વડોદરા: ₹53 લાખના દારૂના ગુનામાં 3 મહિનાથી ફરાર આરોપી રાજ પટણીને ક્રાઈમ બ્રાન્ચે દબોચ્યો

• ક્રાઈમ બ્રાન્ચનો સપાટો: કોયલી ગામના મસમોટા વિદેશી દારૂના કૌભાંડમાં વોન્ટેડ આરોપી ઝડપાયો.
• મોટી કાર્યવાહી: તા. 02/02/2026ના રોજ ઝડપાયેલા ₹53.36 લાખના મુદ્દામાલના ગુનામાં આરોપીની હતી સંડોવણી.
• બાતમીના આધારે ધરપકડ: ડીલક્સ સોસાયટી પાસેની સર્વોદય સોસાયટીમાંથી આરોપીને શંકાસ્પદ હાલતમાં ઝડપી લેવાયો.
• ગુનાહિત ઈતિહાસ: પકડાયેલ રાજ પટણી અગાઉ રાયોટિંગ અને બનાસકાંઠામાં દારૂના ગુનામાં પણ પકડાઈ ચૂક્યો છે.

વડોદરા શહેરમાં પ્રોહિબિશનની પ્રવૃત્તિઓ નાબૂદ કરવા અને નાસતા-ફરતા આરોપીઓને શોધી કાઢવા માટે પોલીસ કમિશનર નરસિંહા કોમારની સૂચના હેઠળ ક્રાઈમ બ્રાન્ચે એક મોટી સફળતા મેળવી છે. જવાહરનગર પોલીસ સ્ટેશનની હદમાં ગત ફેબ્રુઆરી માસમાં પકડાયેલા કરોડોના વિદેશી દારૂના જથ્થાના ગુનામાં વોન્ટેડ આરોપી રાજ પટણીની ક્રાઈમ બ્રાન્ચે ધરપકડ કરી છે.

​ઘટનાની વિગત:

ક્રાઈમ બ્રાન્ચની ટીમ શહેર વિસ્તારમાં પેટ્રોલિંગમાં હતી, તે દરમિયાન સચોટ બાતમી મળી હતી કે જવાહરનગર પોલીસ સ્ટેશનના પ્રોહિબિશનના ગુનામાં નાસતો-ફરતો આરોપી ડીલક્સ સોસાયટી પાસે આવેલ સર્વોદય સોસાયટી નજીક ઉભો છે. પોલીસે વોચ ગોઠવી રાજ ધર્મેન્દ્રભાઈ પટણી (રહે. લક્ષ્મી ફ્લેટ, વાડી રંગમહાલ) ને ઝડપી પાડ્યો હતો. તેની પૂછપરછમાં જાણવા મળ્યું હતું કે તે છેલ્લા ત્રણ મહિનાથી પોતાની ધરપકડ ટાળવા નાસતો-ફરતો હતો.

🚨જવાહરનગરનો ₹53 લાખનો ગુનો:

ગત તા. 02/02/2026ના રોજ જવાહરનગર પોલીસે કોયલી ગામના ટી.પી. રોડ પર રેડ કરી હતી. આ રેડ દરમિયાન પોલીસને ₹38.21 લાખની કિંમતની વિદેશી દારૂની 1949 નંગ બોટલો મળી આવી હતી. આ ઉપરાંત વાહનો અને રોકડ રકમ મળી કુલ ₹53,36,100નો મુદ્દામાલ જપ્ત કરવામાં આવ્યો હતો. આ કેસમાં કુલ 19 આરોપીઓ સામે ગુનો નોંધાયો હતો, જે પૈકી રાજ પટણી વોન્ટેડ હતો.

👮અગાઉના ગુના:

ઝડપાયેલ આરોપી રાજ પટણી રીઢો ગુનેગાર હોવાનું સામે આવ્યું છે. તે અગાઉ વર્ષ 2015માં વાડી પોલીસ સ્ટેશનમાં રાયોટિંગના ગુનામાં અને વર્ષ 2025માં બનાસકાંઠા જિલ્લાના ધાનેરા પોલીસ સ્ટેશનમાં ફોર-વ્હીલર ગાડીમાં વિદેશી દારૂના જથ્થા સાથે પકડાયો હોવાનો રેકોર્ડ ધરાવે છે.

ક્રાઈમ બ્રાન્ચે આરોપીની અટકાયત કરી આગળની તપાસ માટે તેને જવાહરનગર પોલીસ સ્ટેશનને સોંપવાની તજવીજ હાથ ધરી છે.