વડોદરા SOGનો મોટો સપાટો: બાપોદના ગાંજા કેસમાં વોન્ટેડ મધ્યપ્રદેશના મોહન નીનામા સહિત 2 મુખ્ય સપ્લાયરો ઝડપાયા

• નશાના નેટવર્ક પર પ્રહાર: અગાઉ 10 કિલોથી વધુ દેશી ગાંજા અને હાઇબ્રિડ ગાંજા સાથે પકડાયેલા આરોપીના સપ્લાયરોને SOG એ દબોચ્યા.
• મધ્યપ્રદેશથી કનેક્શન: રતલામ જિલ્લાના ખારી ગામના મુખ્ય સપ્લાયર મોહન નીનામાની ધરપકડ.
• હાઇબ્રિડ ગાંજાનો સપ્લાયર પણ જેલભેગો: સમા રોડ પર ભાડાના મકાનમાં રહેતો જયેશ ઉર્ફે કાનો ચૌહાણ પણ સકંજામાં.
• કુલ ₹7.87 લાખનો મુદ્દામાલ: દેશી અને વનસ્પતિજન્ય હાઇબ્રિડ ગાંજાના રેકેટમાં અત્યાર સુધીમાં કુલ ૩ આરોપીઓ ગિરફ્તાર.

વડોદરા શહેરમાં કાયદો અને વ્યવસ્થાની પરિસ્થિતિ જાળવી રાખવા તેમજ નશીલા પદાર્થોના ખરીદ-વેચાણ અને હેરાફેરીના નેટવર્કને નેસ્તનાબૂદ કરવા માટે પોલીસ કમિશનર નરસિંહા કોમાર સાહેબ દ્વારા ‘નશામુક્ત વડોદરા’ અંતર્ગત કડક સૂચનાઓ આપવામાં આવી છે. જે અનુસંધાને એસ.ઓ.જી. (Special Operations Group) ની ટીમે બાપોદ પોલીસ સ્ટેશન વિસ્તારમાં નોંધાયેલા એન.ડી.પી.એસ. (NDPS) એક્ટના ગુનામાં વણઉકેલાયેલા 2 મુખ્ય સપ્લાયરોને શોધી કાઢી તેઓની ધરપકડ કરવામાં મોટી સફળતા મેળવી છે.

🧐13 મે ના રોજ ઝડપાયો હતો જથ્થો:

ઘટનાની વિગત એવી છે કે, ગત તા.13/05/2026 ના રોજ એસ.ઓ.જી.ના પી.એસ.આઈ. એ.આર. રબારીના અંગત બાતમીદાર થકી એક ચોક્કસ માહિતિ મળી હતી કે આજવા રોડ પર આવેલા એકતાનગર, આંબેડકરનગરના મરાઠીવાડમાં ગાંજાનું વેચાણ થઈ રહ્યું છે. બાતમીના આધારે પોલીસે દરોડો પાડીને રાણીતળાવ, પાણીગેટ વિસ્તારના આરોપી રીઝવાન યુસુફભાઈ દીવાનને ઝડપી પાડ્યો હતો. તેની પાસેથી 10 કિલો અને 090 ગ્રામ દેશી ગાંજો (કિંમત ₹5,04,500) તેમજ 22 ગ્રામ કિંમતી વનસ્પતિજન્ય હાઇબ્રિડ ગાંજો (કિંમત ₹77,000) મળી આવ્યો હતો. આ મામલે બાપોદ પોલીસ સ્ટેશનમાં ગુનો રજીસ્ટર કરી તપાસ હાથ ધરાઈ હતી.

👮SOG એ હ્યુમન સોર્સના આધારે વોન્ટેડ સપ્લાયરોને દબોચ્યા:

આ ગુનાની ઊંડાણપૂર્વકની તપાસ દરમિયાન સામે આવ્યું હતું કે રીઝવાન દીવાન આ નશીલા પદાર્થો અન્ય સપ્લાયરો પાસેથી મંગાવતો હતો. એસ.ઓ.જી.ની ટીમે ટેકનિકલ સોર્સ અને હ્યુમન ઇન્ટેલિજન્સના આધારે આ નેટવર્કના મૂળ સુધી પહોંચીને બંને વોન્ટેડ સપ્લાયરોની ધરપકડ કરી લીધી છે.

👉પકડાયેલા વોન્ટેડ આરોપીઓનાં નામ અને સરનામાં:

1. મોહન નાંદુ નીનામા (દેશી ગાંજાનો સપ્લાયર, રહે. ખારી ગામ, હાબલીયાખાડ ફળિયું, પોસ્ટ: પીપલખુન્ટા, થાના: બિલપાંક, જી. રતલામ, મધ્યપ્રદેશ) — ધરપકડ તા.17/05/2026

2. જયેશ ઉર્ફે કાનો નિતિનસિંહ ચૌહાણ (હાઇબ્રિડ ગાંજાનો સપ્લાયર, રહે. મકાન નં. એ/8, અંબાલાલ પ્રજાપતિનું ભાડાનું મકાન, સહયોગ સોસાયટી, રાધાનગરની બાજુમાં, સમા રોડ, વડોદરા) — ધરપકડ તા.18/05/2026

🚨તલસ્પર્શી તપાસ શરૂ:

વડોદરા શહેરમાંથી નાકોટીક્સના કારોબારને જડમૂળથી ઉખાડી ફેંકવા માટે એસ.ઓ.જી. દ્વારા આ કેસમાં અત્યાર સુધીમાં કુલ ₹7,87,100 ના મુદ્દામાલ સાથે કુલ 3 આરોપીઓની ધરપકડ કરવામાં આવી છે. આ નશાનો મસમોટો જથ્થો મધ્યપ્રદેશથી વડોદરા સુધી કેવી રીતે લાવવામાં આવતો હતો અને શહેરમાં અન્ય કયા પેડલરો આ નેટવર્કમાં સામેલ છે તે અંગે પોલીસ દ્વારા વધુ તપાસ અને પૂછપરછ હાથ ધરવામાં આવી છે.