જીલ્લા ભાજપ સંગઠનની ભેદી ચૂપકીદી વચ્ચે બરોડા ડેરીમાં ભાજપના જ ડિરેક્ટર વિપક્ષની ભૂમિકામાં આવ્યા!

આમ તો સહકારી ક્ષેત્રમાં પક્ષ – વિપક્ષ જેવું કંઈ હોતું નથી. પરંતુ અહીંયા પણ ભાજપે મેન્ડેડ પ્રથા લાવીને પક્ષ વિપક્ષને જન્મ આપી દીધો છે. હવે સહકારી ક્ષેત્રમાં પણ રાજકીય પક્ષના મેન્ડેડ હેઠળ ચૂંટણી લડતા અને જીતતા ઉમેદવારોને પાર્ટી લાઈન પ્રમાણે ભૂમિકા ભજવવાની હોય છે.

જે સહકારી સંસ્થામાં ભાજપના મેન્ડેડ થી જીતેલા સહકારી અગ્રણીઓ બહુમતીથી સત્તા મેળવી હોય, ત્યાં લઘુમતીમાં મુકાયેલા કોંગ્રેસના તેમજ અપક્ષ ઉમેદવારો વિપક્ષની ભૂમિકા ભજવે છે. પરંતુ હવે જ્યારે કોંગ્રેસના નેતાઓનું 80% ભાજપમાં વીલીનીકરણ થઈ ગયું છે ત્યારે, ભાજપના સહકારી અગ્રણીઓ પાસે સામે લડવા માટે કોઈ માથું રહ્યું નથી. જેના કારણે સહકારી ક્ષેત્રના ભાજપના જ નેતાઓ અંદરો અંદર શિંગડા ભેરવી રહ્યા છે.

વાત કરીએ બરોડા ડેરીની, તો બરોડા ડેરીમાં છેલ્લા ચાર- પાંચ વર્ષથી સહકારી અગ્રણીઓ અને ધારાસભ્ય જુથ આમને સામને હતું. જ્યાં ચૂંટણીના પરિણામ આવ્યા બાદ ભારતીય જનતા પાર્ટીના મેન્ડેડના આધારે જ પ્રમુખ- ઉપપપ્રમુખની નિયુક્તિ કરવામાં આવી હતી. આ સંસ્થામાં વિપક્ષના નામે 0 ડિરેક્ટર છે ત્યારે વિપક્ષની ભૂમિકા ભજવે કોણ? તે સવાલ ઊભો થયો છે. હવે ભારતીય જનતા પાર્ટીમાં હોદ્દો ધરાવતા અને બરોડા ડેરીના ડેસર ઝોનના ડિરેક્ટર સુરપાલસિંહ પરમાર ડેરીના વહીવટકર્તાઓ સામે વિપક્ષની ભૂમિકામાં આવ્યા છે.

આગામી 30 સપ્ટેમ્બરમાં રોજ બરોડા ડેરીની વાર્ષિક સાધારણ સભા મળનાર છે. ત્યારે તે પહેલા ડિરેક્ટર સુરપાલસિંહ પરમારે 9 જેટલા મુદ્દાઓ સાથે બરોડા ડેરીના પ્રમુખ ઉપપ્રમુખ અને મેનેજિંગ ડિરેક્ટરને લેખિતમાં રજૂઆત કરતા ભાજપ વિરુદ્ધ ભાજપના ચિત્ર સ્પષ્ટ થયા છે. અત્રે ઉલ્લેખનીય છે કે, ડેસરના ડિરેક્ટર સુરપાલસિંહ પરમાર સાવલી તાલુકા ભાજપ પ્રમુખનો હોદ્દો પણ ધરાવે છે.ત્યારે તેઓ દ્વારા લખવામાં આવેલા પત્રએ ભાજપના જ બોર્ડ પર સવાલો ઉભા કરી દીધા છે.

આ તમામ વિવાદમાં જીલ્લા ભાજપ સંગઠન ફક્ત તમાશો જોવાની ભૂમિકામાં છે. જ્યાં આંતરિક કકળાટ બહાર આવે તેવી સ્થિતિ હોય ત્યારે જીલ્લા ભાજપ સંગઠને સામે ચાલીને વિવાદને શાંત કરવો જોઈએ. પણ અહીંયા તો આખે આખું જીલ્લા ભાજપ સંગઠન ડેરીના વિષયમાં બાયપાસ થઈ જતું હોય અને પ્રદેશમાં બેઠેલા વ્યક્તિઓ ખેલ ભજવી જતા હોય તેવો ઘાટ સર્જાયો છે. જોકે 30 સપ્ટેમ્બરના રોજ મળનારી બરોડા ડેરીની વાર્ષિક સાધારણ સભા પહેલા જ સુરપાલસિંહના પત્ર દ્વારા એ તો સ્પષ્ટ થાય છે કે,બરોડા ડેરીના વહીવટમાં હજી મલાઈની લડાઈ યથાવત છે. આ લડાઈમાં પશુપાલકોનું કેટલું હિત સમાયેલું છે તે તો સમય જ બતાવશે.