- નકલી એક્સ-આર્મીમેન ઝડપાયા: વડોદરા SOG એ આર્મીના બોગસ દસ્તાવેજો બનાવી સિક્યુરિટીમાં નોકરી મેળવનાર 2 યુપીના શખ્સોને દબોચ્યા.
- ગંભીર કૌભાંડ છતું થયું: આરોપીઓ પાસે નકલી સેવા મુક્તિ પુસ્તિકા, પેન્શન કાર્ડ અને એક્સ-સર્વિસમેન આઈડી કાર્ડ કબ્જે કરાયા.
- ગોરવા પોસ્ટેમાં ગુનો દાખલ: બોગસ દસ્તાવેજ અને છેતરપિંડી આચરવા બદલ કાયદેસરની કાર્યવાહી હાથ ધરાઈ.
- અલ્કાપુરીની એજન્સી સામે તપાસ: સાગર ઇન્ટેલિજન્સ સિક્યુરિટીના કેપ્ટન સોનવણે અને યુપીના અજયસિંગ ચૌહાણને વોન્ટેડ જાહેર કરાયા.
વડોદરા શહેરમાં કાયદો અને વ્યવસ્થાની પરિસ્થિતિ સુદ્રઢ રાખવા તેમજ ગેરકાયદેસર પ્રવૃત્તિઓ પર અંકુશ મેળવવા માટે પોલીસ કમિશનર નરસિમ્હા કોમારની સૂચનાથી ચલાવવામાં આવી રહેલી ખાસ ઝુંબેશ અંતર્ગત વડોદરા શહેર એસ.ઓ.જી. (Special Operations Group) ની ટીમને મોટી સફળતા સાંપડી છે. ભારતીય સેના (Indian Army) માં ફરજ બજાવી ન હોવા છતાં એક્સ-આર્મીમેન (Ex-Serviceman) ના બોગસ અને બનાવટી દસ્તાવેજો બનાવી વિવિધ સિક્યુરિટી એજન્સીઓમાં નોકરી મેળવી વિશ્વાસઘાત આચરતી ટોળકીના બે ઇસમોને પોલીસે દબોચી લીધા છે.
એસ.ઓ.જી. ના પી.આઈ. ડી.જે. ચુડાસમાના માર્ગદર્શન હેઠળ ટીમો તપાસમાં હતી તે દરમિયાન અર્નામ હેડ કોન્સ્ટેબલ આશિષપુરી મનસુખપુરીને ચોક્કસ બાતમી મળી હતી કે, ગોરવા વિસ્તારમાં પરિશ્રમ પાર્કમાં રહેતો ધીરેન્દ્રસિંગ હરીસિંગ અને બાજવા રોડ પર સિકોતરધામ સોસાયટીમાં રહેતો ભૂપેન્દ્રસિંહ શિવકુમારસિંગ બોગસ આર્મી સર્ટિફિકેટના આધારે સિક્યુરિટી ગાર્ડ તરીકે નોકરી કરી રહ્યા છે. બાતમીના આધારે પોલીસે દરોડો પાડી બંનેની કડક પૂછપરછ હાથ ધરી હતી.
તપાસ દરમિયાન સામે આવ્યું હતું કે, બંને મૂળ ઉત્તર પ્રદેશના ફતેહપુર જિલ્લાના વતની છે અને તેમણે ભારતીય આર્મીમાં ક્યારેય ફરજ બજાવી નથી. આમ છતાં, તેમણે આર્મીની નકલી સેવા નિવૃત્તિ પુસ્તિકા (Discharge Book), સર્ટિફિકેટ ઓફ સર્વિસ, ડિપેન્ડન્ટ સર્ટિફિકેટ, પેન્શન કાર્ડ અને એક્સ-સર્વિસમેન આઇડેન્ટિટી કાર્ડ જેવા બનાવટી દસ્તાવેજો તૈયાર કરાવ્યા હતા. આ નકલી દસ્તાવેજો સાચા તરીકે રજૂ કરી સિક્યુરિટી એજન્સીના સંચાલકો સાથે ગુનાહિત વિશ્વાસઘાત અને ઠગાઈ કરી હતી. આ અંગે ગોરવા પોલીસ સ્ટેશનમાં ગુનો રજિસ્ટર કરવામાં આવ્યો છે.
આ કૌભાંડમાં અલ્કાપુરીમાં આવેલી ‘સાગર ઇન્ટેલિજન્સ સિક્યુરિટી સર્વિસીસ’ ના કેપ્ટન સોનવણે અને ઉત્તર પ્રદેશના અજયસિંગ ચૌહાણની સંડોવણી સામે આવતા પોલીસે તેમને વોન્ટેડ જાહેર કર્યા છે.
👮પકડાયેલા આરોપીઓ:
૧. ધીરેન્દ્રસિંગ હરીસિંગ (હાલ રહે. પરિશ્રમ પાર્ક સોસાયટી, ગોરવા, વડોદરા / મૂળ રહે. નગુવાપુર, તા. બિંદકી, જી. ફતેહપુર, ઉત્તર પ્રદેશ)
૨. ભૂપેન્દ્રસિંહ શિવકુમારસિંગ ગૌતમ (રાજપૂત) (હાલ રહે. સિકોતરધામ સોસાયટી, બાજવા રોડ, કરોડિયા, વડોદરા / મૂળ રહે. ચકમાધોપુર, તા. બિંદકી, જી. ફતેહપુર, ઉત્તર પ્રદેશ)
🚨વોન્ટેડ આરોપીઓ:
૧. કેપ્ટન સોનવણે (સાગર ઇન્ટેલિજન્સ સિક્યુરિટી સર્વિસીસ, ઇમ્પાલા હાઉસ, અલ્કાપુરી, વડોદરા)
૨. અજયસિંગ ચૌહાણ (રહે. ઉત્તર પ્રદેશ)
