વડોદરા: ક્રાઈમ બ્રાન્ચનો સપાટો; 10 વાહન ચોરીમાં પકડાયેલો અને ‘પાસા’ હેઠળ જેલ ભોગવી ચૂકેલો રીઢો તસ્કર અનિલ મહીડા ફરી ઝડપાયો

• 7 ગુનાઓ ડીટેક્ટ: ગોરવા, બાપોદ, ફતેહગંજ, માંજલપુર અને સમા પોલીસ સ્ટેશનના વાહન તેમજ ગેસ સિલિન્ડર ચોરીના ગુનાઓનો ભેદ ઉકેલાયો.
• પોલો ગ્રાઉન્ડ પાસેથી ધરપકડ: એક્ટિવા પર ચોરીનો ગેસ સિલિન્ડર લઈને પસાર થતા અનિલ મહીડાને પોલીસે રંગેહાથ દબોચ્યો.
• મુદ્દામાલ જપ્ત: 2 કાળા કલરની હોન્ડા એક્ટિવા, ઈન્ડેન કંપનીના ૫ ગેસ સિલિન્ડર અને મોબાઈલ સહિત કુલ ₹66,000નો માલ કબજે.
• ચોરીની મોડસ ઓપરેન્ડી: સોસાયટીઓ અને મકાનોના કમ્પાઉન્ડમાં રાખેલા રાંધણ ગેસના બોટલોને નિશાન બનાવતો હતો શાતિર ચોર.

વડોદરા શહેરમાં દિન-પ્રતિદિન બનતા વાહન ચોરીના ગુનાઓ અટકાવવાની અને વાહન ચોરી કરનાર રીઢા ગુનેગારોને ઝડપી પાડવાની પોલીસ કમિશનરની સૂચના હેઠળ ક્રાઈમ બ્રાન્ચની ટીમો સતત પ્રયત્નશીલ હતી. આ દરમિયાન ક્રાઈમ બ્રાન્ચને પેટ્રોલીંગ દરમિયાન વડોદરાના એક રીઢા વાહન ચોરને ચોરીની એક્ટિવા અને મકાનોમાંથી ચોરેલા ગેસના સિલિન્ડરો સાથે ઝડપી પાડવામાં મોટી સફળતા મળી છે.

🚨પોલો ગ્રાઉન્ડ પાસે ગોઠવી વોચ:

ક્રાઈમ બ્રાન્ચની ટીમ જ્યારે શહેર વિસ્તારમાં પેટ્રોલીંગમાં હતી, ત્યારે મળેલી ચોક્કસ માહીતીના આધારે પોલીસે પોલો ગ્રાઉન્ડના ગેટ પાસે વોચ ગોઠવી હતી. આ દરમિયાન એક ઇસમ એક્ટિવા પર ગેસનો બોટલ લઈને પસાર થઈ રહ્યો હતો, જેને પોલીસે રોકીને પૂછપરછ કરી હતી. તપાસ કરતા જાણવા મળ્યું હતું કે આ ઇસમ અગાઉ વાહન ચોરીના અનેક ગુનામાં પકડાઈ ચૂક્યો છે. પોલીસે તેની પાસે એક્ટિવા અને ગેસના સિલિન્ડરના બિલ કે આધાર-પુરાવા માંગતા તે રજૂ કરી શક્યો નહોતો.

🧐ઝડપાયેલ આરોપીનું નામ:

• અનિલ દેવજીભાઈ મહીડા (રહે. જાનકીધામ સોસાયટી, સમા કેનાલ રોડ, છાણી, વડોદરા).

🗣️એક માસમાં આચરેલા 7 ગુનાઓની કબૂલાત:

પોલીસે આરોપી અનિલ મહીડાની કડક અને સઘન પૂછપરછ કરતા તેણે આર્થિક ફાયદા માટે છેલ્લા એક માસ દરમિયાન વડોદરા શહેરના જુદા-જુદા વિસ્તારોમાંથી 3 ટુ-વ્હીલર (એક્ટિવા-2 અને જ્યુપીટર-1) ની ચોરી કરી હોવાની કબૂલાત કરી હતી. આ ઉપરાંત, તેણે સમા, માંજલપુર અને ફતેહગંજ વિસ્તારમાં મકાનોના કમ્પાઉન્ડમાં રાખેલા ઈન્ડેન કંપનીના કુલ 5 ગેસના બોટલ (સિલિન્ડર) ચોરી કર્યા હોવાનું પણ સ્વીકાર્યું હતું.

💰કબજે કરેલ મુદ્દામાલ (કુલ કિંમત ₹66,000):

1. કાળા કલરની હોન્ડા એક્ટિવા મોપેડ — કિંમત ₹25,000

2. કાળા કલરની હોન્ડા એક્ટિવા મોપેડ — કિંમત ₹20,000

3. ઈન્ડેન ગેસ બોટલ (સિલિન્ડર) કુલ નંગ-5 — કિંમત ₹20,000

4. ઓપ્પો કંપનીનો મોબાઈલ ફોન — કિંમત ₹1,000

👮કયા-કયા પોલીસ સ્ટેશનના ગુના ઉકેલાયા?

આરોપીની ધરપકડથી વડોદરા શહેરના કુલ 7 અનડીટેક્ટ ગુનાઓનો ભેદ ઉકેલાયો છે:

• ગોરવા પોલીસ સ્ટેશન: 1 ગુનો (એક્ટિવા ચોરી).
• બાપોદ પોલીસ સ્ટેશન: 1 ગુનો (એક્ટિવા ચોરી).
• ફતેહગંજ પોલીસ સ્ટેશન: કુલ 2 ગુના (1 જ્યુપીટર ચોરી અને 1 ગેસ સિલિન્ડર ચોરી).
• માંજલપુર પોલીસ સ્ટેશન: 1 ગુનો (ગેસ સિલિન્ડર ચોરી).
• સમા પોલીસ સ્ટેશન: 2 નોન-કોગ્નિઝેબલ (NC) ગુના (ગેસ સિલિન્ડર ચોરી).

👉અગાઉ 10 ગુનાનો ઈતિહાસ અને રાજકોટ જેલમાં પાસા:

પકડાયેલો આરોપી અનિલ મહીડા રીઢો અને રીપીટર ગુનેગાર છે. તે અગાઉ વડોદરા શહેરના સયાજીગંજ, હરણી, માંજલપુર, ફતેહગંજ અને વારસીયા પોલીસ સ્ટેશનમાં કુલ 10 જેટલા વાહન ચોરીના ગુનાઓમાં પકડાઈ ચૂક્યો છે. આ અગાઉ તેની સતત ગુનાહિત પ્રવૃત્તિઓને કારણે તેને ‘પાસા’ (PASA) હેઠળ રાજકોટ જેલમાં પણ મોકલવામાં આવ્યો હતો.

​ક્રાઈમ બ્રાન્ચે તમામ મુદ્દામાલ કબજે કરી આગળની કાયદેસરની તપાસ અને કાર્યવાહી માટે આરોપી તેમજ મુદ્દામાલને સંબંધિત પોલીસ સ્ટેશનોને સોંપવાની તજવીજ હાથ ધરી છે.