વડોદરા: કલેક્ટર કચેરી બહાર જ પડ્યો મહાકાય ભૂવો; જનતાનો આક્રોશ – ‘વેરો ઉઘરાવતી પાલિકા હવે પાતાળ લોકમાં જવાનો વીમો આપે!’

• વીઆઇપી વિસ્તારમાં ભ્રષ્ટાચારની પોલ: વડોદરા કલેક્ટર કચેરી બહાર ધોળા દિવસે રોડની મધ્યમાં પડ્યો મોટો ભૂવો.
• રામ નામે ચૂંટાઈ આવેલ તંત્ર રામ ભરોસે: અકસ્માત રોકવા પાલિકા ન પહોંચી, રાહદારીઓએ જાતે વાંસ-બાંબુ મૂકી વાહનચાલકોને ચેતવ્યા.
• કોન્ટ્રાક્ટરોની મિલીભગત: સ્માર્ટ સિટીના નામે નબળી કામગીરી; ક્યારે કયો રોડ બેસી જશે તેની કોઈ ગેરંટી નહીં.
• જનતાનો સણસણતો સવાલ: વેરો ન ભરો તો સીલ મારતી VMC, કલેક્ટર કચેરી બહાર મોતના કૂવા પડે ત્યારે જવાબદાર કોણ?

​વડોદરા: સંસ્કારી નગરી વડોદરા હવે ‘ભૂવાનગરી’ તરીકે ઓળખાવા લાગી છે. વડોદરાવાસીઓ માટે રસ્તા પર ભૂવા પડવા એ કોઈ નવાઈની વાત નથી રહી, પરંતુ હદ તો ત્યારે થઈ જ્યારે શહેરની સૌથી મહત્વની ગણાતી કલેક્ટર કચેરીની બિલકુલ બહાર જ રસ્તાની મધ્યમાં એક મહાકાય ભૂવો પડી ગયો. આ ઘટનાને પગલે વાહનચાલકોમાં ભારે દોડધામ મચી ગઈ હતી.

🧐જનતાએ સંભાળી મોરચો:

અત્યંત વ્યસ્ત એવા આ માર્ગ પર અચાનક મોટો ભૂવો પડતાં મોટો અકસ્માત સર્જાવાની ભીતિ હતી. જોકે, કલાકો સુધી પાલિકાનું કોઈ તંત્ર ડોકાયું ન હતું. આખરે જનતા જ વહારે આવી હતી અને સ્થાનિક રાહદારીઓએ કોઈ અકસ્માત ન સર્જાય તે માટે ભૂવાની આસપાસ વાંસના બાંબુ ગોઠવીને લોકોને ચેતવવાની કામગીરી કરી હતી. સદનસીબે આ ઘટનામાં કોઈ જાનહાનિ થઈ નથી, પણ તંત્રની પોલ જરૂર ખુલ્લી પડી ગઈ છે.

🗣️[લોકોનો આક્રોશ અને કટાક્ષ]

“તંત્ર અને કોન્ટ્રાક્ટરોની મિલીભગત એટલી હદે વધી ગઈ છે કે રસ્તે ચાલતો માણસ ક્યારે પાતાળ લોકમાં જતો રહેશે તેની કોઈ ગેરંટી નથી! જો વેરો ન ભરીએ તો VMC પ્રોપર્ટી સીલ કરવા દોડી આવે છે, તો પછી આવી નબળી કામગીરી કરીને લોકોને પાતાળમાં પહોંચાડવા બદલ પાલિકાએ હવે ‘પાતાળ લોક વીમા સ્કીમ’ પણ બહાર પાડવી જોઈએ!” – સ્થાનિક નાગરિક

❓[તંત્ર સામે સવાલો]

જ્યાં આખો દિવસ ઉચ્ચ અધિકારીઓ અને નેતાઓની અવરજવર રહે છે, તે કલેક્ટર કચેરી બહાર જ જો રોડની આવી હાલત હોય, તો સામાન્ય સોસાયટીઓ અને ગીચ વિસ્તારોના રસ્તાઓ કેટલા સુરક્ષિત હશે? પ્રજાના ટેક્સના કરોડો રૂપિયા લૂંટતા કોન્ટ્રાક્ટરો સામે પાલિકા ક્યારેય કડક પગલાં કેમ નથી ભરતી?

🫵ચોમાસું હજી શરુ પણ નથી થયું ત્યાં જ વડોદરાના રસ્તાઓ બેસવા લાગ્યા છે. જો વીઆઈપી રોડની આ હાલત હોય, તો આગામી દિવસોમાં આખું વડોદરા ભૂવાઓનો ભોગ બને તો નવાઈ નહીં.