વડોદરા ક્રાઈમ બ્રાન્ચની મોટી સફળતા: સુરત અને રાજસ્થાનના ઘરફોડ ચોરીના ગુનામાં નાસતો ફરતો રીઢો ગુનેગાર ઝડપાયો

વડોદરા:શહેરના પોલીસ કમિશનર  નરસિમ્હા કોમાર અને અધિક પોલીસ કમિશનર ડૉ. લીના પાટીલની સૂચના હેઠળ, ક્રાઈમ બ્રાન્ચે મિલકત સંબંધી ગુનાઓમાં સંડોવાયેલા અને નાસતા ફરતા આરોપીઓને પકડવા માટે ખાસ ઝુંબેશ હાથ ધરી છે. આ અંતર્ગત વડોદરા ક્રાઈમ બ્રાન્ચની ટીમે બાતમીના આધારે એક રીઢા આરોપીને ઝડપી પાડવામાં સફળતા મેળવી છે.

🧐કઈ રીતે ઝડપાયો આરોપી?

ક્રાઈમ બ્રાન્ચના DCP  હિમાંશુ કુમાર વર્મા અને ઇન્ચાર્જ ACP ડી.જે. ચાવડાના માર્ગદર્શન હેઠળ પોલીસ ઇન્સ્પેક્ટર આર.જી. જાડેજા અને એચ.ડી. તુવરની ટીમ પેટ્રોલિંગમાં હતી. આ દરમિયાન PSI એ.જે. રાઠવા અને તેમની ટીમને બાતમી મળી હતી કે એક શંકાસ્પદ ઇસમ સયાજીપુરા તરફથી આજવા રોડ થઈને શહેર તરફ આવી રહ્યો છે. પોલીસે વોચ ગોઠવીને અજય ઉર્ફે રમેશભાઈ મારવાડી (ઉ.વ. ૨૬) ને ઝડપી લીધો હતો.

🚨સુરત અને રાજસ્થાનમાં હતી શોધ

​પકડાયેલા આરોપી અજય મારવાડીની પૂછપરછ અને તપાસમાં ચોંકાવનારી વિગતો સામે આવી છે:

• ​સુરત: અમરોલી પોલીસ સ્ટેશનમાં નોંધાયેલ ઘરફોડ ચોરીના ગંભીર ગુનામાં તે પોલીસને હંફાવી રહ્યો હતો.
• ​રાજસ્થાન: રાજસ્થાનના પાલી જિલ્લાના સાદડી પોલીસ સ્ટેશનમાં નોંધાયેલ ચોરીના ગુનામાં પણ તેની સંડોવણી બહાર આવી છે. વડોદરા પોલીસે આ બંને રાજ્યોની પોલીસને જાણ કરી આરોપીનો કબજો સોંપવાની તજવીજ હાથ ધરી છે.

✍️આરોપીનો ગુનાહિત ઇતિહાસ

ઝડપાયેલ અજય મારવાડી કોઈ સામાન્ય ગુનેગાર નથી, પરંતુ એક રીઢો આરોપી છે. તેની સામે અગાઉ વડોદરાના અલગ-અલગ પોલીસ સ્ટેશનોમાં કુલ ૦૭ જેટલા ગંભીર ગુનાઓ નોંધાયેલા છે, જેમાં:

• દુષ્કર્મ અને અપહરણ: સગીરાના અપહરણ અને દુષ્કર્મ (પોક્સો) નો ગુનો.
• લૂંટ અને ખંડણી: મકરપુરા અને લક્ષ્મીપુરામાં લૂંટ તથા ખંડણીના ગુના.
• ઘરફોડ ચોરી: બાપોદ પોલીસ સ્ટેશન વિસ્તારમાં અનેક ચોરીના ગુના.
• ​અન્ય: જુગાર ધારા અને ભારતીય ન્યાય સંહિતા (BNS) ની વિવિધ કલમો હેઠળના ગુનાઓ.

👮વડોદરા ક્રાઈમ બ્રાન્ચની આ કામગીરીથી રીઢા ગુનેગારોમાં ફફડાટ વ્યાપી ગયો છે. હાલમાં આરોપી સામે કાયદેસરની કાર્યવાહી કરી વધુ તપાસ અર્થે તેને સુરત પોલીસને સોંપવાની પ્રક્રિયા ચાલી રહી છે.