વડોદરા: 13 વર્ષથી પોલીસને થાપ આપતો રીઢો આરોપી ક્રાઈમ બ્રાન્ચના સકંજામાં; વાડી વિસ્તારની ઘરફોડ ચોરીનો છે મામલો

• વડોદરા ક્રાઈમ બ્રાન્ચની મોટી સફળતા: વર્ષ 2013થી નાસતા-ફરતા નીરજ ઉર્ફે નક્કી બાગીયાની ધરપકડ.
• ચોરીના ચેકમાં ખોટી સહીઓ કરી મુંબઈના વેપારીને પધરાવ્યા હતા; 13 વર્ષ બાદ ખોડીયારનગરથી ઝડપાયો.
• જ્વેલર્સની દુકાનના તાળા તોડી સોના-ચાંદીના દાગીના સહિત ₹3.40 લાખની કરી હતી ચોરી.

વડોદરા શહેરમાં લાંબા સમયથી નાસતા-ફરતા આરોપીઓને પકડી પાડવા માટે પોલીસ કમિશનર શ્રી નરસિંહા કોમાર દ્વારા આપવામાં આવેલી કડક સૂચનાના પગલે ક્રાઈમ બ્રાન્ચને મોટી સફળતા મળી છે. પોલીસે વર્ષ 2013માં વાડી પોલીસ સ્ટેશન વિસ્તારમાં થયેલી ઘરફોડ ચોરી અને છેતરપિંડીના ગુનામાં છેલ્લા 13 વર્ષથી ફરાર આરોપીને ખોડીયારનગર વિસ્તારમાંથી દબોચી લીધો છે.

📌ઘટનાની વિગત:

સપ્ટેમ્બર 2013માં વાડી વિસ્તારની કરોળિયા પોળમાં એક જ્વેલર્સની બંધ દુકાનના તાળા તોડી અજાણ્યા તત્વોએ સોના-ચાંદીના દાગીના, રોકડ, કેમેરા અને ચેકબુક મળી કુલ ₹3,40,000ની ચોરી કરી હતી. આ ગુનાની તપાસ દરમિયાન ચોરીમાં ગયેલી ચેકબુકના બે ચેકો પર ખોટી સહીઓ કરી, આરોપી નીરજ બાગીયાએ મુંબઈમાં ખરીદેલા કપડાના પેમેન્ટ પેટે વેપારીને આપ્યા હતા. જોકે, બેંક ખાતું અગાઉથી જ સ્ટોપ કરાવી દેવાયું હોવાથી આ ભેદ ખુલી ગયો હતો.

🧐13 વર્ષનો વનવાસ અને ધરપકડ:

આરોપી નીરજ ઉર્ફે નક્કી સુરેશકુમાર બાગીયા આ ગુનામાં પોતાની સંડોવણી ખુલતા જ પોલીસની ધરપકડ ટાળવા છેલ્લા 13 વર્ષથી નાસતો-ફરતો હતો. નામદાર કોર્ટે પણ તેની વિરુદ્ધ વોરંટ ઇસ્યુ કર્યું હતું. ક્રાઈમ બ્રાન્ચની ટીમે ટેકનિકલ અને હ્યુમન ઈન્ટેલિજન્સની મદદથી તપાસ કરતા બાતમી મળી હતી કે આરોપી હાલ ખોડીયારનગરમાં આશ્રય લઈ રહ્યો છે. જે આધારે પોલીસે ખોડીયારનગર ડી-માર્ટ પાસે વોચ ગોઠવી તેને ઝડપી પાડ્યો હતો.

🚨પકડાયેલ આરોપીની વિગત:

• નીરજ ઉર્ફે નક્કી સુરેશકુમાર બાગીયા * રહેઠાણ: હાલ ક્રીષ્ણા પેરેડાઇઝ સોસાયટી, ડી-માર્ટ સામે, ખોડીયારનગર, વડોદરા (મૂળ રહે. નરોડા, અમદાવાદ)

👮પોલીસ કાર્યવાહી:

ક્રાઈમ બ્રાન્ચે આરોપીની અટકાયત કરી આગળની વધુ તપાસ માટે વાડી પોલીસ સ્ટેશનને સુપ્રત કર્યો છે. 13 વર્ષ જૂના વણઉકેલાયા કેસમાં આરોપી પકડાતા પોલીસ તંત્રએ રાહતનો શ્વાસ લીધો છે.