વડોદરા: ગોરવા સહયોગ ગાર્ડન સામે વૃદ્ધાને અડફેટે લેનાર ઓટો રિક્ષા ચાલક બિરેન્દ્ર પાંડેને રિક્ષા સાથે દબોચતી ગોરવા પોલીસ

• ગોરવા પોલીસની તાત્કાલિક એક્શન: હિટ એન્ડ રનની ઘટના આચરી ફરાર થઈ ગયેલા રિક્ષાચાલકને ઓટો રિક્ષા સાથે ઝડપી પાડતી પોલીસ ટીમ.
• વહેલી સવારે રોડ ક્રોસ કરતા બની ઘટના: સહયોગ ગાર્ડન સામેથી ચાલતા જતા વૃદ્ધાને રિક્ષાચાલકે પૂરઝડપે અને બેદરકારીથી ચલાવી મારી હતી ટક્કર.
• માથાના ભાગે ગંભીર ઈજા: અકસ્માત સર્જી માનવતા ભૂલીને નાસી જનાર અજાણ્યા ચાલક વિરૂદ્ધ પુત્રે નોંધાવી હતી ફરિયાદ.
• CCTV ફૂટેજ અને હ્યુમન સોર્સથી મળ્યો સગડ: ઇન્ચાર્જ પોલીસ કમિશનર નિલેશ જાજડીયા સાહેબની સૂચનાથી ગોરવા પોલીસે ઉકેલ્યો અકસ્માતનો કેસ.

વડોદરા શહેરમાં માર્ગ અકસ્માતના બનાવો અટકાવવા તેમજ અકસ્માત સર્જીને નાસી જતા વાહનચાલકો વિરૂદ્ધ સખત કાયદેસરની કાર્યવાહી કરવા પોલીસની ટીમે બાતમીદારો અને સીસીટીવી નેટવર્કની મદદથી તપાસ હાથ ધરી હતી. આ તપાસ દરમિયાન ગોરવા પોલીસે સહયોગ ગાર્ડન સામે એક વયોવૃદ્ધ મહિલાને અડફેટે લઈ માથામાં ગંભીર ઈજા પહોંચાડી નાસી જનાર ઓટો રિક્ષાના ચાલકને રિક્ષા સાથે ઝડપી પાડવામાં સફળતા મેળવી છે.

🛺પુરઝડપે આવી રહેલી રિક્ષાએ વૃદ્ધાને મારી ટક્કર:

ઘટનાની વિગત એવી છે કે, ગોરવા વિસ્તારમાં આવેલા જૂના ગુજરાત હાઉસિંગ બોર્ડ, શક્તિનગર ખાતે રહેતા પ્રકાશભાઈ ટિલમુલ જેઠાણીએ ગોરવા પોલીસ સ્ટેશનમાં ફરિયાદ નોંધાવી હતી. ફરિયાદ અનુસાર, ગત તા. 22/05/2025 ના રોજ સાંજના આશરે 05:30 વાગ્યાના સુમારે તેમના માતાશ્રી સહયોગ ગાર્ડન સામેથી ચાલતા-ચાલતા રોડ ક્રોસ કરી રહ્યા હતા. તે દરમિયાન એક અજાણ્યો ઓટો રિક્ષા ચાલક પોતાની રિક્ષાને પૂરઝડપે અને ગફલતભરી રીતે હંકારી લાવ્યો હતો અને રોડ ક્રોસ કરી રહેલા વૃદ્ધા સાથે જોરદાર અકસ્માત સર્જ્યો હતો. આ અકસ્માતમાં વૃદ્ધાને માથાના ભાગે અત્યંત ગંભીર પ્રકારની ઈજાઓ પહોંચી હતી. અકસ્માત સર્જ્યા બાદ રિક્ષાચાલક ઈજાગ્રસ્ત વૃદ્ધાને સારવાર અપાવવાને બદલે પોતાની રિક્ષા લઈને સ્થળ પરથી નાસી ગયો હતો.

👮ગોરવા પોલીસે અલગ-અલગ કલમો હેઠળ નોંધ્યો હતો ગુનો:

ભોગ બનનાર મહિલાના પુત્રની ફરિયાદના આધારે ગોરવા પોલીસ સ્ટેશનમાં અજાણ્યા ઓટો રિક્ષા ચાલક વિરૂદ્ધ ભારતીય ન્યાય સંહિતા (BNS) ની કલમ ૨૮૧, ૧૨૫(એ), ૧૨૫(બી) તેમજ મોટર વાહન અધિનિયમ (M.V. Act) ની કલમ ૧૭૭, ૧૮૪, ૧૩૪ મુજબ ગુનો નોંધી તપાસ શરૂ કરવામાં આવી હતી.

🎥આજુબાજુના સીસીટીવી ફૂટેજ તપાસી આરોપીને દબોચ્યો:

ગોરવા પોલીસ સ્ટેશનના પી.આઈ. શ્રી કે.એન. લાઠિયાના જરૂરી માર્ગદર્શન હેઠળ પોલીસ સ્ટાફના માણસોએ ઘટનાસ્થળ તેમજ તેની આસપાસના રસ્તાઓ પર લગાવવામાં આવેલા સીસીટીવી કેમેરાના ફૂટેજ મેળવી બારીકાઈથી તપાસ શરૂ કરી હતી. સીસીટીવી ફૂટેજ અને હ્યુમન સોર્સિસથી મળેલી ચોક્કસ કડીના આધારે પોલીસે અકસ્માત સર્જનાર ઓટો રિક્ષાને ટ્રેક કરી લીધી હતી અને નાસી જનાર ઓટો રિક્ષા ચાલકને રિક્ષા સાથે શોધી કાઢી તેની અટકાયત કરી હતી.

👉પકડાયેલા આરોપીનું નામ અને સરનામું:

• બિરેન્દ્ર ઓમપ્રકાશ પાંડે (ઉં.વ. 36, રહે. અંબેવાડી ઝુંપડપટ્ટી, મધુનગર, ગોરવા, વડોદરા શહેર).

🚨ગોરવા પોલીસે પકડાયેલા રિક્ષાચાલક બિરેન્દ્ર પાંડે વિરૂદ્ધ અકસ્માતનો ગુનો નોંધી કાયદેસરની કાર્યવાહી હાથ ધરી છે.