વડોદરા ક્રાઈમ બ્રાન્ચનું મોટું ઓપરેશન, અઢી વર્ષથી ફરાર દુષ્કર્મનો આરોપી MP થી ઝડપાયો

પેરોલ-ફર્લો જમ્પ કરનારા કેદીઓ વિરુદ્ધ ઝુંબેશ: ગળપાદર જેલનો વોન્ટેડ કેદી જેલ હવાલે.

• ​સગીરાના અપહરણ અને દુષ્કર્મના ગુનામાં હતો જેલવાસ: વચગાળાના જામીન મેળવી થયો હતો ફરાર.
• ​ટેકનિકલ સર્વેલન્સ અને હ્યુમન સોર્સની મદદથી MP ના રતલામથી આરોપી નાંદુ ભીલની ધરપકડ.

ગુજરાતની વિવિધ જેલોમાંથી રજા પર છૂટ્યા બાદ પરત હાજર ન થઈ ફરાર થઈ જનારા કેદીઓને પકડવા માટે રાજ્યભરમાં પોલીસ કડક કાર્યવાહી કરી રહી છે. આ કડીમાં વડોદરા ક્રાઈમ બ્રાન્ચને મોટી સફળતા મળી છે. કચ્છના અંજાર પોલીસ સ્ટેશનમાં નોંધાયેલા સગીરા પર દુષ્કર્મના ગંભીર ગુનાનો આરોપી, જે છેલ્લા અઢી વર્ષથી પોલીસને થાપ આપી રહ્યો હતો, તેને મધ્યપ્રદેશના રતલામથી દબોચી લેવામાં આવ્યો છે.

મળતી માહિતી મુજબ, આરોપી નાંદુ ભુવન ભીલ (રહે. ચીકલીયા, જી. રતલામ, MP) વિરુદ્ધ વર્ષ 2019 માં અંજાર પોલીસ સ્ટેશનમાં સગીરાનું અપહરણ કરી તેની પર દુષ્કર્મ ગુજારવા બદલ પોક્સો (POCSO) એક્ટ હેઠળ ગુનો નોંધાયો હતો. આ ગુનામાં તે ગાંધીધામની ગળપાદર જેલમાં કાચા કામના કેદી તરીકે બંધ હતો.

🧐કેવી રીતે થયો હતો ફરાર?

ગઈ તારીખ 28 ઓગસ્ટ, 2023 ના રોજ આરોપી નાંદુ ભીલ 16 દિવસની વચગાળાની જામીન રજા પર જેલમાંથી મુક્ત થયો હતો. નિયમ મુજબ તેને સપ્ટેમ્બર મહિનામાં જેલમાં પરત હાજર થવાનું હતું, પરંતુ તે સમયમર્યાદા પૂરી થવા છતાં હાજર થયો ન હતો અને બારોબાર ફરાર થઈ ગયો હતો.

🚨ક્રાઈમ બ્રાન્ચનું ઓપરેશન:

વડોદરા ક્રાઈમ બ્રાન્ચના ઉચ્ચ અધિકારીઓની દોરવણી હેઠળ એક ખાસ ટીમ આ ફરાર કેદીની શોધમાં હતી. ટેકનિકલ સર્વેલન્સ અને હ્યુમન સોર્સ દ્વારા બાતમી મળી હતી કે આરોપી તેના વતન મધ્યપ્રદેશના ચીકલીયા ગામે છુપાયો છે.

• ક્રાઈમ બ્રાન્ચની ટીમે તાત્કાલિક મધ્યપ્રદેશ પહોંચી, ખાનગી રાહે વોચ ગોઠવી આરોપીને ઝડપી પાડ્યો હતો.
• છેલ્લા અઢી વર્ષથી નાસતા-ફરતા આ આરોપીને હસ્તગત કરી હવે ગાંધીધામની ગળપાદર જેલ હવાલે કરવાની તજવીજ હાથ ધરવામાં આવી છે.

👮વડોદરા ક્રાઈમ બ્રાન્ચની આ કામગીરીથી જેલમાંથી રજા મેળવી ગુનાહિત માનસ ધરાવતા કેદીઓમાં ફફડાટ વ્યાપી ગયો છે. પોલીસ હવે અન્ય ફરાર કેદીઓ સુધી પહોંચવા માટે પણ ચક્રો ગતિમાન કર્યા છે.