વડોદરા: સનફાર્મા રોડ પર લોહિયાળ જંગ, જૂની અદાવતમાં મોબાઈલ ટેકનિશિયન પર લોખંડના પાઈપથી જીવલેણ હુમલો

• ક્રાઈમ કેપિટલ? અટલાદરામાં અક્ષર ચોક પાસે યુવકને નિશાન બનાવી 4 શખ્સોએ કર્યો હુમલો.
• જૂની અદાવત: વાસણા રોડ પર પડોશમાં રહેતા તરુણ ઠાકોર સાથે થયેલી બોલાચાલીનો રખાયો ખાર.
• લાઈવ વીડિયો: સોશિયલ મીડિયા પર મારામારીના દ્રશ્યો વાયરલ, પોલીસ તપાસ તેજ.
• ગંભીર ઈજા: લોખંડના પાઈપના ઘા વાગતા યુવક લોહીલુહાણ, ગોત્રી હોસ્પિટલમાં સારવાર હેઠળ.

વડોદરા: સંસ્કારી નગરી વડોદરામાં જાણે કાયદો અને વ્યવસ્થાનો ડર ઓસરી રહ્યો હોય તેમ વધુ એક હિંસક હુમલાની ઘટના સામે આવી છે. શહેરના અટલાદરા વિસ્તારમાં જૂની અદાવત રાખીને ચાર શખ્સોએ એક યુવક પર લોખંડના પાઈપ અને લાકડાના ડંડા વડે જીવલેણ હુમલો કર્યો છે. આ સમગ્ર ઘટનાનો વીડિયો સોશિયલ મીડિયા પર વાયરલ થતા ચકચાર મચી ગઈ છે.

🧐ષડયંત્ર પૂર્વક બોલાવ્યો:

અલકાપુરીમાં મોબાઈલ ટાવર ટેકનિશિયન તરીકે કામ કરતા ધવલ રમેશભાઈ ચૌહાણ જ્યારે સનફાર્મા રોડ પર જ્યુપિટર હોસ્પિટલ પાસે પોતાના મિત્ર સુનિલ સાથે બેઠા હતા, ત્યારે આ ઘટના બની હતી. અગાઉ પડોશમાં રહેતા તરુણ ઠાકોર સાથે થયેલી સામાન્ય બોલાચાલીનો ખાર રાખીને આરોપીએ ફોન કરી ધવલનું લોકેશન મેળવ્યું હતું.

🤕પાઈપ અને ડંડા વડે હુમલો:

લોકેશન મળતા જ આરોપી તરુણ ઠાકોર, તેના મિત્રો ભાવેશ પરમાર, વિક્રમ ઉર્ફે એરટેલ નાયક અને રિકેશ બારીયા મોપેડ લઈને ત્યાં ધસી આવ્યા હતા. ગાળાગાળી કરી રિકેશ બારીયાએ ધવલને નીચે પાડી દીધો હતો, જે બાદ તરુણ ઠાકોરે મોપેડમાંથી લોખંડની પાઈપ કાઢી ધવલના માથામાં જોરદાર ફટકો માર્યો હતો. વચ્ચે છોડાવવા પડેલા મિત્ર સુનિલને પણ લાકડાના ડંડા વડે ઈજા પહોંચાડવામાં આવી હતી.

🏥સારવાર અને 👮પોલીસ કાર્યવાહી:

હુમલો કર્યા બાદ લોહીલુહાણ હાલતમાં ધવલને છોડી તમામ આરોપીઓ ફરાર થઈ ગયા હતા. ઈજાગ્રસ્ત યુવકને તાત્કાલિક ગોત્રી જનરલ હોસ્પિટલ ખાતે સારવાર અર્થે ખસેડવામાં આવ્યો છે. અટલાદરા પોલીસે ધવલની ફરિયાદના આધારે ચારેય આરોપીઓ વિરુદ્ધ ગુનો નોંધી તેમની શોધખોળ હાથ ધરી છે.

👉જાહેરમાં આ પ્રકારે થતા હુમલાઓ પોલીસ પેટ્રોલિંગ સામે સવાલો ઉભા કરી રહ્યા છે