ટ્રેનના કોચ એટેન્ડેન્ટ અન્ય રાજ્ય માંથી શરાબ વેચવા વડોદરા લાવ્યા,PCBએ પકડી પાડ્યા

વડોદરા શહેર પીસીબી શાખા દ્વારા વિદેશી શરાબના જત્થા સાથે ટ્રેનના બે કોચ એટેન્ડેંટને ઝડપી પાડીને 1 લાખ ઉપરાંતનો મુદ્દામાલ જપ્ત કર્યો હતો.

પ્રાપ્ત માહિતી અનુસાર રેલ્વે વિભાગની વિવિધ ટ્રેનોમાં કોન્ટ્રાક્ટ પર કોચ એટેન્ડેંટ તરીકે નોકરી કરતા બે વ્યક્તિઓ અન્ય રાજ્ય માંથી શરાબનો જથ્થો ટ્રેન મારફતે લાવીને વડોદરામાં વેચાણ કરવા માટે ફરી રહ્યા છે. હાલ પ્રતાપનગર નજીક ઝેનીથ સ્કુલ પાસે વિવિધ થેલામાં શરાબ લઈને ઉભા છે. જે બાતમીના આધારે પીસીબીની ટીમે દરોડો પાડતા નરેન્દ્ર જયંતીભાઈ ગોહિલ રહે. સોજીત્રા ગામ આણંદ તેમજ અજય જગદીશભાઈ પટેલ રહે. ઇન્દોર મધ્યપ્રદેશની ધરપકડ કરી હતી.

પોલીસે તેઓની પાસેથી વિવિધ મોંઘી બ્રાન્ડની 51 જેટલી શરાબની બોટલો કબજે કરી હતી. જયારે શરાબની ડીલીવરી લેવા આવનાર નડિયાદના ગૌતમ પટેલ તેમજ અમદાવાદના સંજુ નામના શખ્સને વોન્ટેડ જાહેર કર્યો છે.