સ્માર્ટ સિટીનું શરમજનક ચિત્ર: વડોદરાની સૌથી મોટી હોસ્પિટલમાં પીવાના પાણીના ફાંફા, સેવકો (ડોક્ટરો) એ પણ બહારથી જગ મંગાવવા પડ્યા!

• નામના જ સ્માર્ટ: મધ્ય ગુજરાતની સૌથી મોટી સયાજી હોસ્પિટલમાં પીવાના શુદ્ધ પાણીના ફાંફા; ‘નલ સે જલ’ નો નારો પોકળ સાબિત થયો.
• શરમજનક સ્થિતિ: રાત-દિવસ દર્દીઓની સેવા કરતા ડોક્ટરોએ પણ તરસ છિપાવવા બહારથી પાણીના જગ મંગાવવા પડ્યા.
• ભાજપ પર આકરા પ્રહાર: “નેતાઓ મિટિંગોમાં લાખોની બોટલો ગટગટાવે છે, પણ ગરીબ દર્દીઓ માટે પાણીની વ્યવસ્થા નથી.” – સામાજિક કાર્યકર.
• ઉનાળાનો આકરો તાપ: કાળઝાળ ગરમીમાં દર્દીઓ અને તેમના સ્વજનો પાણી માટે વલખા મારી રહ્યા છે, તંત્ર ઘોર નિદ્રામાં.

વડોદરા: વડોદરા શહેરને ‘સ્માર્ટ સિટી’ બનાવવાની મોટી મોટી વાતો અને ‘નલ સે જલ’ ના બણગાં ફૂંકતી ભારતીય જનતા પાર્ટીના શાસનમાં શહેરની સૌથી મોટી સરકારી હોસ્પિટલ એસ.એસ.જી. (SSG) માં જ પીવાના પાણીની ગંભીર સમસ્યા સર્જાઈ છે. ઉનાળાની શરૂઆતમાં જ ગરીબ દર્દીઓ અને તેમના સ્વજનો માટે પીવાલાયક શુદ્ધ પાણી ન મળતા હોસ્પિટલ તંત્રની ઘોર બેદરકારી ઉઘાડી પડી છે.

🩺ડોક્ટરોની લાચારી:

સૌથી શરમજનક બાબત તો એ છે કે, જે ડોક્ટરો રાત-દિવસ પોતાનો જીવ જોખમમાં મૂકીને દર્દીઓની સેવા કરે છે, તેમને પણ હોસ્પિટલમાં પીવાનું પાણી ન મળતા બહારથી ખાનગી એજન્સીઓ પાસેથી પાણીના જગ મંગાવવાની નોબત આવી છે. સ્માર્ટ સિટીના દાવાઓ વચ્ચે હોસ્પિટલમાં પીવાના પાણીની આ તંગી વહીવટી તંત્રની નિષ્ફળતાની ચાડી ખાઈ રહી છે.

🧐સામાજિક કાર્યકરનો આક્રોશ:

આ મામલે સામાજિક કાર્યકરે સત્તાધારી પક્ષ ભાજપ અને હોસ્પિટલ સત્તાધીશો પર આકરા પ્રહાર કરતા જણાવ્યું છે કે, “ભારતીય જનતા પાર્ટીના સત્તાધીશો મ્યુનિસિપલ કોર્પોરેશન અને અન્ય સરકારી મિટિંગોમાં લાખો રૂપિયાનું આંધણ મિનરલ વોટરની બોટલો પાછળ કરે છે. જે નેતાઓ મિટિંગમાં મોંઘું પાણી પીવે છે, તેમને હોસ્પિટલમાં તરસ્યા રહેતા ગરીબ દર્દીઓની વેદના કેમ દેખાતી નથી? આ તે કેવું સ્માર્ટ સિટી કે જ્યાં દર્દીઓને પીવાનું પાણી પણ નસીબ નથી!”

🛑તંત્રની બેદરકારી:

કાળઝાળ ગરમીમાં જ્યારે પાણીની જરૂરિયાત સૌથી વધુ હોય છે, ત્યારે હોસ્પિટલના વોટર કુલરો શોભાના ગાંઠિયા સમાન બની ગયા છે. દર્દીઓના સગાએ પાણી માટે બહાર ભટકવું પડે છે અથવા મોંઘા ભાવે પાણી ખરીદવું પડે છે. હવે જોવાનું એ રહે છે કે આ વિવાદ બાદ ‘નલ સે જલ’ ના નારા લગાવનારા નેતાઓની ઊંઘ ઉડશે કે પછી ગરીબ જનતાએ હજુ પણ તરસ્યા રહેવું પડશે.

🫵જે શહેરમાં નેતાઓના ગળા મિનરલ વોટરથી ભીના થતા હોય, ત્યાં દર્દીઓના ગળા સુકાઈ રહ્યા છે. આ જ શું સ્માર્ટ વડોદરાની વાસ્તવિકતા છે