વડોદરામાં ૩ દિવસ પાણીનો કકળાટ: મકરપુરાથી VIP રોડ સુધીના ૨.૫ લાખ રહીશો પ્રભાવિત, જાણો

વડોદરામાં શહેરના પૂર્વ અને દક્ષિણ વિસ્તારના અનેક વિસ્તારોમાં આગામી ત્રણ દિવસ પાણીનો પુરવઠો ખોરવાશે. વીજ કંપનીનું શટડાઉન અને પાણીની નવી લાઈનના જોડાણની કામગીરીને કારણે પાલિકાએ પાણી કાપની જાહેરાત કરી છે. મકરપુરા, જાંબુવા અને ન્યૂ VIP રોડ સહિતના વિસ્તારોમાં રહેતા લોકોને પાણીનો સંગ્રહ કરી લેવા તંત્ર દ્વારા અપીલ કરવામાં આવી છે.

વડોદરા મહાનગરપાલિકાના પાણી પુરવઠા વિભાગ દ્વારા લેવાયેલા નિર્ણય મુજબ, શહેરના ઉત્તર અને દક્ષિણ ઝોનમાં પાણીની રાડ પડશે. વોર્ડ નં. 4 માં એરપોર્ટ ચાર રસ્તા પાસે 900 મીમીની લાઈનને નવી 400 મીમીની લાઈન સાથે જોડવાની કામગીરીને પગલે સોમવારે મોટો કાપ રહેશે.

              મુખ્ય અસરો અને સમયપત્રક:

૧. ૩૧ જાન્યુઆરી, શનિવાર (વીજ શટડાઉનને કારણે):

• મકરપુરા અને જાંબુવા: વીજ શટડાઉનને લીધે પાણીના સમયમાં ફેરફાર થયો છે.
• મકરપુરા ગામ, જશોદા કોલોની: સવારે 5 થી 6 વાગ્યા દરમિયાન પાણી મળશે.
• જાંબુવા ગામ અને આસપાસ: સવારે 6:05 થી 7:05 દરમિયાન પુરવઠો અપાશે.
• માણેજા: વીજ પુરવઠો પુનઃસ્થાપિત થયા બાદ માણેજા ગામ અને સોસાયટીઓમાં પાણી અપાશે.

​૨. ૨ ફેબ્રુઆરી, સોમવાર (લાઈન જોડાણની કામગીરી):

• એરપોર્ટ ચાર રસ્તાથી ન્યૂ VIP રોડ તરફ જતી લાઈનોમાં કામગીરીને લીધે ખોડિયાર નગર, એરપોર્ટ, વારસીયા બુસ્ટર અને આજવા ટાંકી વિસ્તારમાં સવાર અને સાંજનો પાણીનો પુરવઠો સંપૂર્ણ બંધ રહેશે.
• આનાથી અંદાજે 2.5 લાખ રહીશો પ્રભાવિત થશે.

૩. ૩ ફેબ્રુઆરી, મંગળવાર:

• પાણીગેટ અને નાલંદા ટાંકી: સોમવારના કાપની અસર મંગળવારે પણ જોવા મળશે. આ વિસ્તારોમાં મંગળવારે સવારે પાણી મોડું અને ખૂબ જ ઓછા પ્રેશરથી આવશે.

🧐પાલિકા દ્વારા હાથ ધરવામાં આવેલી આ મેન્ટેનન્સ કામગીરી શહેરના લાંબા ગાળાના પાણી પુરવઠા માટે જરૂરી છે, પરંતુ હાલ પૂરતું રહીશોએ હાલાકી ભોગવવી પડશે. તંત્રએ લોકોને વિનંતી કરી છે કે પાણીનો કરકસરપૂર્વક ઉપયોગ કરે જેથી શટડાઉન દરમિયાન મુશ્કેલી ન પડે.