મેયરના વિસ્તારમાં જ ડ્રેનેજનો ડેરો: વોર્ડ નં. 13માં એક અઠવાડિયાથી ગટરો ઉભરાતા સ્થાનિકો ત્રાહિમામ

• ગંભીર સમસ્યા: આર.વી. દેસાઈ રોડ પર ગંગોત્રી એપાર્ટમેન્ટ પાછળ છેલ્લા એક અઠવાડિયાથી ગટરો ઉભરાતી હોવાની ફરિયાદ.
• જવાબદારીનો અભાવ: મેયર અને કાઉન્સિલરોના પોતાના વિસ્તારમાં જ ડ્રેનેજની સમસ્યાનું કોઈ નિરાકરણ નહીં.
• મીડિયા પર નિર્ભરતા: સ્થાનિકોની રજૂઆતને અવગણીને માત્ર મીડિયામાં આવે ત્યારે જ તંત્ર દોડતું થતું હોવાનો આક્ષેપ.
• ઉગ્ર વિરોધ: સમસ્યા દૂર નહીં થાય તો આંદોલનની ચીમકી સાથે તંત્રને ચેતવણી.

વડોદરા: વડોદરા મહાનગરપાલિકાના વહીવટી તંત્રની પોલ વોર્ડ નંબર 13માં ખુલ્લી પડી છે. આર.વી. દેસાઈ રોડ પર આવેલા ગંગોત્રી એપાર્ટમેન્ટની પાછળનો વિસ્તાર, જે ખાસ કરીને મેયરનો મતવિસ્તાર અને કાઉન્સિલરોનું રહેઠાણ ધરાવે છે, ત્યાં છેલ્લા એક અઠવાડિયાથી ડ્રેનેજની ગંભીર સમસ્યાએ માઝા મૂકી છે.

🧐સ્થાનિકોની વ્યથા:

એક તરફ સ્વચ્છતાના મોટા દાવાઓ કરવામાં આવે છે, તો બીજી તરફ આ વિસ્તારમાં ગટરો ઉભરાઈ રહી છે. ગંદકી અને દુર્ગંધ થી સ્થાનિક રહીશો ત્રાહિમામ પોકારી ઉઠયા છે. સ્થાનિકોનો સૌથી મોટો આક્રોશ એ વાતનો છે કે, મેયર અને કાઉન્સિલરોના ઘરની આસપાસ જ આટલી ગંભીર સમસ્યા હોવા છતાં તંત્ર સંપૂર્ણપણે અજાણ છે. શું જનપ્રતિનિધિઓને પોતાના જ વિસ્તારની આ દયનીય સ્થિતિ નથી દેખાતી?

🗣️મીડિયાની રાહ જોતું તંત્ર:

રહીશોનો આક્ષેપ છે કે, તેઓએ વારંવાર સ્થાનિક કાઉન્સિલરો અને વહીવટી તંત્રમાં રજૂઆતો કરી છે, પરંતુ કોઈ જ નક્કર કાર્યવાહી કરવામાં આવતી નથી. લોકોને એવું લાગી રહ્યું છે કે, જ્યાં સુધી આ સમસ્યા મીડિયાના માધ્યમથી જાહેર ન થાય, ત્યાં સુધી તંત્રના પેટનું પાણી પણ હલતું નથી. શું સીધી રજૂઆતોને સાંભળવી કે તેનો ઉકેલ લાવવો તે તંત્રની ફરજ નથી?

👉તંત્ર સમક્ષ ચીમકી:

આ વિસ્તારના રહીશોએ તંત્રની કામગીરી પર સીધા સવાલ ઉઠાવ્યા છે. જો મેયર ના વિસ્તાર અને કાઉન્સિલરોના ઘરની સામે જ ડ્રેનેજ ઉભરાતી હોય, તો અન્ય વિસ્તારોની સ્થિતિ શું હશે? રહીશોએ પાલિકાને તાત્કાલિક અસરથી ડ્રેનેજ લાઈનનું કામ પૂર્ણ કરવા અને આ વિસ્તારને સ્વચ્છ કરવા માંગ કરી છે. સાથે હવે વહેલી તકે સમસ્યાનું નિરાકરણ આવશે કે નઈ જોવાનું રહ્યું