સુરેન્દ્રનગરના ફાઇનાન્સ કંપનીને ₹13 લાખનો ચૂનો લગાવનાર આરોપી વડોદરા ક્રાઇમ બ્રાન્ચના સકંજામાં

• ક્રાઇમ બ્રાન્ચ એક્શન મોડમાં: કોઠી કચેરી ચાર રસ્તા પાસેથી શંકાસ્પદ હાલતમાં ચંદુ બાવળીયા નામના ઇસમને દબોચી લેવાયો.
• હાઇટેક છેતરપિંડી: ફાઇનાન્સ કંપનીની ₹13 લાખની લોન ન ભરી ખોટી NOC અને ફોર્મ બનાવી ટ્રક ટ્રાન્સફર કરી નાખવાનો આરોપ.
• અપહરણનો ગુનો: પકડાયેલ આરોપી વાઘોડિયા પોલીસ સ્ટેશનમાં નોંધાયેલ અપહરણ અને મારપીટના ગુનામાં પણ હતો સંડોવાયેલો.
• પોલીસ કાર્યવાહી: ધરપકડ ટાળવા નાસતા-ફરતા આરોપીને ઝડપી પાડી સુરેન્દ્રનગરના જોરાવરનગર પોલીસને સોંપવાની તજવીજ.

વડોદરા: વડોદરા શહેર ક્રાઇમ બ્રાન્ચની ટીમે મિલકત સંબંધી ગુનાઓ અને નાસતા-ફરતા આરોપીઓને પકડવાની ઝુંબેશ અંતર્ગત એક મોટી સફળતા મેળવી છે. સુરેન્દ્રનગર જિલ્લાના જોરાવરનગર પોલીસ સ્ટેશનમાં ₹13 લાખની છેતરપિંડીના ગુનામાં નાસતા-ફરતા મુખ્ય આરોપીને રાવપુરા વિસ્તારમાંથી દબોચી લેવામાં આવ્યો છે.

🧐ઝડપાયેલ આરોપી અને ગુનાની વિગત:

ક્રાઇમ બ્રાન્ચની ટીમે શહેરના કોઠી કચેરી ચાર રસ્તા પાસે પેટ્રોલિંગ દરમિયાન બાતમીના આધારે ચંદુભાઈ શામજીભાઈ બાવળીયા (રહે. સાણંદ, મૂળ રહે. લીંબડી) ને શંકાસ્પદ હાલતમાં ઝડપી લીધો હતો. પ્રાથમિક પૂછપરછમાં બહાર આવ્યું હતું કે, આ આરોપીએ વઢવાણ સ્થિત શ્રીરામ ફાઇનાન્સ કંપનીમાંથી અશોક લેલેન્ડ ટ્રક પર ₹13,00,000 (તેર લાખ) ની લોન લીધી હતી. લોનના હપ્તા ભરપાઈ કર્યા વગર, આરોપીએ ટ્રકની ખોટી NOC અને 35 નંબરનું બનાવટી ફોર્મ તૈયાર કરી સુરેન્દ્રનગર આરટીઓ કચેરીમાં રજૂ કર્યું હતું અને અન્ય આરોપીને ટ્રક ટ્રાન્સફર કરી ફાઇનાન્સ કંપની સાથે વિશ્વાસઘાત અને છેતરપિંડી કરી હતી.

🚨ગુનાહિત ઇતિહાસ:

પકડાયેલ આરોપી માત્ર છેતરપિંડી જ નહીં, પરંતુ ગંભીર ગુનાહિત ઇતિહાસ પણ ધરાવે છે. તપાસ દરમિયાન ખુલાસો થયો હતો કે, આરોપી ચંદુ બાવળીયા સામે વડોદરા ગ્રામ્યના વાઘોડિયા પોલીસ સ્ટેશનમાં પણ અપહરણ, મારપીટ અને ધાકધમકી આપવા અંગેનો ગુનો નોંધાયેલો છે. આ ગુનામાં તેણે નાણાંની લાલચમાં એક વ્યક્તિનું અપહરણ કરી તેને ગોંધી રાખી માર માર્યો હતો.

👮આગળની કાર્યવાહી:

વડોદરા ક્રાઇમ બ્રાન્ચે આ આરોપીની ધરપકડ કરી કાયદેસરની કાર્યવાહી પૂર્ણ કરી છે અને વધુ તપાસ માટે તેને સુરેન્દ્રનગરના જોરાવરનગર પોલીસ સ્ટેશનને સોંપવાની તજવીજ હાથ ધરી છે. નાસતા-ફરતા આરોપીની ધરપકડથી છેતરપિંડી અને અપહરણના બે મહત્વના ગુનાઓનો ભેદ ઉકેલાઈ ગયો છે.

શાતિર ગુનેગારો ગમે તેટલા વેગળા રહે પણ વડોદરા પોલીસની નજરથી બચવું મુશ્કેલ છે.