વડોદરાઃ RTO કચેરીમાં બોમ્બની ધમકીથી હડકંપ; બોમ્બ સ્ક્વોડ અને ડોગ સ્ક્વોડ ત્રાટક્યા, સેંકડો અરજદારોના જીવ અધ્ધર

• RTO માં બોમ્બનો ફફડાટ: અજાણ્યા શખ્સના ઈમેલથી વડોદરા પોલીસ બેડામાં દોડધામ; કચેરીને ‘ઝેરી બોમ્બ’ થી ઉડાવી દેવાની અપાઈ ધમકી.
• તાત્કાલિક ખાલી કરાવાઈ કચેરી: સેંકડો અરજદારો અને કર્મચારીઓને સુરક્ષિત સ્થળે ખસેડાયા; RTO ના તમામ પ્રવેશદ્વારો સીલ.
• સઘન સર્ચ ઓપરેશન: BDDS અને ડોગ સ્ક્વોડ દ્વારા ખૂણેખૂણાની તપાસ; પાર્કિંગમાં ઉભેલા વાહનોનું પણ કરાયું ચેકિંગ.
• સાયબર ક્રાઈમ એક્શનમાં: ધમકીભર્યા મેઈલનું IP એડ્રેસ ટ્રેસ કરવાની કામગીરી શરૂ; અગાઉ અમદાવાદ બાદ હવે વડોદરા નિશાન પર.

વડોદરા: વડોદરા શહેરની પ્રાદેશિક પરિવહન કચેરી (RTO) માં આજે બપોરે તે સમયે ભારે નાસભાગ મચી ગઈ જ્યારે કચેરીના સત્તાવાર ઈમેલ આઈડી પર એક ધમકીભર્યો સંદેશો મળ્યો. ઈમેલમાં દાવો કરવામાં આવ્યો હતો કે બપોરના સમયે કચેરીમાં ‘ઝેરી બોમ્બ’ બ્લાસ્ટ કરવામાં આવશે. આ મેઈલ મળતા જ RTO તંત્ર અને પોલીસ તંત્ર હરકતમાં આવી ગયું હતું.

💣સુરક્ષા એજન્સીઓનો કાફલો ઉતારાયો:

ધમકીની ગંભીરતાને ધ્યાને રાખીને પોલીસ કંટ્રોલ રૂમને જાણ કરવામાં આવી હતી. મિનિટોમાં જ સ્થાનિક પોલીસની સાથે બોમ્બ ડિટેક્શન એન્ડ ડિસ્પોઝલ સ્ક્વોડ (BDDS) અને ડોગ સ્ક્વોડની ટીમો RTO કચેરી પહોંચી ગઈ હતી. સાવચેતીના ભાગરૂપે કચેરીમાં કામકાજ અટકાવી દેવામાં આવ્યું હતું અને ત્યાં હાજર તમામ અધિકારીઓ, કર્મચારીઓ તેમજ સેંકડો અરજદારોને તાત્કાલિક બહાર કાઢવામાં આવ્યા હતા.

🚨ખૂણેખૂણાની તપાસ:

હાલમાં પોલીસ દ્વારા સમગ્ર RTO સંકુલને કોર્ડન કરી લેવામાં આવ્યું છે. પોલીસની ટીમો કચેરીની અંદર, સર્વર રૂમ, રેકોર્ડ રૂમ તેમજ બહાર પાર્કિંગમાં ઉભેલા વાહનોની સઘન તપાસ કરી રહી છે. કોઈ પણ શંકાસ્પદ વસ્તુ કે બેગ જણાય તો તેની પ્રોટોકોલ મુજબ તપાસ કરવામાં આવી રહી છે.

📧સાયબર એક્સપર્ટ્સ દ્વારા તપાસ:

પોલીસ કમિશનરના આદેશથી સાયબર ક્રાઈમની ટીમ પણ આ તપાસમાં જોડાઈ છે. જે ઈમેલ આઈડી પરથી આ ધમકી મોકલવામાં આવી છે તેનું લોકેશન અને આઈપી એડ્રેસ ટ્રેસ કરવામાં આવી રહ્યું છે. જોકે પ્રાથમિક દ્રષ્ટિએ આ કોઈની ગંભીર મજાક (Hoax Call/Email) હોવાનું મનાઈ રહ્યું છે, પરંતુ સુરક્ષા એજન્સીઓ કોઈ પણ પ્રકારનું જોખમ લેવા માંગતી નથી.

🫵અમદાવાદમાં પણ RTO માં mail મળ્યો હતો આજે તેના બાદ , વડોદરાની સરકારી કચેરીઓને નિશાન બનાવવાનો આ પ્રયાસ ચિંતાનો વિષય છે. શું આ મેઈલ પાછળ કોઈ મોટી સાઝિશ છે કે કોઈની ખોટી મજાક? તે તપાસ બાદ જ સ્પષ્ટ થશે.