ચારધામ યાત્રાના નામે શ્રદ્ધાળુઓ સાથે છેતરપિંડી: વડોદરાના ટ્રાવેલ્સ સંચાલકે 48 યાત્રાળુઓને ઋષિકેશમાં નોંધારા મૂકી ભાગ્યો

• વિશ્વાસઘાત: ચારધામ યાત્રાના નામે 15.42 લાખ વસૂલ્યા બાદ સંચાલક ફરાર.
• શ્રદ્ધાળુઓની કફોડી સ્થિતિ: ઋષિકેશમાં 48 યાત્રાળુઓને અધવચ્ચે છોડીને સંચાલક અદ્રશ્ય થયો.
• હિંમત અને જવાબદારી: ફરિયાદીએ પોતાના ખિસ્સામાંથી 2.12 લાખ ખર્ચી યાત્રા પૂર્ણ કરાવી.
• પોલીસ તપાસ: વડોદરાના ટ્રાવેલ્સ સંચાલક વિરુદ્ધ છેતરપિંડીનો ગુનો દાખલ, તપાસ તેજ.

વડોદરા/પાટણ: ધાર્મિક આસ્થાની આડમાં લાખોની ઠગાઈનો એક ચોંકાવનારો કિસ્સો સામે આવ્યો છે. વડોદરા સ્થિત ‘ખોડલરાજ ટૂર્સ એન્ડ ટ્રાવેલ્સ’ ના સંચાલક કુલદીપ મહેન્દ્રભાઈ પંડ્યાએ ચારધામ યાત્રાના નામે પાટણના મોટીચંદુર ગામના 48 શ્રદ્ધાળુઓ પાસેથી લાખો રૂપિયા પડાવી તેમને ઋષિકેશમાં નિરાધાર હાલતમાં છોડી દઈ ફરાર થઈ જતાં ભારે ચકચાર મચી છે.

❓શું છે સમગ્ર મામલો?

પાટણના ખેડૂત હરેશભાઈ રથવીએ સોશિયલ મીડિયા પર જાહેરાત જોઈને કુલદીપ પંડ્યાનો સંપર્ક કર્યો હતો. 23 દિવસીય યાત્રા માટે 15.62 લાખ નક્કી થયા હતા, જેમાંથી 15.42 લાખ રૂપિયા ચૂકવી દેવામાં આવ્યા હતા. 23 મેના રોજ યાત્રા શરૂ થઈ હતી, પરંતુ હરિદ્વાર પહોંચ્યા બાદ સંચાલકે વધુ રૂપિયાની માંગણી કરી હતી. ત્યારબાદ 6 જૂને ઋષિકેશમાં ‘ગેસનો બાટલો ભરાવવા જવાનું’ બહાનું કાઢી સંચાલક કુલદીપ પંડ્યા રફુચક્કર થઈ ગયો હતો અને તેનો મોબાઈલ પણ બંધ કરી દીધો હતો.

🧐શ્રદ્ધાળુઓની મુશ્કેલી અને સંઘર્ષ:

યાત્રા અધવચ્ચે અટકી પડતા 48 શ્રદ્ધાળુઓ વિદેશી ધરતી જેવી સ્થિતિમાં મુકાયા હતા. આ કપરા સમયમાં હરેશભાઈ રથવીએ જવાબદારી ઉપાડી પોતાના ખિસ્સામાંથી અંદાજે 2.12 લાખ રૂપિયા ખર્ચીને બસ અને રહેવા-જમવાની વ્યવસ્થા કરી બાકીના 9 દિવસની યાત્રા પૂર્ણ કરાવી હતી. 12 જૂને તમામ યાત્રાળુઓ સુરક્ષિત પરત ફર્યા હતા, પરંતુ આ સમગ્ર કૌભાંડમાં તેમને કુલ 6 લાખનું આર્થિક નુકસાન થયું છે.

🚨પોલીસ કાર્યવાહી:

પરત ફર્યા બાદ સંચાલકના સસરાની મધ્યસ્થીમાં સમાધાનના પ્રયાસો નિષ્ફળ રહેતા, હરેશભાઈ રથવીએ અંતે વડોદરા પોલીસમાં કુલદીપ મહેન્દ્રભાઈ પંડ્યા વિરુદ્ધ છેતરપિંડીની ફરિયાદ નોંધાવી છે. પોલીસે ગુનો નોંધીને ફરાર આરોપીની શોધખોળ અને આ મામલે કાયદેસરની તપાસ હાથ ધરી છે.