વિશ્વયુદ્ધનું કાઉન્ટડાઉન? : ઈરાનના પરમાણુ મથકો પર અમેરિકાના 2000 પાઉન્ડના બંકર બસ્ટર બોમ્બનો કહેર

• યુદ્ધની જવાળા: ઇસ્ફહાનમાં અમેરિકાનો ભીષણ હુમલો; 2000 પાઉન્ડના બંકર-બસ્ટર બોમ્બે ઈરાનના સૈન્ય ઠેકાણાઓ કર્યા ધ્વસ્ત.
• ટ્રમ્પનો આક્રમક અંદાજ: ડોનાલ્ડ ટ્રમ્પે વીડિયો શેર કરી આપી ચેતવણી – “સમજૂતી કરો અથવા નેસ્તનાબૂદ થવા તૈયાર રહો.”
• પરમાણુ મથકો નિશાને: ઇસ્ફહાનના યુરેનિયમ સ્ટોરેજ અને દારૂગોળાના ડેપો પર અમેરિકન B2 બોમ્બર વિમાનોનો કહેર.
• અજેય ટેકનોલોજી: રડારની નજરમાં ન આવતા B2 બોમ્બરે જમીનની ઊંડે ઉતરીને કમાન્ડ સેન્ટરોને પળવારમાં કર્યા તબાહ.

વોશિંગ્ટન/તેહરાન: ઈરાન અને અમેરિકા વચ્ચે ચાલી રહેલા સંઘર્ષે હવે અત્યંત ભયાનક સ્વરૂપ ધારણ કર્યું છે. પશ્ચિમ એશિયામાં શાંતિની તમામ આશાઓ પર પાણી ફેરવતા અમેરિકાએ ‘ઓપરેશન એપિક ફ્યુરી’ (Operation Epic Fury) હેઠળ ઈરાનના વ્યૂહાત્મક રીતે મહત્વના શહેર ઇસ્ફહાન પર પ્રચંડ બોમ્બમારો કર્યો છે. અમેરિકન પ્રમુખ ડોનાલ્ડ ટ્રમ્પની આ આક્રમક વ્યૂહનીતિએ સ્પષ્ટ કરી દીધું છે કે અમેરિકા અત્યારે કોઈ પણ સંજોગોમાં નરમ પડવા તૈયાર નથી.

​રાત્રિના અંધકારમાં પ્રચંડ વિસ્ફોટો:

આશરે 2.3 મિલિયનની વસ્તી ધરાવતા ઇસ્ફહાન શહેરમાં જ્યારે લોકો નિદ્રાધીન હતા, ત્યારે રાત્રિના સમયે થયેલા મસમોટા વિસ્ફોટોથી આખું આકાશ ગુંજી ઉઠ્યું હતું. વોલ સ્ટ્રીટ જર્નલના અહેવાલ મુજબ, અમેરિકન દળોએ અહીં આવેલા દારૂગોળાના વિશાળ ડેપો અને બદ્ર મિલિટરી એરબેઝને નિશાન બનાવ્યા છે. આ હુમલામાં અત્યંત શક્તિશાળી 2000 પાઉન્ડના બંકર-બસ્ટર બોમ્બનો ઉપયોગ કરવામાં આવ્યો હોવાનું મનાય છે.

​B2 બોમ્બર અને GBU-57 ની તાકાત:

આ ઓપરેશનમાં અમેરિકાએ વિશ્વના સૌથી અદ્યતન B2 બોમ્બર વિમાનોનો ઉપયોગ કર્યો છે. આ વિમાનની ખાસિયત એ છે કે તે રડારની નજરમાં આવ્યા વગર દુશ્મનના વિસ્તારમાં ઘૂસી શકે છે. આ વિમાનો દ્વારા GBU-57 બંકર-બસ્ટર બોમ્બ ફેંકવામાં આવ્યા હતા, જે જમીનની સેંકડો ફૂટ ઊંડાઈએ ઉતરીને વિસ્ફોટ કરવાની ક્ષમતા ધરાવે છે. ઈરાન જે યુરેનિયમનો સંગ્રહ કરવા માટે ઇસ્ફહાનનો ઉપયોગ કરતું હતું, તે પરમાણુ મથકોને અમેરિકાએ આ હુમલામાં નિશાન બનાવ્યા છે.

​સીઝફાયરની શક્યતાઓ ધૂંધળી:

ગયા વર્ષે ‘ઓપરેશન મિડનાઈટ હેમર’ બાદ આ બીજો મોટો હુમલો છે. ટ્રમ્પે અગાઉ જ ઈરાનને તેના એનર્જી ઈન્ફ્રાસ્ટ્રક્ચરને નેસ્તનાબૂદ કરવાની ચેતવણી આપી હતી. ઈરાનના ફોર્ડો અને નતાન્ઝ જેવા સંવેદનશીલ સ્થળો પર થયેલી આ કાર્યવાહીથી હવે પશ્ચિમ એશિયામાં યુદ્ધના વાદળો વધુ ઘેરા બન્યા છે. નિષ્ણાતો માની રહ્યા છે કે જો ઈરાન વહેલી તકે કોઈ સમજૂતી નહીં કરે, તો આગામી દિવસોમાં આ સંઘર્ષ ત્રીજા વિશ્વયુદ્ધ તરફ દોરી જઈ શકે છે.

🫵અત્યાધુનિક હથિયારો અને પરમાણુ મથકો પરના આ હુમલાએ દુનિયાને થરથરાવી દીધી છે. હવે જોવાનું એ રહેશે કે ઈરાન આ પ્રચંડ હુમલાનો વળતો જવાબ કેવી રીતે આપે છે.