વડોદરા SOGએ તરસાલીના શ્રી હરી અપાટમેન્ટમાંથી રૂા. 70,135 ના પોષડોડા સાથે બે શખ્સો ઝડપાયા

• પોષડોડાના જથ્થા સાથે ધરપકડ: તરસાલીના શ્રી હરી એપાર્ટમેન્ટમાંથી 4 કિલોથી વધુ પોષડોડા જપ્ત કરવામાં આવ્યા.
• બે શખ્સો ઝડપાયા: રાજસ્થાનના મૂળ વતની અને વડોદરામાં ભાડે રહેતા અનોપ બિશ્નોઈ અને મનોહર બિશ્નોઈ પકડાયા.
• આંતરરાજ્ય ડ્રગ્સ નેટવર્ક: મધ્યપ્રદેશના મંદસૌરથી રેલ્વે મારફતે માદક પદાર્થની હેરાફેરી કરવામાં આવતી હોવાનું ખુલ્યું.
• મુદ્દામાલ અને ગુનો દાખલ: પોલીસે કુલ રૂા. 70,135/- નો મુદ્દામાલ જપ્ત કરી મકરપુરા પોલીસ સ્ટેશનમાં ગુનો નોંધ્યો છે.

વડોદરા: વડોદરા શહેરમાં કાયદો અને વ્યવસ્થા જળવાઈ રહે અને નશીલા પદાર્થોના વેચાણ તથા હેરાફેરીને ડામી દેવા માટે પોલીસ કમિશનર નરસિમ્હા કોમારના માર્ગદર્શન હેઠળ એસ.ઓ.જી. (SOG) પોલીસ દ્વારા સઘન અભિયાન ચલાવવામાં આવી રહ્યું છે. આ જ ક્રમમાં SOG પોલીસ ઇન્સ્પેક્ટર બી.ડી. જીતીયાની ટીમે બાતમીના આધારે તરસાલી વિસ્તારમાં રેડ કરીને પ્રતિબંધિત પોષડોડાના જથ્થા સાથે બે શખ્સોને ઝડપી પાડવામાં મોટી સફળતા મેળવી છે.

🧐શું હતી બાતમી અને રેડની વિગતો?

પોલીસ સૂત્રોના જણાવ્યા અનુસાર, પેટ્રોલિંગ દરમિયાન SOG ના એ.એસ.આઈ. જયેન્દ્રસિંહ ભીમસિંહને ચોક્કસ બાતમી મળી હતી કે તરસાલી, ઉમા વિદ્યાલય પાસે આવેલા શ્રી હરી એપાર્ટમેન્ટના મકાન નં. એચ/301 માં રહેતો અનોપ બિશ્નોઈ તેના સાળા મનોહર બિશ્નોઈ સાથે મધ્યપ્રદેશના મંદસૌરથી પોષડોડાનો માલ લાવ્યો છે અને પોતાના મકાનમાં સંતાડીને રાખ્યો છે.

આ બાતમીના આધારે પોલીસે એન.ડી.પી.એસ. એક્ટની જોગવાઈઓ મુજબ દરોડો પાડતા આરોપીઓ (1) અનોપકુમાર મોહનલાલ બિશ્નોઈ અને (2) મનોહરલાલ ઉકારામ બિશ્નોઈ હાજર મળી આવ્યા હતા. મકાનની ઝડતી તપાસ કરતા ત્યાંથી 4 કિલો 009 ગ્રામ વજનનો માદક પદાર્થ પોષડોડા (કિંમત રૂા. 60,135/-) મળી આવ્યો હતો.

🚨આંતરરાજ્ય હેરાફેરીનો પર્દાફાશ:

તપાસમાં ખુલાસો થયો છે કે બંને આરોપીઓ ગત 5 ઓગસ્ટના રોજ રેલ્વે માર્ગે મધ્યપ્રદેશના મંદસૌર ગયા હતા અને વગર પાસ-પરમિટ કે લાયસન્સે પોષડોડાનો જથ્થો ખરીદીને તા. 7 ઓગસ્ટના રોજ વડોદરા પરત આવ્યા હતા. આ જથ્થો છૂટક વેચાણ કરવા માટે ઘરમાં સંતાડીને આંતરરાજ્ય હેરાફેરી આચરવામાં આવી હતી.

👮આરોપીઓ પાસેથી કબ્જે કરાયેલો મુદ્દામાલ:

1. માદક પદાર્થ પોષડોડાનો જથ્થો (વજન 4 કિલો 009 ગ્રામ, કિંમત રૂા. 60,135/-)

2. મોબાઇલ ફોન નંગ-02 (કિંમત રૂા. 10,000/-)

આ તમામ મળીને કુલ રૂા. 70,135/- નો મુદ્દામાલ પોલીસે કબજે કર્યો છે. આ મામલે પકડાયેલ આરોપીઓ તથા મધ્યપ્રદેશના સપ્લાયર ગોવિંદ વિરુદ્ધ મકરપુરા પોલીસ સ્ટેશનમાં NDPS એક્ટની કલમ 8(સી), 15(બી) અને 29 મુજબ ગુનો નોંધીને આગળની કાયદેસરની કાર્યવાહી હાથ ધરવામાં આવી છે.