PM મોદીના ઓસ્ટ્રેલિયા પ્રવાસ પર સંકટના વાદળ: મેલબર્ન કાર્યક્રમને લઈને મળી જાનથી મારી નાખવાની ધમકી

• ઓનલાઈન ધમકી: ફેસબુક પર પોસ્ટ દ્વારા વડાપ્રધાન મોદીને જાનથી મારી નાખવાની ધમકી અપાઈ.
• પોલીસ તપાસ: ઓસ્ટ્રેલિયન ફેડરલ પોલીસ દ્વારા આઈપી એડ્રેસના આધારે સઘન તપાસ શરૂ.
• સુરક્ષામાં વધારો: વિદેશ પ્રવાસને પગલે સુરક્ષા એજન્સીઓ દ્વારા અભેદ્ય કવચ બનાવવાની તૈયારી.
• કાર્યક્રમનું મહત્વ: મેલબર્નમાં ભારતીય સમુદાય સાથેનો પીએમ મોદીનો કાર્યક્રમ અત્યંત મહત્વનો માનવામાં આવે છે.

નવી દિલ્હી/મેલબર્ન: વડાપ્રધાન નરેન્દ્ર મોદીના આગામી ઓસ્ટ્રેલિયા પ્રવાસ પહેલા એક ગંભીર સુરક્ષા મુદ્દો સામે આવ્યો છે. મેલબર્નમાં આયોજિત થનારા ‘મેલબર્ન મીટ્સ મોદી’ કાર્યક્રમને લઈને સોશિયલ મીડિયા પર જાનથી મારી નાખવાની ધમકી મળતા સુરક્ષા એજન્સીઓ એલર્ટ મોડ પર આવી ગઈ છે.

📩ધમકીનો મામલો:

ઓસ્ટ્રેલિયન મીડિયાના અહેવાલ મુજબ, ફેસબુક પર મેલબર્નના માર્વેલ સ્ટેડિયમમાં યોજાનારા સમુદાય કાર્યક્રમના પ્રચારની પોસ્ટ નીચે ‘અબુ મુસ્તફા’ નામના એકાઉન્ટ પરથી ધમકીભરી ટિપ્પણી કરવામાં આવી હતી. જેમાં લખ્યું હતું કે, “સારું રહેશે કે કાર્યક્રમ દરમિયાન સ્ટેડિયમની છત બંધ રહે, નહિતર તેઓ ઓસ્ટ્રેલિયા પોતાના મોત માટે આવી રહ્યા છે.”

🚨તપાસનો ધમધમાટ:

આ ધમકી બાદ મામલો તરત જ ઓસ્ટ્રેલિયન ફેડરલ પોલીસ (AFP) ને સોંપવામાં આવ્યો છે. તપાસ એજન્સીઓએ પોસ્ટ સાથે જોડાયેલા IP એડ્રેસની ઓળખ કરી લીધી છે અને હવે એ જાણવાના પ્રયાસો થઈ રહ્યા છે કે આ ટિપ્પણી કોણે કરી અને તેની પાછળનો હેતુ શું હતો. ઓસ્ટ્રેલિયન એજન્સીઓ કોઈપણ વિદેશી રાષ્ટ્રાધ્યક્ષને મળેલી ધમકીને અત્યંત ગંભીરતાથી લઈ રહી છે.

👉વ્યાપક સુરક્ષા સમીક્ષા:

વડાપ્રધાન મોદીના ઓસ્ટ્રેલિયા પ્રવાસ દરમિયાન સુરક્ષા વ્યવસ્થાની જવાબદારી ઓસ્ટ્રેલિયન ફેડરલ પોલીસ, રાજ્યની પોલીસ અને વિશેષ સુરક્ષા એકમો સંભાળશે. તમામ કાર્યક્રમોની સુરક્ષા વ્યવસ્થાની વ્યાપક સમીક્ષા કરવામાં આવી રહી છે. વડાપ્રધાન પોતાના પ્રવાસ દરમિયાન દ્વિપક્ષીય વાર્તાલાપ ઉપરાંત ભારતીય સમુદાયને સંબોધિત કરવાના છે. ઓનલાઈન મળેલી ધમકી બાદ સુરક્ષા એજન્સીઓ કોઈપણ સંભવિત ખતરાને લઈને સતર્ક છે અને સમગ્ર મામલે તપાસ ચાલુ છે.