- સળિયા ચોરીનું કૌભાંડ પકડાયું: વડસર મોકલવાના સળિયા વાઘોડિયા રોડ પર બારોબાર ઉતારતી વખતે પોલીસે દરોડો પાડ્યો.
- રૂ. 50.74 લાખનો મુદ્દામાલ જપ્ત: પોલીસે સ્થળ પરથી રૂ. 25.74 લાખના સળિયા, રૂ. 25 લાખની ટ્રક અને મોબાઈલ કબ્જે કર્યા.
- 1,990 કિલો સળિયા ચોરીનો પ્રયાસ: ડ્રાઇવર શેતાનારામ, રૂદ્ર વણઝારા અને હરીશ વણઝારાએ 28 ભારી સળિયા ગેરકાયદે ઉતારી લીધા હતા.
- અન્ય મદદગારો સામે તપાસ: તપાસમાં રાજુભાઈ બારીયા અને હિતેશ ઓડ નામના ઇસમોની સંડોવણી સામે આવતા કાયદેસરની કાર્યવાહી તેજ કરાઈ
વડોદરા શહેર અને આસપાસના વિસ્તારોમાં ગુનાહિત પ્રવૃત્તિઓ પર અંકુશ મેળવવા માટે પોલીસ દ્વારા ચલાવવામાં આવી રહેલી સઘન ઝુંબેશ અંતર્ગત વાઘોડિયા રોડ પરથી લાખો રૂપિયાના સળિયા ચોરી કરવાના એક મોટા કૌભાંડનો પર્દાફાશ થયો છે. કીશનલાલ બિશ્નોઈ મારફતે ટ્રકમાં લોડ કરાયેલા સળિયા વડસર સ્થિત ‘મેમોરીઝ ઇન્ફ્રા પ્રોજેક્ટ્સ’ ખાતે પહોંચાડવાના બદલે બારોબાર ઉતારી લેવાની યોજના પર પોલીસે દરોડો પાડીને પાણી ફેરવી દીધું છે.
પ્રાપ્ત વિગતો અનુસાર, કીશનલાલે પોતાની ટ્રકમાં સળિયા લોડ કરાવીને ડ્રાઇવર તરીકે શેતાનારામ બીરબલરામ જાંગુ (બિશ્નોઈ)ને માલસામાન વડસર પહોંચાડવા માટે મોકલ્યો હતો. ડ્રાઇવર તા. 12/10/2026 ના રોજ રાત્રે ટ્રક લઈને નીકળ્યો હતો. પરંતુ, નક્કી કરેલા સરનામે માલ ખાલી કરવાના બદલે ડ્રાઇવરે બપોરે 2:30 થી સાંજે 6:00 વાગ્યા દરમિયાન વાઘોડિયા રોડ પર આવેલા જીવનનગર વુડાના મકાન પાસે ટ્રક ઊભી રાખી દીધી હતી. ત્યાં અન્ય ઇસમો રૂદ્ર વણઝારા અને હરીશ વણઝારા સાથે મળીને ટ્રકમાંથી ગેરકાયદેસર રીતે સળિયા ઉતારવાનું શરૂ કર્યું હતું.
આ શખ્સોએ કુલ 28 ભારી સળિયા (જેનું અંદાજિત વજન 1990 કિલોગ્રામ અને કિંમત રૂ. 1,19,400 હતી) ચોરી કરવાના ઈરાદાથી ટ્રકમાંથી ઉતારી લીધા હતા. તે જ સમયે ચોક્કસ બાતમીના આધારે પોલીસે સ્થળ પર દરોડો પાડીને આ આખું કૌભાંડ રંગેહાથ ઝડપી પાડ્યું હતું. પોલીસે ઘટનાસ્થળેથી રૂ. 25.54 લાખની કિંમતના તમામ સળિયા, રૂ. 25 લાખની કિંમતની ટ્રક તેમજ મોબાઈલ ફોન મળીને કુલ રૂ. 50,74,500/- નો મસ્તમોટો મુદ્દામાલ જપ્ત કર્યો છે. પાણીગેટ પોલીસની સઘન તપાસ દરમિયાન રાજુભાઈ બારીયા અને હિતેશ ઓડ નામના ઇસમોએ પણ આ ગેરકાયદેસર કૃત્યમાં મદદગારી કરી હોવાનું સામે આવતા તમામ આરોપીઓ સામે કાયદેસરની કાર્યવાહી હાથ ધરવામાં આવી છે.
