“યુદ્ધ વિદેશમાં, આફત વડોદરામાં! કોમર્શિયલ ગેસના કાપથી રેસ્ટોરન્ટોને તાળા મારવાની નોબત.”

• તંત્રની ક્રૂર મજાક: હોટલ-રેસ્ટોરન્ટોને માત્ર 10% ગેસ આપવાની જાહેરાત; સંચાલકોએ પૂછ્યું, “આટલા ગેસમાં તો સ્ટાફની રસોઈ પણ ન થાય!”
• ઉદ્યોગ બરબાદીના આરે: ગેસની અછતને કારણે અનેક હોટલો અને ધાબાને તાળા મારવાની નોબત; કર્મચારીઓની રોજીરોટી છીનવાઈ.
• મધ્ય યુગમાં પરત?: ગેસ ન મળતા અનેક સંચાલકો કોલસાના ચૂલા વાપરવા મજબૂર; પર્યાવરણ અને સ્વાસ્થ્ય બંને જોખમમાં.
• કલેક્ટર કચેરીએ હલ્લો: “50% ક્વોટા આપો અથવા PNG કનેક્શન આપો” – હોટલ સંચાલકોએ સરકારને આપ્યું અલ્ટીમેટમ.

વડોદરા: આંતરરાષ્ટ્રીય સ્તરે ઈરાન, અમેરિકા અને ઈઝરાયેલ વચ્ચે ચાલી રહેલા યુદ્ધની સીધી અસર હવે વડોદરાના મધ્યમવર્ગીય વેપારીઓ અને હોટલ ઉદ્યોગ પર જોવા મળી રહી છે. છેલ્લા એક મહિનાથી સર્જાયેલી એલપીજી ગેસની અછત વચ્ચે તંત્ર દ્વારા માત્ર 10 ટકા જ કોમર્શિયલ ગેસ સિલિન્ડર આપવાની જાહેરાત કરાતા હોટલ અને રેસ્ટોરન્ટ સંચાલકોમાં ભારે રોષ ફાટી નીકળ્યો છે.

🧐મોટી જાહેરાત, ખોખલી વ્યવસ્થા:

તંત્રએ જે પ્રકારે માત્ર 10 ટકા ક્વોટાની જાહેરાત કરી છે તે હોટલ ઉદ્યોગ માટે મરણતોલ ફટકો સમાન છે. આજે મોટી સંખ્યામાં હોટલ અને ધાબા સંચાલકોએ કલેક્ટર કચેરી ખાતે એકત્ર થઈને તંત્રની આ નીતિ સામે ઉગ્ર વિરોધ નોંધાવ્યો હતો. સંચાલકોનું કહેવું છે કે, “10 ટકા ગેસમાં તો હોટલના સ્ટાફ માટેની રસોઈ પણ માંડ બને, તો ગ્રાહકોને જમાડવા ક્યાંથી?”

🔥ચૂલા અને કોલસાનો સહારો:

ગેસના અભાવે શહેરની અનેક જાણીતી રેસ્ટોરન્ટો બંધ થઈ ગઈ છે, જ્યારે કેટલીક જગ્યાએ મજબૂરીમાં કોલસાના ચૂલા સળગાવવામાં આવી રહ્યા છે. આ પરિસ્થિતિએ વડોદરાના ફૂડ બિઝનેસને વર્ષો પાછળ ધકેલી દીધો હોય તેમ લાગી રહ્યું છે. મોંઘવારીના માર વચ્ચે હવે ગેસની અછતને કારણે સંચાલકોની આર્થિક કમર તૂટી ગઈ છે.

📛PNG કનેક્શનના નામે ઠાગાઠૈયા:

હોટલ ઉદ્યોગના સંગઠને સ્પષ્ટ માંગ કરી છે કે જો સરકાર સિલિન્ડરનો 50 ટકા જથ્થો પૂરો પાડી શકતી ન હોય, તો તાત્કાલિક ધોરણે તમામ વ્યવસાયિક એકમોને પીએનજી (પાઇપલાઇન) ગેસ કનેક્શન આપવામાં આવે. પરંતુ તંત્ર દ્વારા માત્ર “વિચારણા કરાશે” તેવા રાબેતા મુજબના આશ્વાસન મળતા વેપારીઓમાં ભારે અસંતોષ જોવા મળ્યો છે.

🫵યુદ્ધ વિદેશમાં ચાલે છે અને તેની કિંમત વડોદરાનો નાનો વેપારી ચૂકવી રહ્યો છે. જો સમયસર ઉકેલ નહીં આવે તો વડોદરાનો પ્રખ્યાત ‘ફૂડ બિઝનેસ’ ભૂતકાળ બની જશે.