વડોદરા: માંજલપુર પોલીસનો સપાટો; ટ્રેન અને સોસાયટીમાંથી મોબાઈલ ચોરી કરનાર રીઢો તસ્કર ઝડપાયો

• માંજલપુર પોલીસે બાહુબલી સર્કલ પાસેથી ચોરાઉ મોબાઈલ સાથે ધવલ પટણવાડીયાને દબોચ્યો.
• આરોપી પાસેથી કુલ 6 એન્ડ્રોઇડ મોબાઈલ રિકવર; ટ્રેન મુસાફરોની નજર ચૂકવી ચોરી કરતો હતો.
• અગાઉના ગુનાઓમાં પણ સંડોવાયેલો આરોપી; પોલીસની સઘન તપાસમાં અનેક ચોરીઓનો ભેદ ઉકેલાયો.

વડોદરા શહેરમાં વધતી જતી મિલકત સંબંધી ગુનાખોરી અને વાહન/મોબાઈલ ચોરીની ઘટનાઓને ડામવા માટે પોલીસ કમિશનર નરસિંહા કોમારની સૂચના હેઠળ માંજલપુર પોલીસ સક્રિય બની છે. માંજલપુર પોલીસ સ્ટેશનના પી.આઈ. ડી.જી. પટેલના માર્ગદર્શન હેઠળ પોલીસે ટેકનિકલ સર્વેલન્સ અને હ્યુમન ઇન્ટેલિજન્સના આધારે એક મોબાઈલ ચોરને રંગેહાથ ઝડપી પાડવામાં સફળતા મેળવી છે.

📌ઘટનાની વિગત:

માંજલપુર દરબાર ચોકડી પાસેની એક સોસાયટીમાંથી ૧૦ દિવસ પહેલા થયેલી મોબાઈલ ચોરીની તપાસ દરમિયાન પોલીસને મળેલી બાતમીના આધારે, માંજલપુર પોલીસે બાહુબલી સર્કલ પાસેથી ધવલકુમાર ગોવિંદભાઈ પટણવાડીયા (રહે. કલાલી, વડોદરા) નામના શખ્સને શંકાસ્પદ હાલતમાં ઝડપી પાડ્યો હતો. તેની અંગઝડતી લેતા ચોરીનો મોબાઈલ મળી આવ્યો હતો. વધુ પૂછપરછમાં તેણે બીજા ૫ મોબાઈલ ફોન પણ કાઢી આપ્યા હતા.

🧐ચોરીની ‘મોડસ ઓપરેન્ડી’ (M.O.):

આરોપી ધવલ પટણવાડીયાની પૂછપરછમાં બહાર આવ્યું છે કે તે વડોદરાથી ભરૂચ તરફ જતી-આવતી લોકલ ટ્રેનોમાં બેસી મુસાફરોની નજર ચૂકવી મોબાઈલ ઝૂંટવી લેતો હતો અને ટ્રેન ધીમી પડે ત્યારે અધવચ્ચે ઉતરી જતો હતો. તેની પાસેથી મળેલા 6 મોબાઈલ પૈકી એક માંજલપુર વિસ્તારની ચોરીનો છે, જ્યારે બાકીના ૫ મોબાઈલ તેણે લોકલ ટ્રેનોમાંથી ચોર્યા હોવાની કબૂલાત કરી છે.

🚨આરોપીનો ગુનાહિત ઇતિહાસ:

આરોપી અગાઉ પણ ગુનાહિત પ્રવૃત્તિઓમાં સંડોવાયેલો છે:

1. અટલાદરા પોલીસ સ્ટેશનમાં નોંધાયેલ ચોરીનો ગુનો (2024).

2. માંજલપુર પોલીસ સ્ટેશનમાં નોંધાયેલ ચોરીનો ગુનો (2025).

👮કબજે કરેલ મુદ્દામાલ:

પોલીસે વિવિધ કંપનીઓના કુલ ૬ મોબાઈલ ફોન કબજે કર્યા છે, જેમાં આઈફોન, સેમસંગ, રિયલમી અને વીવો જેવા કિંમતી મોબાઈલનો સમાવેશ થાય છે. આ તમામ મોબાઈલની અંદાજિત કિંમત ₹38000 આંકવામાં આવી છે. માંજલપુર પોલીસે આરોપીની ધરપકડ કરી આગળની કાયદેસરની કાર્યવાહી હાથ ધરી છે.