વડોદરા ક્રાઇમ બ્રાન્ચની મોટી કાર્યવાહી: નેશનલ હાઈવે પરથી નવજાત બાળકની તસ્કરી કરતા દંપતી ઝડપાયું

• બાળ તસ્કરી પકડાઈ: વડોદરા ક્રાઇમ બ્રાન્ચે નેશનલ હાઈવે પરથી 8 દિવસના નવજાત શિશુને વેચવા જતાં દંપતીને ઝડપી પાડ્યું.
• રૂા. 3 લાખમાં સોદો: આર્થિક રીતે નબળા પરિવારના બાળકને એજન્ટો મારફતે મુંબઈમાં રૂા. 3 લાખમાં વેચવાનું કાવતરું રચાયું હતું.
• અગાઉ પણ બાળ વેચ્યાની કબૂલાત: મુખ્ય આરોપી સુનીલે અગાઉ પણ અન્ય બાળકોને એજન્ટો દ્વારા મુંબઈ વેચ્યા હોવાની ચોંકાવનારી કબૂલાત કરી.
• રાજ્યવ્યાપી નેટવર્ક: ગુજરાત, મહારાષ્ટ્ર અને રાજસ્થાન સાથે જોડાયેલા આ રેકેટના અન્ય આરોપીઓની શોધખોળ માટે ક્રાઇમ બ્રાન્ચની ટીમો કામે લાગી છે.

વડોદરા: વડોદરા શહેર ક્રાઇમ બ્રાન્ચે માનવ તસ્કરીના એક અત્યંત સંવેદનશીલ અને ચોંકાવનારા રેકેટનો પર્દાફાશ કર્યો છે. વડોદરાના નેશનલ હાઈવે નંબર-48 પર આવેલી લેજન્ડ હોટેલ પાસેથી પસાર થતી બસમાંથી માત્ર આઠ દિવસના નવજાત શિશુને વેચાણ અર્થે મુંબઈ લઈ જઈ રહેલા દંપતીને ક્રાઇમ બ્રાન્ચે રંગે હાથ ઝડપી પાડ્યું છે. આ મામલે ડી.સી.બી. પોલીસ સ્ટેશનમાં ગુનો નોંધીને સંડોવાયેલા અન્ય આરોપીઓની ધરપકડ કરવાની તજવીજ હાથ ધરવામાં આવી છે.

❓શું હતી સમગ્ર ઘટના અને મોડસ ઓપરેન્ડી?

પોલીસ સૂત્રોના જણાવ્યા અનુસાર, ક્રાઇમ બ્રાન્ચની ટીમને બાતમી મળી હતી કે નેશનલ હાઈવે પરથી એક દંપતી શિશુ સાથે મુંબઈ તરફ જઈ રહ્યું છે. બાતમીના આધારે વોચ ગોઠવીને પોલીસે મનોજભાઈ કેશાભાઈ રાવળ અને તેમની પત્ની વીણાબેન (રહે. સતલાસણ, મહેસાણા) ને ઝડપી લીધા હતા. તેમની સાથે એક 8 વર્ષનો પુત્ર અને 8 દિવસનું નવજાત બાળક પણ મળી આવ્યું હતું.

પ્રાથમિક પૂછપરછમાં બહાર આવ્યું કે વીણાબેનનો ભાઈ સુનીલ રાવળ ગત 27 જુલાઈએ આ નવજાત બાળકને પોતાની સાથે લાવ્યો હતો. આ બાળક તેના મિત્ર નગીનભાઈ મારફતે મેળવવામાં આવ્યું હતું. મુંબઈમાં આ બાળકને રૂા. 3 લાખમાં વેચવાનું નક્કી કરવામાં આવ્યું હતું, જેમાં બાળકના માતા-પિતાને, એજન્ટોને અને દંપતીને કમિશન પેટે રકમ મળવાની હતી. સિદ્ધપુરથી મુંબઈ જતી બસમાં આ દંપતી બાળકને લઈને જઈ રહ્યું હતું અને મુંબઈથી ‘ડોક્ટર’ નામના ઇસમનો ફોન આવવાનો હતો. પોલીસે બાળકની સુરક્ષા અને તબીબી સારવાર માટે તેને તાત્કાલિક એસ.એસ.જી. હોસ્પિટલ ખસેડ્યો હતો.

🧐સંપૂર્ણ નેટવર્કનો થયો ખુલાસો:

આ કેસની ઊંડાણપૂર્વક તપાસ કરતા જાણવા મળ્યું હતું કે આ નવજાત બાળકનો જન્મ બનાસકાંઠાના દાંતા ખાતે થયો હતો. બાળકના માતા-પિતા સાબરકાંઠાના વતની છે અને આર્થિક પરિસ્થિતિ નબળી હોવાથી શ્રવણ નામના શખ્સ મારફતે આ બાળકના સોદાનું કાવતરું રચાયું હતું.

સુનીલ રાવળની પૂછપરછમાં એવો પણ ઘટસ્ફોટ થયો છે કે તેણે અગાઉ પણ બનાસકાંઠાની જુદી જુદી ત્રણ મહિલાઓ દ્વારા જન્માવાયેલા શિશુઓને એજન્ટો (નગીન ઉર્ફે નગો, રમેશ ઉર્ફે ભમરૂ, મનીષ) મારફતે છેલ્લા દોઢ મહિનામાં મુંબઈના ત્રણ ખરીદદારો (કવિતાબેન, શીતલબેન, પ્રવીણભાઈ) ને વેચેલા છે.

🚨પોલીસ કાર્યવાહી અને રિમાન્ડ:

ક્રાઇમ બ્રાન્ચે આ કેસમાં મનોજ રાવળ, વીણાબેન રાવળ અને સુનીલ રાવળની ધરપકડ કરીને કોર્ટમાંથી રિમાન્ડ મેળવ્યા છે. તેમજ મહારાષ્ટ્ર, રાજસ્થાન અને ગુજરાતમાં અલગ-અલગ ટીમો મોકલીને આ બાળ તસ્કરીના નેટવર્કમાં સંડોવાયેલા અન્ય આરોપીઓ જેમ કે નગીન ભગોરા, સોહિલ નદાબ અને શ્રવણ પરમાર સહિતના શખ્સોને ઝડપી પાડવાની સઘન કાર્યવાહી હાથ ધરી છે.