર્ગંધથી નાગરિકો બેહાલ: શ્વાસ લેવામાં તકલીફ અને આંખોમાં બળતરાની વ્યાપક ફરિયાદો.

વડોદરામાં ઝેરી દુર્ગંધનો આતંક, GPCB એક્શન મોડમાં

• ​GPCB ની હાઈ-લેવલ બેઠક: નંદેશરીના ઉદ્યોગોને બપોર પછી કામગીરી બંધ રાખવા આદેશ.
• ​7 એકમોને ફટકારાઈ એડવાઈઝરી: નિયમોનું ઉલ્લંઘન કરનાર સામે કડક કાર્યવાહીની ચીમકી.
• ​ભાયલીમાં મોબાઈલ વાન તૈનાત: 24 કલાક એર ક્વોલિટીનું મોનિટરિંગ શરૂ.

વડોદરા શહેરના ઉત્તર વિસ્તારના રહીશો છેલ્લા કેટલાક દિવસોથી એક અજાણ્યા ભય અને શારીરિક તકલીફનો સામનો કરી રહ્યા છે. શહેરમાં ફેલાયેલી તીવ્ર દુર્ગંધને કારણે લોકોના સ્વાસ્થ્ય પર જોખમ ઊભું થયું છે. આ મામલે હવે ગુજરાત પ્રદૂષણ નિયંત્રણ બોર્ડ એટલે કે GPCB હરકતમાં આવ્યું છે.

છેલ્લા ઘણા દિવસોથી વડોદરાના ઉત્તર અને પશ્ચિમ વિસ્તારોમાં રાત્રિના સમયે અને વહેલી સવારે અસહ્ય દુર્ગંધ ફેલાઈ રહી છે. નાગરિકોએ ફરિયાદ કરી છે કે આ દુર્ગંધને કારણે આંખોમાં બળતરા અને શ્વાસ લેવામાં ભારે મુશ્કેલી પડી રહી છે. ખાસ કરીને ભાયલીના સ્ટાર રેસીડેન્સી વિસ્તારમાં પણ આ સમસ્યા વકરતા ત્યાં GPCB દ્વારા એન્વાયરમેન્ટલ મોનિટરિંગ મોબાઈલ વાન 24 કલાક માટે તૈનાત કરી દેવામાં આવી છે.

🧐GPCB ની હાઈ-લેવલ એક્શન:

પરિસ્થિતિની ગંભીરતાને જોતા ગઈકાલે GPCB હેડ ઓફિસ ખાતે ચેરમેનની અધ્યક્ષતામાં એક તાકીદની બેઠક યોજાઈ હતી. જેમાં નંદેશરી ઇન્ડસ્ટ્રીઝ એસોસિએશન અને PCC એરિયાના અધિકારીઓ હાજર રહ્યા હતા. તપાસમાં સામે આવ્યું છે કે આ પ્રદૂષણ કોઈ એક કંપની નહીં, પરંતુ સમગ્ર ઇન્ડસ્ટ્રિયલ બેલ્ટની કેમિકલ પ્રક્રિયાઓનું પરિણામ છે.

✍️નવા નિયમો અને નિયંત્રણો:

• સમય મર્યાદા: નંદેશરી વિસ્તારમાં બેચ ઓપરેશન ધરાવતા એકમોને બપોર પછી કામગીરી બંધ રાખવા કડક સૂચના અપાઈ છે. આ એકમો હવે માત્ર સવારથી બપોર સુધી જ કાર્યરત રહી શકશે.
• એડવાઈઝરી: કુલ 7 મોટી કંપનીઓ અને એસોસિએશનને સત્તાવાર એડવાઈઝરી જારી કરવામાં આવી છે.
• નાઈટ પેટ્રોલિંગ: GPCB ની ખાસ ટીમો રાત્રિના સમયે ઉદ્યોગોમાં સરપ્રાઈઝ ચેકિંગ કરી રહી છે જેથી ગેરકાયદેસર ગેસ રિલીઝ કે પ્રદૂષણ ફેલાવતા એકમોને ઝડપી શકાય.

👉GPCB એ સ્પષ્ટ ચેતવણી આપી છે કે જો ઉદ્યોગો દ્વારા સૂચનાઓનું પાલન કરવામાં નહીં આવે, તો ફેક્ટરીઓ સીલ કરવા સુધીના કડક પગલાં લેવામાં આવશે. અત્યારે તો તંત્રના આ પ્રયાસોથી વડોદરાવાસીઓને ક્યારે રાહત મળે છે તે જોવાનું રહેશે.