“પહેલા કામ, પછી વોટ”: અકોટાની ગંદકી જોઈ કોંગ્રેસ ઉમેદવારે પ્રચાર અટકાવ્યો; તંત્રને બે દિવસનું અલ્ટીમેટમ

• રાજકીય ચીલો ચાતર્યો: વોટ માંગતા પહેલા સમસ્યા ઉકેલવાની નેમ; કોંગ્રેસ ઉમેદવાર રાકેશ ઠાકોર પ્રચાર છોડી પહોંચ્યા લોકોની વચ્ચે.
• નર્કાગાર જેવી સ્થિતિ: અકોટા પોલીસ લાઈન સામે હાઉસિંગ બોર્ડના મકાનોમાં ગટર ઉભરાતા રહીશો ત્રાહિમામ; ઘૂંટણસમાં ગંદા પાણીમાં રહેવા મજબૂર જનતા.
• રોગચાળાની દહેશત: અસહ્ય દુર્ગંધ અને મચ્છરોના ઉપદ્રવ વચ્ચે જીવતા પોલીસ પરિવારો; તંત્રની ઘોર બેદરકારી સામે ઉગ્ર આક્રોશ.
• આંદોલનની ચીમકી: “જો બે દિવસમાં નિકાલ નહીં આવે તો વોર્ડ ઓફિસે ધામા નાખીશું” – રહીશો સાથે ઉમેદવારની કડક ચેતવણી.

વડોદરા: ચૂંટણીના પડઘમ વાગતાની સાથે જ સામાન્ય રીતે ઉમેદવારો શક્તિ પ્રદર્શન, રેલીઓ અને બેનરોમાં વ્યસ્ત થઈ જતા હોય છે. પરંતુ વડોદરાના વોર્ડ નંબર ૧૨ માં આજે કંઈક અલગ જ અને પ્રશંસનીય દ્રશ્યો જોવા મળ્યા. અહીં કોંગ્રેસના ઉમેદવાર રાકેશ ઠાકોરને ટિકિટ મળતા જ તેમણે ભવ્ય પ્રચાર કરવાને બદલે જનતાની વર્ષો જૂની પીડાને વાચા આપવાનું નક્કી કર્યું છે.

🧐સમસ્યાનું ગંભીર સ્વરૂપ:

અકોટા પોલીસ લાઇનની બિલકુલ સામે આવેલા ગુજરાત હાઉસિંગ બોર્ડના મકાનોમાં છેલ્લા ઘણા સમયથી ગટર લાઇન ઉભરાવાની ગંભીર સમસ્યા સર્જાઈ છે. હાલત એવી છે કે ગટરના ગંદા પાણી રસ્તાઓ પર ફરી વળ્યા છે અને લોકોના આંગણા સુધી પહોંચી ગયા છે. અસહ્ય દુર્ગંધ અને મચ્છરોના ભારે ઉપદ્રવને કારણે અહીં રહેતા પોલીસ પરિવારો અને સામાન્ય નાગરિકોનું જીવવું દુષ્કર બન્યું છે. રોગચાળો ફાટી નીકળવાની ભીતિ વચ્ચે રહીશોમાં તંત્ર પ્રત્યે ભારોભાર રોષ જોવા મળી રહ્યો છે.

🤚જનતા સાથે ઉભા રહ્યા ઉમેદવાર:

સામાન્ય રીતે નેતાઓ ચૂંટણી ટાણે વોટ માંગવા જ આવતા હોય છે, પરંતુ પ્રચારના ધમધમાટ વચ્ચે પણ રાકેશ ઠાકોર આ ગંદકીવાળા વિસ્તારમાં દોડી આવ્યા હતા. તેમણે રહીશોની વ્યથા સાંભળી અને સ્થળ પર જ રહીને અધિકારીઓનું ધ્યાન દોર્યું હતું. તેમણે સ્પષ્ટ ચીમકી આપી છે કે જો આગામી બે દિવસમાં ગટરની આ સમસ્યાનું કાયમી નિરાકરણ નહીં આવે, તો તેઓ રહીશો સાથે મળીને વોર્ડ ઓફિસ પર હલ્લાબોલ કરશે અને ઉગ્ર વિરોધ પ્રદર્શન કરશે.

👉લોકોમાં આશાનું કિરણ:

ચૂંટણી પ્રચારના પ્રથમ દિવસે જ જનતાના પક્ષે ઉભા રહીને લડત આપવાની ઉમેદવારની આ કાર્યશૈલી જોઈને સ્થાનિક રહીશોમાં આશા જન્મી છે. લોકોમાં ચર્ચા છે કે જો દરેક લોકપ્રતિનિધિ પ્રચાર કરતા પ્રજાની પીડાને વધુ મહત્વ આપે, તો શહેરની અનેક પાયાની સમસ્યાઓ ઉકેલાઈ શકે છે.

🫵હવે જોવાનું એ રહેશે કે કોંગ્રેસના આ ‘એક્શન’ બાદ નિંભર તંત્ર જાગશે કે પછી રહીશોએ ગંદકીમાં જ દિવસો પસાર કરવા પડશે.