હાઇકોર્ટની ફટકાર બાદ પાલિકાએ આખરે ઠરાવ પરત ખેંચ્યો, વિવાદી જમીન પર વોર્ડ ઓફિસ બાંધવામાં કોણે રસ હતો?

• 7 ઓગસ્ટે હાઇકોર્ટમાં કેસ ચાલુ હોવા છતાંય સૂચિત જમીન પર વોર્ડ ઓફિસ બાંધવાની મંજૂરી આપવામાં આવી હતી
• પ્લોટ વેલીડેશનના વિવાદ વચ્ચે ટેન્ડર પ્રક્રિયા કરીને તેજ સ્થળે વોર્ડ ઓફિસ બનાવવામાં કોણે રસ હતો?
• હાઇકોર્ટના આંકરા વલણ દરમિયાન 24 તારીખની સુનવણી પહેલા પાલિકાએ કરેલી પ્રક્રિયા પરત ખેંચવી પડી

વડોદરા મહાનગરપાલિકા દ્વારા ગત 7 ઓગસ્ટે સ્થાયી સમિતિની બેઠકમાં પૂર્વ વિસ્તારમાં વોર્ડ 16ની કચેરી બનાવવા માટે દરખાસ્ત રજૂ કરવામાં આવી હતી. જેમાં ઇજારદારમાં આવેલા ભાવ પત્રકમાં અંતિમ નિર્ણય લેવામાં આવ્યો હતો. જો કે ત્યારબાદ સ્થાયી સમિતિના સભ્યોએ આગળના નિર્ણયો માટેની સત્તા મ્યુનિસિપલ કમિશનરને સોંપી દીધી હતી. મહત્વની વાત એ છે કે, આ જમીન પર હાઇકોર્ટમાં કેસ ચાલતો હોવા છતાં પણ પાલિકા દ્વારા ટેન્ડર પ્રક્રિયા કરીને બોર્ડ કચેરી બાંધવાનું નિર્ણય કરવામાં આવતા હાઈકોર્ટમાં પાલિકાના પ્રતિનિધિ વકીલને વારંવાર માફી માંગવાનો વારો આવ્યો હોવાનું સામે આવ્યું હતું. જો કે સમગ્ર પ્રકરણમાં વિવાદિત જમીન પર વોર્ડ ઓફિસ બાંધવા માટે એક નેતાનો અંગત રસ હોવાના પત્રો પણ સામે આવ્યા છે.

વહીવટી વોર્ડ નંબર 16ની કચેરી બનાવવા માટે દંતેશ્વરના રેવન્યુ સર્વે નંબર 352ની મનન પાર્ક સામેની જગ્યા માટે હાઇકોર્ટમાં જમીન માલિક અરજદાર દ્વારા કેસ ચાલી રહ્યો હતો. ટીપીના ફાઇનલ પ્લોટમાં વેલીડેશન દરમિયાન નિયત જમીનમાં 40% કપાત બાદ પૂરતી જગ્યા નહિ મળવાને કારણે અરજદારે કોર્ટના દ્વાર ખખડાવ્યા હતા. આ જમીન લાંબા સમયથી પાલિકા તેમજ અરજદાર વચ્ચે વિવાદનું કેન્દ્ર બની રહી હતી. તેમ છતાં આ જમીન પર વોર્ડ ઓફિસ બનાવવા માટે પાલિકાએ ખાસ દરખાસ્ત રજૂ કરી હતી. આ દરખાસ્તમાં વોર્ડ ઓફિસ બનાવવાની મંજૂરી સહિત ઇજારદારને કામ આપવા સુધીની તૈયારીઓ પાલિકાએ કરી દીધી હતી.

જોકે બીજી તરફ પાલિકાના વકીલ હાઇકોર્ટમાં ન્યાયાધીશ સમક્ષ બાહેધરી આપતા હતા કે, આવી કોઈ પ્રક્રિયા કરવામાં આવશે નહીં. ગત 7 ઓગસ્ટે સ્થાયી સમિતિની બેઠકમાં વોર્ડ ઓફિસના બાંધકામનો દરખાસ્ત મંજૂર થતાં વિવાદ ફરી હાઇકોર્ટમાં પહોંચ્યો હતો. જ્યાં પાલિકાના વકીલે કોર્ટ સમક્ષ બિનશરતી માફી માંગીને ઠરાવ નંબર 63ને રદ કરવામાં આવશે તેવી ખાતરી આપી હતી.જેની આગામી સુનાવણી 24 ઓગસ્ટના રોજ યોજાનાર હતી

આ દરમિયાન આજે મળેલી સ્થાયી સમિતિની બેઠકમાં ગત 7 ઓગસ્ટે પાલિકાએ મંજૂર કરેલી દરખાસ્તમાં ઠરાવ નંબર 63ને રદ કરવા સર્વ સંમતિથી આ કામને મંજુર કર્યું છે. જોકે મહત્વની વાત એ છે કે, જમીન પર અગાઉથી વિવાદ હોવા છતાં પણ આજ જમીન પર વોર્ડ ઓફિસ બાંધવા માટે કોને અંગત રસ હતો તે વિવાદમાં બહાર આવ્યું છે.

રાવપુરા વિધાનસભાના ધારાસભ્ય અને વિધાનસભાના દંડક બાલકૃષ્ણ શુક્લનો ભલામણ પત્ર વિવાદ બાદ સામે આવ્યા છે. જે પત્રમાં વોર્ડ નંબર 16ની કચેરી બાંધવા માટે તેઓની ભલામણ સ્પષ્ટ રીતે દેખાઈ રહી છે. વિસ્તારના જન પ્રતિનિધિ હોય વોર્ડ કચેરી માટે ભલામણ કરે, તે સ્વાભાવિક છે. પરંતુ જે જમીન અગાઉથી વિવાદિત અને પ્લોટ મામલે લીટીગેશન ચાલુ હોય, તે જમીન પર વોર્ડ ઓફિસ બાંધવાની સ્પષ્ટ ભલામણ અનેક તર્ક વીતર્ક ઊભા કરે છે. ધારાસભ્ય દ્વારા વોર્ડ ઓફિસની માંગણી કરવીએ વ્યાજબી તો છે, પરંતુ એક નિયત જમીન માટે જ પત્ર લખીને તે જ સ્થળે વોર્ડ ઓફિસ બનાવવાની માંગણી વિવાદ શરૂ થવાનું કારણ બન્યું છે.

આ જમીન પર વોર્ડ ઓફિસની માંગણી કરવાને કારણે પાલિકાએ પ્રક્રિયા તો હાથ ધરી પરંતુ અંતે પાલિકાને જ નામદાર હાઇકોર્ટ સમક્ષ માફી માંગવાનો વારો આવ્યો હોય ત્યારે આ જમીન પર વોર્ડ ઓફિસ બાંધવામાં રાજકીય માથાઓની આંતરિક લડાઈને કારણે પાલિકાને આર્થિક નુકસાનની સાથે નામદાર હાઇકોર્ટનો ઠપકો સાંભળવાનો વારો આવ્યો છે.