સાવધાન! ઇન્ટરનેટ સાથે જોડાયેલા તમારા CCTV કેમેરા હેક થઈ શકે છે; જાણો સરકારના નવા ‘સર્ટિફિકેશન’ નિયમો.

• સિક્યુરિટી એલર્ટ: Hikvision, Dahua અને TP-Link જેવી ચાઈનીઝ બ્રાન્ડ્સના CCTV વેચાણ પર સરકાર લગાવી શકે છે રોક.
• ડેટા લીકનો ખતરો: રેલવે સ્ટેશનોના CCTV ફીડ્સ પાકિસ્તાન પહોંચતા સુરક્ષા એજન્સીઓ હાઈ-એલર્ટ પર; વિદેશી સર્વર મોટા જોખમ સમાન.
• નવા નિયમો: હવેથી માત્ર ‘સર્ટિફાઈડ’ અને સુરક્ષિત કેમેરા જ વેચી શકાશે; હાર્ડવેરથી લઈને સોફ્ટવેર સુધીનું થશે કડક ટેસ્ટિંગ.
• સાયબર વૉરનું જોખમ: ઈઝરાયેલ-ઈરાન જેવી સ્થિતિ ભારતમાં ન સર્જાય તે માટે સરકારનું મોટું પગલું; જાહેર સ્થળોના કેમેરાનું થઈ શકે છે ઓડિટ.

​નવી દિલ્હી/વડોદરા: ભારતમાં સુરક્ષા માટે લગાવવામાં આવતા CCTV કેમેરા હવે પોતે જ સુરક્ષા માટે મોટો ખતરો બની રહ્યા છે. ખાસ કરીને ચીન નિર્મિત કેમેરાના સોફ્ટવેર અને સર્વર ડેટા ચોરી માટે જવાબદાર હોવાનું સામે આવતા કેન્દ્ર સરકાર આગામી ૧લી એપ્રિલથી મોટા ફેરફારો કરવા જઈ રહી છે. Hikvision અને Dahua જેવી દિગ્ગજ ચાઈનીઝ કંપનીઓના CCTV કેમેરાના વેચાણ પર પ્રતિબંધ મુકાય તેવી પૂરેપૂરી શક્યતા છે.

🧐પાકિસ્તાન સુધી પહોંચી રહી હતી ફીડ્સ:

થોડા સમય પહેલા થયેલા ચોંકાવનારા ખુલાસા મુજબ, દેશના અનેક મહત્વના રેલવે સ્ટેશનો પર લાગેલા CCTV કેમેરાના લાઈવ દ્રશ્યો સરહદ પાર પાકિસ્તાન સુધી પહોંચી રહ્યા હતા. આ ઘટના બાદ સરકારી કચેરીઓને હવેથી માત્ર સંપૂર્ણ સુરક્ષિત અને સર્ટિફાઈડ કેમેરા જ ખરીદવાનો કડક આદેશ અપાયો છે.

❓કેવી રીતે થાય છે ડેટાની ચોરી?

આજના સમયમાં મોટાભાગના CCTV ઈન્ટરનેટથી કનેક્ટેડ હોય છે. આ કેમેરા માત્ર તમારા મોબાઈલ સાથે નહીં, પણ જે-તે કંપનીના વિદેશમાં રહેલા સર્વર સાથે પણ જોડાયેલા હોય છે. જો સોફ્ટવેર સુરક્ષિત ન હોય, તો તમારી ખાનગી પળો કે સંવેદનશીલ વિગતો અન્ય કોઈ પાસે પહોંચી શકે છે અને તમને તેનો ખ્યાલ પણ આવતો નથી. નવા નિયમો હેઠળ હવે દરેક કેમેરાનું હાર્ડવેર અને ડેટા સિક્યુરિટી ટેસ્ટિંગ અનિવાર્ય બનશે.

👉બજાર પર અસર અને સાયબર વૉર:

સરકારના આ નિર્ણયથી બજારમાં સસ્તા ચાઈનીઝ કેમેરા બંધ થતા કિંમતોમાં વધારો થઈ શકે છે, પરંતુ ભારતીય કંપનીઓ માટે આ એક મોટી તક સાબિત થશે. નિષ્ણાતોનું માનવું છે કે માત્ર નવા કેમેરા પર પ્રતિબંધ પૂરતો નથી, પણ જે કરોડો કેમેરા અત્યારે લાગેલા છે તેનું ‘સિક્યુરિટી ઓડિટ’ થવું જોઈએ. ઈરાન અને ઈઝરાયેલ વચ્ચેના સંઘર્ષમાં જોયું છે તેમ, દુશ્મન દેશો CCTV હેક કરીને લોકોને સોફ્ટ ટાર્ગેટ બનાવી શકે છે.

🫵ટેકનોલોજી સુવિધાની સાથે જોખમ પણ લાવે છે. જો તમે પણ ચાઈનીઝ CCTV વાપરો છો, તો તેનો પાસવર્ડ બદલવો અને સોફ્ટવેર અપડેટ રાખવું હિતાવહ છે.