બંગાળમાં ચૂંટણી પહેલા રાજકીય ભૂકંપ: I-PAC પર EDના દરોડા બાદ મમતા બેનરજીના તેવર આકરા.

પશ્ચિમ બંગાળમાં ૨૦૨૬ની વિધાનસભા ચૂંટણીની રણભેરી વાગે તે પહેલા જ એજન્સીઓ અને સત્તાધારી પક્ષ વચ્ચે જંગ છેડાઈ ગઈ છે. ગુરુવારે સવારથી જ કોલકાતામાં હલચલ મચી ગઈ જ્યારે એન્ફોર્સમેન્ટ ડિરેક્ટોરેટ (ED) એ પ્રશાંત કિશોર દ્વારા સ્થાપિત અને હાલ પ્રતીક જૈન દ્વારા સંચાલિત કંપની I-PAC ના સ્થાનો પર દરોડા પાડ્યા.

❓શું છે સમગ્ર વિવાદ?

EDના જણાવ્યા અનુસાર, આ કાર્યવાહી ‘બંગાળ કોલસા કૌભાંડ’ અને મની લોન્ડરિંગના પુરાવા શોધવા માટે કરવામાં આવી હતી. એજન્સીનો દાવો છે કે હવાલા ઓપરેટરો દ્વારા કરોડો રૂપિયાના વ્યવહાર I-PAC સાથે જોડાયેલા છે. જોકે, TMC આને રાજકીય ષડયંત્ર ગણાવી રહી છે.

🧐 મમતા બેનરજીનો રૂબરૂ હસ્તક્ષેપ

દરોડા દરમિયાન મુખ્યમંત્રી મમતા બેનરજી પોતે પ્રતીક જૈનના ઘરે પહોંચી ગયા હતા. તેમણે આરોપ લગાવ્યો કે ED તેમની પાર્ટીના ચૂંટણી દસ્તાવેજો, ઉમેદવારોના લિસ્ટ અને ડિજિટલ ડેટા ચોરવાનો પ્રયાસ કરી રહી છે.

મુખ્યમંત્રીનું નિવેદન: “આ અમિત શાહનું કામ છે? શું EDનું કામ પાર્ટીના હાર્ડ ડિસ્ક અને સ્ટ્રેટેજી પેપર્સ ચોરવાનું છે? આ લોકશાહીની હત્યા છે.”

⚠️ દિલ્હીમાં વિરોધ પ્રદર્શન

આ લડાઈ માત્ર બંગાળ પૂરતી સીમિત નથી રહી. દિલ્હીમાં TMCના દિગ્ગજ નેતાઓ ડેરેક ઓ’બ્રાયન, મહુઆ મોઇત્રા અને સાકેત ગોખલે સહિત ૮ સાંસદોએ ગૃહ મંત્રાલયની બહાર જોરદાર સૂત્રોચ્ચાર કર્યા. પોલીસે કલમ ૧૪૪નો ભંગ ગણાવી તમામની અટકાયત કરી છે.

👮પોલીસ સ્ટેશનમાં બે FIR

મમતા બેનરજીએ શેક્સપિયર સરાની પોલીસ સ્ટેશનમાં જઈને ED વિરુદ્ધ ગંભીર કલમો હેઠળ ફરિયાદ નોંધાવી છે:

• પ્રથમ FIR: ડેટા અને દસ્તાવેજોની ચોરી તેમજ ગેરકાયદે પ્રવેશના આરોપસર.
• બીજી FIR (સુઓ મોટો): કેન્દ્રીય અધિકારીઓ દ્વારા સરકારી કામમાં દખલ અને બળજબરી કરવા બદલ.
  આગામી રણનીતિ
• વિરોધ માર્ચ: આજે શુક્રવારે મમતા બેનરજી કોલકાતાના રસ્તાઓ પર ઉતરીને કેન્દ્ર સરકાર વિરુદ્ધ શક્તિ પ્રદર્શન કરશે.
• કાનૂની લડાઈ: TMCએ કલકત્તા હાઈકોર્ટમાં અરજી કરીને દપ્ત થયેલા દસ્તાવેજો પરત મેળવવા અને EDની કાર્યવાહીને પડકારવા માટે તૈયારી કરી છે.