કરજણ: બામણગામ ડી-માર્ટ વેરહાઉસમાં કર્મચારીઓનો રોષ; પડતર માંગણીઓને લઈને હડતાલ પર ઉતર્યા કામદારો

• મેનેજમેન્ટ વિરુદ્ધ કર્મચારીઓનો જંગ: 12 કલાક કામ કરાવી માત્ર 8 કલાકનું વેતન અપાતું હોવાનો આક્ષેપ.
• ઓવરટાઇમની ચૂકવણી ન થતા સેંકડો કર્મચારીઓએ કામકાજ ઠપ્પ કરી વેરહાઉસની બહાર નોંધાવ્યો વિરોધ.
• સ્થાનિક રાજકીય આગેવાનો દોડી આવ્યા; કર્મચારીઓ અને મેનેજમેન્ટ વચ્ચે મધ્યસ્થીના પ્રયાસો તેજ.

કરજણ તાલુકાના બામણગામ સ્થિત જાણીતી રિટેલ ચેઈન ડી-માર્ટના વેરહાઉસમાં આજે વાતાવરણ તંગ બન્યું હતું. વેરહાઉસમાં કામ કરતા સેંકડો કર્મચારીઓએ મેનેજમેન્ટની જોહુકમી અને વેતનમાં અન્યાય થતો હોવાના આક્ષેપ સાથે અચાનક હડતાલ પાડી દીધી છે. કામદારોએ એકસૂરે કામકાજ બંધ કરી વેરહાઉસની બહાર સૂત્રોચ્ચાર કર્યા હતા.

🫵કર્મચારીઓના ગંભીર આક્ષેપ:

હડતાલ પર ઉતરેલા કર્મચારીઓનો મુખ્ય આક્ષેપ છે કે, મેનેજમેન્ટ દ્વારા તેમની પાસે દરરોજ 9 થી 12 કલાક સુધી આકરું કામ કરાવવામાં આવે છે, પરંતુ જ્યારે પગારની વાત આવે છે ત્યારે માત્ર 8 કલાકનું જ વેતન ચૂકવવામાં આવે છે. આ ઉપરાંત, વધારાના કલાકો માટે કોઈ પણ પ્રકારનો ઓવરટાઇમ ભથ્થું આપવામાં આવતું નથી. લાંબા સમયથી ચાલી રહેલા આ આર્થિક શોષણ સામે છેવટે કર્મચારીઓનો ધીરજ ખૂટી હતી.

🗣️રાજકીય આગેવાનોની મધ્યસ્થી:

ઘટનાની જાણ થતા જ સ્થાનિક રાજકીય આગેવાનો પણ કર્મચારીઓની વહારે દોડી આવ્યા હતા. તેમણે કામદારોના પક્ષે રહીને મેનેજમેન્ટના અધિકારીઓ સાથે બેઠક યોજી હતી. આગેવાનોએ માંગ કરી છે કે કર્મચારીઓને તેમના કામના પૂરા કલાકોનું વેતન અને બાકી નીકળતો ઓવરટાઇમ તાત્કાલિક ચૂકવવામાં આવે.

🧐કામકાજ પર અસર:

કર્મચારીઓની આ હડતાલને કારણે વેરહાઉસનું લોજિસ્ટિક્સ અને સપ્લાય ચેઈનનું કામકાજ ખોરવાઈ ગયું છે. હાલમાં મેનેજમેન્ટ અને કામદારો વચ્ચે વાટાઘાટો ચાલુ છે, પરંતુ કર્મચારીઓ મક્કમ છે કે જ્યાં સુધી લેખિતમાં બાંહેધરી નહીં મળે ત્યાં સુધી તેઓ કામ પર પરત ફરશે નહીં