સ્વિટ્ઝર્લેન્ડમાં ક્રાન્સ મોન્ટાનાના પ્રખ્યાત ‘કોન્સ્ટેલેશન બાર’માં બ્લાસ્ટ; અનેક લોકોના મોતની આશંકા.

નવા વર્ષની શરૂઆતમાં જ વિદેશથી એક માઠા સમાચાર સામે આવી રહ્યા છે. વિશ્વભરના પ્રવાસીઓના મનપસંદ ગણાતા સ્વિત્ઝર્લેન્ડના એક લક્ઝરી સ્કી રિસોર્ટમાં ભયાનક દુર્ઘટના સર્જાઈ છે. સ્વિટ્ઝર્લેન્ડના ક્રાન્સ મોન્ટાના (Crans-Montana) રિસોર્ટમાં આવેલા એક લોકપ્રિય બારમાં પ્રચંડ વિસ્ફોટ થતાં હડકંપ મચી ગયો છે. પ્રાથમિક અહેવાલો અનુસાર, આ દુર્ઘટનામાં અનેક લોકોએ જીવ ગુમાવ્યા હોવાની આશંકા છે.

ઘટનાની વિગતો મુજબ, દક્ષિણ-પશ્ચિમ સ્વિત્ઝર્લેન્ડના વોલિસ કેન્ટનમાં આવેલા લક્ઝરી અલ્પાઈન સ્કી રિસોર્ટમાં ગુરુવારે વહેલી સવારે લગભગ 1:30 વાગ્યે એક જોરદાર વિસ્ફોટ થયો હતો. આ વિસ્ફોટ ‘કોન્સ્ટેલેશન’ (Le Constellation) નામના બારમાં થયો હતો, જે તે સમયે પ્રવાસીઓથી છલકાઈ રહ્યો હતો. લોકો નવા વર્ષ 2026 ને આવકારવા માટે ડાન્સ અને મ્યુઝિકની મજા માણી રહ્યા હતા, ત્યારે જ અચાનક થયેલા ધડાકાએ ઉજવણીને માતમમાં ફેરવી નાખી.

• જાનહાનિની આશંકા: સ્વિસ પોલીસ પ્રવક્તા ગેટન લેથિયને પુષ્ટિ કરી છે કે આ ઘટનામાં અનેક લોકો ઈજાગ્રસ્ત થયા છે અને અનેક લોકોના મોત થયા હોવાની આશંકા છે. જોકે, ચોક્કસ આંકડો હજુ જાહેર કરવામાં આવ્યો નથી.
• બચાવ કામગીરી: વિસ્ફોટ બાદ ઈમારતમાં ભીષણ આગ લાગી ગઈ હતી. સોશિયલ મીડિયા પર વાયરલ થયેલી તસવીરોમાં લપેટાતી જ્વાળાઓ અને ઇમરજન્સી સેવાઓની ગાડીઓ જોઈ શકાય છે. હેલિકોપ્ટર અને એર રેસ્ક્યુ (Rega) દ્વારા ઈજાગ્રસ્તોને હોસ્પિટલ ખસેડવામાં આવી રહ્યા છે.
• તપાસ જારી: વિસ્ફોટનું ચોક્કસ કારણ હજુ જાણી શકાયું નથી. પોલીસ તપાસ કરી રહી છે કે આ કોઈ ટેકનિકલ ખામી હતી, ગેસ લીકેજ હતું કે અન્ય કોઈ કારણ.
  

સ્થાનિક હોસ્પિટલોમાં ઈજાગ્રસ્તોનો ધસારો જોવા મળી રહ્યો છે, જેમાં ગંભીર રીતે દાઝી ગયેલા દર્દીઓની સંખ્યા વધુ છે. વહીવટીતંત્ર દ્વારા પીડિતોના પરિવારો માટે વિશેષ હેલ્પલાઇન નંબર 084 811 21 17 પણ જારી કરવામાં આવ્યો છે.