વડોદરા: GST એડિશનલ કમિશનરના ઘરમાં ડ્રાઈવરે જ ધાપ મારી! ડુપ્લિકેટ ચાવીથી 5.40 લાખના દાગીના ચોર્યા

• વિશ્વાસઘાત: સાહેબ ઉત્તરપ્રદેશ ગયા અને ડ્રાઈવરે પાછળથી ઘર સાફ કરી નાખ્યું.
• CCTVમાં ભાંડો ફૂટ્યો: ડ્રાઈવર અને તેનો સાગરીત ડુપ્લિકેટ ચાવીથી દરવાજો ખોલી તિજોરી ફંફોસતા કેદ.
• લક્ષ્મીપુરા પોલીસ એક્શનમાં: એડિશનલ કમિશનરની પત્નીએ ડ્રાઈવર રાજેન્દ્ર પટેલ વિરુદ્ધ નોંધાવી ફરિયાદ.

વડોદરાના પોશ વિસ્તાર ગણાતા ન્યૂ અલકાપુરીમાં એક ચોંકાવનારો કિસ્સો સામે આવ્યો છે, જ્યાં ઘરના જ વિશ્વાસુ ડ્રાઈવરે ચોરીની ઘટનાને અંજામ આપ્યો છે. જીએસટી (GST) વિભાગમાં એડિશનલ કમિશનર તરીકે ફરજ બજાવતા અધિકારીના બંધ મકાનમાંથી આશરે 5.40 લાખ રૂપિયાના સોનાના દાગીનાની ચોરી થઈ છે, જેમાં ડ્રાઈવરની મુખ્ય સંડોવણી હોવાની આશંકા સેવાઈ રહી છે.

📌ઘટનાની વિગત:

મળતી માહિતી મુજબ, એડિશનલ કમિશનરનો પરિવાર થોડા સમય પહેલા ઉત્તરપ્રદેશ ગયો હતો. આ દરમિયાન ઘરમાં રિનોવેશનનું કામ ચાલતું હોવાથી વિશ્વાસના આધારે ઘરની ચાવીઓ ડ્રાઈવર રાજેન્દ્ર પટેલને સોંપવામાં આવી હતી. આરોપ છે કે ડ્રાઈવરે આ તકનો લાભ લઈ ઘરની ડુપ્લિકેટ ચાવી બનાવી લીધી હતી.

🎥CCTV ફૂટેજથી સત્ય આવ્યું સામે:

પરિવાર પરત ફર્યા બાદ ઘરમાંથી સોનાના દાગીના ગાયબ હોવાનું જણાતા તપાસ કરવામાં આવી હતી. ઘરના CCTV ફૂટેજ ચેક કરતા ડ્રાઈવર રાજેન્દ્ર પટેલ અને તેનો એક અજાણ્યો સાગરીત ડુપ્લિકેટ ચાવીથી ઘરનો દરવાજો ખોલી અંદર પ્રવેશતા અને તિજોરી સુધી પહોંચતા સ્પષ્ટ દેખાયા હતા.

👮પોલીસ કાર્યવાહી:

આ મામલે એડિશનલ કમિશનરની પત્નીએ લક્ષ્મીપુરા પોલીસ સ્ટેશનમાં ડ્રાઈવર અને તેના સાગરીત સામે ફરિયાદ નોંધાવી છે. પોલીસે 5.40 લાખની ચોરીનો ગુનો નોંધી ડ્રાઈવરની ધરપકડ કરવા માટે ચક્રો ગતિમાન કર્યા છે. જે વ્યક્તિ પર ઘરની સુરક્ષાની જવાબદારી હતી તેણે જ વિશ્વાસઘાત કરતા વિસ્તારમાં ચર્ચા જાગી છે.