શહેરમાં માંજલપુર વિધાનસભા બન્યું કચરાનું કેન્દ્ર! છ મહિનાથી જાંબુવા લેન્ડફિલ સાઇટ પર કામ બંધ

વડોદરાના નાગરિકો ટેક્સ ચૂકવે છે તો બદલામાં તેમને સ્વચ્છ અને સ્વસ્થ વડોદરા મળે — એ તંત્રની ફરજ છે.

• લોકોની માંગ છે કે,શહેરના ચારેય ઝોન માટે અલગ લેન્ડફિલ સાઇટ બનાવવી જોઈએ.
• સાઇટ પર રોજનું કચરું યોગ્ય રીતે પ્રોસેસ થાય તે માટે તાત્કાલિક પગલા લેવાં જોઈએ.

શહેરના માંજલપુર વિધાનસભા વિસ્તારમાં આવેલી જાંબુવા લેન્ડ ફીલિંગ સાઇટ પર છેલ્લા છ મહિનાથી કોઈપણ પ્રકારનું પ્રોસેસિંગ કામ બંધ પડ્યું છે, જેના કારણે કચરાનો ઢગલો દિવસેને દિવસે વધતો જ રહ્યો છે.

એક બાજુ વડોદરા શહેરમાં રોજનો કચરાનો જનરેશન 5000 ટનથી વધુ છે, જ્યારે પ્રોસેસિંગની ક્ષમતા માત્ર 1200 ટન પ્રતિદિન સુધી સીમિત છે. છેલ્લા છ મહિનાથી એ પણ બંધ હોવાથી સમગ્ર શહેરનો કચરો માંજલપુર વિધાનસભા વિસ્તારમાં જ ઢગલાની જેમ ભરાઈ રહ્યો છે.

મ્યુનિસિપલ કોર્પોરેશન દ્વારા મે મહિનામાં નવું ટેન્ડર જાહેર કરવામાં આવ્યું હોવા છતાં, આજદિન સુધી કોઈને કામ સોંપવામાં આવ્યું નથી.પરિણામે પ્રોજેક્ટ કાગળ પર જ અટવાઈ ગયો છે, અને વાસ્તવિક કામગીરીના નામે શૂન્ય છે.

વિશેષજ્ઞોના મતે, જો રોજના 6000 થી 7000 ટન કચરાનું પ્રોસેસિંગ નહીં કરવામાં આવે, તો આવનાર 50 વર્ષમાં પણ આ સમસ્યા હલ નહીં થાય.

નાગરિકોના આક્ષેપ મુજબ, માંજલપુર વિધાનસભા “કચરાની પેટી” બની ગઈ છે, જ્યાં વડોદરા શહેરના ચારેય ઝોનનો કચરો એકઠો થાય છે.