દિલ્હી પેલેટ ગન કેસમાં FIRની માંગ સાથે રાહુલ ગાંધીનું પોલીસ સ્ટેશન બહાર ધરણાં-ભાજપ નો પલટવાર ‘રાજકીય સ્ટંટ’

• રાહુલ ગાંધીના ધરણા: પેલેટ ગન કેસમાં એફઆઈઆર ન નોંધાવાને કારણે પોલીસ સ્ટેશન બહાર કોંગ્રેસ નેતાઓની નારાજગી.
• પીડિત સાહિલનો આક્ષેપ: પ્રદર્શન દરમિયાન પેલેટ ગનના હુમલાથી આંખની રોશની જોખમમાં હોવાનો દાવો.
• પોલીસની તપાસ: સમગ્ર મામલાની તપાસ ક્રાઈમ બ્રાન્ચ દ્વારા કરવામાં આવી રહી હોવાની જાણકારી.
• ન્યાયિક તપાસ: સુપ્રીમ કોર્ટ દ્વારા રચાયેલી પાંચ સભ્યોની સમિતિ હવે પેલેટ ગન અને આંદોલન દરમિયાનની હિંસાના સત્યની તપાસ કરશે.

દિલ્હી: રાજધાની દિલ્હીમાં વિરોધ પ્રદર્શન દરમિયાન પોલીસ દ્વારા પેલેટ ગનનો ઉપયોગ થયાના આક્ષેપો બાદ સમગ્ર મામલો રાજકીય રંગ પકડી રહ્યો છે. કોંગ્રેસ નેતા રાહુલ ગાંધી, પ્રિયંકા ગાંધી વાડ્રા અને અન્ય વરિષ્ઠ નેતાઓ દિલ્હીના સંસદ માર્ગ પોલીસ સ્ટેશન ખાતે DCP ઑફિસે પહોંચ્યા હતા. રાહુલ ગાંધી પોતાની સાથે પેલેટ ગનથી પીડિત યુવક સાહિલને પણ લાવ્યા હતા.

🧐શું છે સમગ્ર મામલો?

ગત ૨૦ જુલાઈના રોજ ‘કોકરોચ જનતા પાર્ટી’ દ્વારા સંસદ તરફ માર્ચ કાઢવામાં આવી હતી, જે દરમિયાન આંદોલનકારીઓ અને પોલીસ વચ્ચે હિંસક અથડામણ થઈ હતી. રાહુલ ગાંધીનો આક્ષેપ છે કે આ દરમિયાન શાંતિપૂર્ણ પ્રદર્શનકારી સાહિલ પર પેલેટ ગનથી હુમલો કરવામાં આવ્યો હતો, જેનાથી તેની આંખની રોશની જોખમમાં મુકાઈ છે. આટલી ગંભીર ઘટના છતાં પોલીસ દ્વારા એફઆઈઆર (FIR) ન નોંધાતા રાહુલ ગાંધી અને અન્ય કોંગ્રેસી નેતાઓ ધરણાં પર બેઠા હતા. બીજી તરફ ભાજપના આશિષ સૂદે આ પ્રદર્શનને માત્ર રાજકીય સ્ટંટ ગણાવ્યું છે.

⚖️સુપ્રીમ કોર્ટની દખલ:

આ સમગ્ર મામલે હવે સુપ્રીમ કોર્ટે પણ કડક વલણ અપનાવ્યું છે. કોર્ટે આ આંદોલન દરમિયાન પોલીસ દ્વારા થયેલી કથિત અતિશયોક્તિ અને પોલીસકર્મીઓ પર થયેલી હિંસાની નિષ્પક્ષ તપાસ કરવા માટે ૫ સભ્યોની ‘હાઇ પાવર્ડ એન્ક્વાયરી કમિટી’ (HPEC)ની રચના કરી છે. સુપ્રીમ કોર્ટના પૂર્વ જજ જસ્ટિસ આર. સુભાષ રેડ્ડીના અધ્યક્ષપદે રચાયેલી આ કમિટીમાં પૂર્વ DGP અને CBIના પૂર્વ નિયામક સહિતના નિષ્ણાતોનો સમાવેશ કરવામાં આવ્યો છે. આ કમિટી પોલીસ દ્વારા બળપ્રયોગ અને પ્રદર્શનકારીઓ દ્વારા થયેલી હિંસા, બંને પાસાઓની તપાસ કરશે.