વડોદરા: ₹4.92 કરોડની મસમોટી ઠગાઈના ગુનામાં 1 વર્ષથી નાસતો-ફરતો રીઢો આરોપી યુનુસ ઉર્ફે દાતરો પાદરાના સાંગમા ગામેથી ઝડપાયો

• વર્ષ 2025નો મોટો ગુનો ડીટેક્ટ: જે.પી.રોડ પોલીસ સ્ટેશનમાં નોંધાયેલી કરોડોની છેતરપિંડીમાં વોન્ટેડ આરોપી આખરે પોલીસ સકંજામાં.
• નામદાર કોર્ટે જાહેર કર્યો હતો નાસતો-ફરતો: ધરપકડ ટાળવા ભાગતા ફરતા આરોપી સામે અગાઉ કોર્ટે ઇશ્યુ કર્યું હતું ધરપકડ વોરંટ.
• પાદરાના સાંગમા ગામેથી દબોચ્યો: ટેકનિકલ અને હ્યુમન સોર્સના આધારે ક્રાઈમ બ્રાન્ચે ખેતરમાંથી શોધી કાઢ્યો.
• 7 ગુનાનો ગુનાહિત ઇતિહાસ: અગાઉ છેતરપિંડી, ઘરફોડ ચોરી અને પ્રોહિબિશન સહિતના 7 ગંભીર ગુનાઓમાં સંડોવાયેલો છે આરોપી.

વડોદરા શહેરમાં આર્થિક ગુનાઓ અને મોટી ઠગાઈ આચરીને કાયદાની પકડથી ભાગતા ફરતા તત્વોને ઝડપી પાડવા માટે માનનીય પોલીસ કમિશનર અને ઉચ્ચ પોલીસ અધિકારીઓ દ્વારા ક્રાઈમ બ્રાન્ચને ખાસ સૂચનાઓ આપવામાં આવી છે. જે અંતર્ગત ક્રાઈમ બ્રાન્ચની ટીમો સતત વોન્ટેડ આરોપીઓની શોધખોળમાં હતી. આ દરમિયાન જે.પી.રોડ પોલીસ સ્ટેશનમાં નોંધાયેલા ₹4.92 કરોડથી વધુની મસમોટી ઠગાઈના ગુનામાં છેલ્લા એક વર્ષથી પોલીસને થાપ આપીને નાસતા-ફરતા રીઢા આરોપીને ઝડપી પાડવામાં વડોદરા ક્રાઈમ બ્રાન્ચને મોટી સફળતા મળી છે.

❓શું હતો સમગ્ર ગુનો?

વર્ષ 2025માં જે.પી.રોડ પોલીસ સ્ટેશનમાં કરોડો રૂપિયાની છેતરપિંડીની એક ફરિયાદ નોંધાઈ હતી. જેમાં આરોપીઓએ ફરિયાદીને સસ્તું સોનું અપાવવાની લાલચ આપી હતી, તેમજ ₹10 કરોડની મોટી લોન મંજૂર કરાવી આપવાના બહાને કમિશન પેટે એડવાન્સ રૂપિયા પડાવી લીધા હતા. આરોપીઓએ ભેગા મળીને ફરિયાદી પાસેથી કુલ ₹4,92,50,0પ00/- (ચાર કરોડ બાણું લાખ પચાસ હજાર) ની માતબર રકમ પડાવી લઈ મોટું આર્થિક કૌભાંડ આચર્યું હતું. આ અંગે જે.પી.રોડ પોલીસ મથકે BNS કલમ 316(2), 316(5), 318(4), 61(2), 204, 3(5), 319, 336(3), 338, 340(2), 341(1) મુજબ ગુનો નોંધી આગળની તપાસ હાથ ધરાઈ હતી.

🚨કોર્ટમાંથી વોરંટ નીકળ્યું હતું:

આ ગુનામાં સંડોવાયેલા અન્ય આરોપીઓની ધરપકડ થઈ ચૂકી હતી, પરંતુ મુખ્ય સાગરીતો પૈકીનો એક એવો ફતેહગંજનો યુનુસ ઉર્ફે દાતરો પોતાની ધરપકડ ટાળવા માટે સતત આશ્રય સ્થાનો બદલીને નાસતો-ફરતો હતો. લાંબા સમય સુધી તે હાથ ન આવતા આખરે નામદાર કોર્ટ દ્વારા તેની સામે ધરપકડનું વોરંટ ઇશ્યુ કરવામાં આવ્યું હતું અને તેને કાયદેસર રીતે નાસતો-ફરતો જાહેર કરવામાં આવ્યો હતો.

🧐પાદરાના ખેતરમાંથી ઝડપાયો આરોપી:

ક્રાઈમ બ્રાન્ચની ટીમ આ રીઢા આરોપીને પકડવા માટે હ્યુમન ઇન્ટેલિજન્સ અને ટેકનિકલ સર્વેલન્સની મદદથી સતત નજર રાખી રહી હતી. આ દરમિયાન પોલીસને પાકી બાતમી મળી હતી કે આરોપી વડોદરા ગ્રામ્યના પાદરા તાલુકા પાસે આવેલા સાંગમા ગામના એક ખેતરમાં છુપાયેલો છે. બાતમીના આધારે ક્રાઈમ બ્રાન્ચે ઓપરેશન પાર પાડીને આરોપીને સકંજામાં લીધો હતો.

👉ઝડપાયેલા આરોપીનું નામ અને સરનામું:

• યુનુસ ઉર્ફે દાતરો ઉર્ફે લાલાભાઇ છોટુમિયાં મિર્ઝા (ઉં.વ. 50, રહે. નવરંગ એપાર્ટમેન્ટ, એમ્પરર બિલ્ડિંગ પાસે, ફતેહગંજ, વડોદરા).

🚨અગાઉના 7 ગંભીર ગુનાઓનો રેકોર્ડ:

પકડાયેલો આરોપી યુનુસ ઉર્ફે દાતરો કોઈ સાધારણ ગુનેગાર નથી, પરંતુ ગુનાહિત ઇતિહાસ ધરાવતો રીઢો અસામાજિક તત્વ છે. તેની સામે અગાઉ વડોદરાના અલગ-અલગ પોલીસ સ્ટેશનોમાં છેતરપિંડી, વિશ્વાસઘાત અને ઘરફોડ ચોરી સહિતના કુલ 7 ગુનાઓ નોંધાઈ ચૂક્યા છે:

1. કારેલીબાગ પો.સ્ટે. — ઘરફોડ ચોરી (IPC 457, 380, 114) [વર્ષ 2006]

2. કારેલીબાગ પો.સ્ટે. — ઘરફોડ ચોરી (IPC 457, 380, 114) [વર્ષ 2008]

3. સયાજીગંજ પો.સ્ટે. — પ્રોહિબિશન (નશાબંધી કલમો) [વર્ષ 2008]

4. સયાજીગંજ પો.સ્ટે. — ઠગાઈ અને વેશપલટો (IPC 406, 420, 170, 419) [વર્ષ 2013]

5. પાણીગેટ પો.સ્ટે. — છેતરપિંડી અને વિશ્વાસઘાત (IPC 406, 420) [વર્ષ 2015]

6. સયાજીગંજ પો.સ્ટે. — મોટર વહીકલ એક્ટના ગુના [વર્ષ 2016]

7. ડી.સી.બી. (ક્રાઈમ બ્રાન્ચ) — ખંડણી, છેતરપિંડી, કાવતરું અને ધમકી (IPC 406, 420, 386, 323, 506(2) વગેરે) [વર્ષ 2022]

​ક્રાઈમ બ્રાન્ચ દ્વારા હાલમાં આ આરોપીની અટકાયત કરવામાં આવી છે અને છેતરપિંડીના કરોડો રૂપિયા ક્યાં સગેવગે કર્યા છે તેમજ આ નેટવર્કમાં અન્ય કોણ સામેલ છે, તે તમામ રહસ્યો પરથી પડદો ઉઠાવવા માટે આરોપીને નામદાર કોર્ટમાં રજૂ કરી પોલીસ કસ્ટડીના રિમાન્ડ મેળવવાની તજવીજ હાથ ધરવામાં આવી છે.