ભર ઉનાળે ચોમાસું: સાયક્લોનિક સર્ક્યુલેશનથી ગુજરાતના વાતાવરણમાં પલટો; દેડિયાપાડામાં કરા સાથે વરસાદ

• આભમાંથી આફત: નર્મદાના સાગબારા અને દેડિયાપાડામાં કરા સાથે કમોસમી વરસાદ; ભર ઉનાળે ચોમાસા જેવો માહોલ.
• હવામાન વિભાગની ચેતવણી: સાયક્લોનિક સર્ક્યુલેશન સક્રિય થતા આજે રાજકોટ, જૂનાગઢ અને ગીર સોમનાથ સહિતના જિલ્લાઓમાં વરસાદની શક્યતા.
• ખેડૂતોની ચિંતા વધી: મકાઈ, મગ, અડદ અને કેરીના પાકને મોટા નુકસાનની ભીતિ; માવઠાએ ધરતીપુત્રોના મોં સુધી આવેલો કોળિયો છીનવ્યો.
• બેવડી ઋતુ: એક તરફ આકાશમાંથી અગનગોળા અને બીજી તરફ ગાજવીજ સાથે વરસાદ; વાતાવરણમાં પલટાથી બીમારીઓ વધવાની દહેશત.

અમદાવાદ/નર્મદા: ગુજરાતમાં હાલ કુદરતનો બેવડો માર જોવા મળી રહ્યો છે. મે મહિનાની કાળઝાળ ગરમી વચ્ચે રાજ્યના વાતાવરણમાં અચાનક પલટો આવ્યો છે. હવામાન વિભાગની આગાહી મુજબ, સાયક્લોનિક સર્ક્યુલેશન અને ટ્રફ લાઇન સક્રિય થવાને કારણે રાજ્યના અનેક વિસ્તારોમાં કમોસમી વરસાદ એટલે કે માવઠું શરૂ થયું છે.

🌨️નર્મદામાં કરા સાથે વરસાદ:

દક્ષિણ ગુજરાતના નર્મદા જિલ્લામાં આજે કુદરતનું રૌદ્ર સ્વરૂપ જોવા મળ્યું હતું. દેડિયાપાડા અને સાગબારા તાલુકામાં તેજ પવન અને ગાજવીજ સાથે કરા પડ્યા હતા. ભર ઉનાળે કરા પડતા સ્થાનિકોમાં કુતૂહલ જોવા મળ્યું હતું, પરંતુ રસ્તાઓ પર પાણી ફરી વળતા જનજીવન પ્રભાવિત થયું હતું. વરસાદને કારણે તાપમાનમાં ઘટાડો થતા ઠંડક તો પ્રસરી છે, પરંતુ આ ઠંડક ખેડૂતો માટે ‘દુઃખદાયક’ સાબિત થઈ રહી છે.

🧐ખેડૂતોની માઠી દશા:

આ અકાળે આવેલા વરસાદને કારણે ખેતરમાં ઉભેલા ઉનાળુ પાક જેવા કે મગ, અડદ અને મકાઈને વ્યાપક નુકસાન થવાની ભીતિ છે. સૌથી વધુ માઠી અસર કેરીના પાકને થઈ છે. તેજ પવન સાથેના વરસાદને કારણે આંબા પરથી કેરીઓ ખરી પડતા ખેડૂતો આર્થિક પાયમાલી તરફ ધકેલાયા છે.

👉આજના દિવસની આગાહી:

હવામાન વિભાગના ડાયરેક્ટર એ. કે. દાસના જણાવ્યા અનુસાર, આજે 7 મે ના રોજ પણ વરસાદી માહોલ યથાવત રહેશે. ખાસ કરીને સૌરાષ્ટ્રના રાજકોટ, જૂનાગઢ, ગીર સોમનાથ, અમરેલી, ભાવનગર અને બોટાદમાં હળવા વરસાદની શક્યતા છે. જ્યારે પૂર્વ અને દક્ષિણ ગુજરાતના દાહોદ, છોટા ઉદેપુર, નર્મદા, તાપી અને ડાંગ જિલ્લામાં પણ ગાજવીજ સાથે વરસાદ પડી શકે છે.

🌬️હવામાન વિભાગની આ આગાહી વચ્ચે ખેડૂતો હવે કુદરત સામે મીટ માંડીને બેઠા છે કે ક્યારે આ આફત ટળે. જો આગામી 24 કલાકમાં વરસાદનું જોર વધશે, તો ખેતી પાકોને ન પૂરી શકાય તેવું નુકસાન થઈ શકે છે.