તેરી ભારત સરકાર કી…**** ભારત સરકાર લખેલી કારના ચાલકને અસામાજિક તત્વોએ ઢોર માર માર્યો

• ટોળામાં ઉભેલા યુવકે વિડીયો બનાવતા હિસંક તત્વોએ ટપલીદાવ કરીને વિડીયો ડીલીટ કરાવ્યો
• કુંભારવાડા પોલીસ સ્થળ પર આવી પહોચતા હિસક તત્વો નાસી છુટ્યા

વડોદરા શહેરમાં હાલ અનેક સ્થળે નાની મોટી મારામારીની ઘટનાઓ સતત બની રહી છે. જેમાં આજે શહેરના કારેલીબાગ સંગમ ચાર રસ્તાથી કુંભારવાડા તરફ જતા માર્ગ પર એક કાર ચાલક યુવકને આંતરીને કેટલાક હિસંક તત્વોએ બેફામ રીતે માર મારીને ગાડીના કાંચની તોડફોડ પણ કરી હતી. જયારે કુંભારવાડા પોલીસ સ્થળ પર પહોચતા હિંસક ટોળું નાસી છૂટ્યું હતું.

પ્રાપ્ત માહિતી અનુસાર આજે સાંજના સુમારે રૂપમ સિનેમા રોડ ભાંડવાડા પાસે આવેલા શેલના પેટ્રોલપંપ પર એક કાર ચાલક પેટ્રોલ ભરાવવા ગયો હતો. જ્યાં પેટ્રોલ ભરાવીને તે સંગમ ચાર રસ્તા તરફ જતો હતો. તે દરમિયાન આગળ કેટલાક યુવકો મોપેડ પર છુટ્ટા હાથ રાખીને ગફલતભરી રીતે મોપેડ હંકારી રહ્યા હતા. કાર ચાલકે તેઓને હોર્ન મારીને સાઈડ માંગવાનો પ્રયત્ન કરતા મોપેડ પર સવાર કેટલાક યુવકોએ કાર ચાલક યુવક સાથે ગાળાગાળી કરીને કારને સાઈડમાં આંતરી હતી.

કાર માંથી યુવક ઉતરતાની સાથે જ મોપેડ પર સવાર 5 થી 7 યુવકોનું ટોળું કાર ચાલક પર તૂટી પડ્યું હતું. અને યુવકને ઢોર માર માર્યો હતો. મારામારી થતા જોઇને નાગેશ્વર સોસાયટી પાસે લોકટોળા એકત્રિત થઇ ગયા હતા. જ્યાં અસમાજિક તત્વોએ યુવકને મોઢાના ભાગે મુક્કાથી અને ગડદા પાટુંનો માર માર્યો હતો. આ સાથે ગાડીનો કાંચ પણ તોડી નાખ્યો હતો.

ઘટનાની જાણ પોલીસને થતા કુંભારવાડા પોલીસ મથકના PI સહિતનો સ્ટાફ સ્થળ પર દોડી આવતા હુમલો કરનાર અસમાજિક તત્વો એક પછી એક રફ્ફુંચક્કર થઇ ગયા હતા. પોલીસે ઈજાગ્રસ્ત યુવકને પોલીસ મથક લઇ જઈને ગુન્હો નોંધવાની તજવીજ હાથ ધરી છે.

યુવકને માર મારતા સમયે વિડીયો ઉતારતા અન્ય યુવકને પણ માર માર્યો
એક એકલા કાર ચાલકને જેમતેમ અપશબ્દો બોલીને જયારે અસમાજિક તત્વો માર મારી રહ્યા હતા. ત્યારે સ્થળ પર ભેગી થયેલી ભીડ ફક્ત તમાશો જોતી હતી. ભીડ માંથી એક યુવકે ઘટનાનો વિડીયો બનાવી લેવાની હિમ્મત કરતા ટોળું તેના પર તૂટી પડ્યું હતું. યુવકને ટપલીદાવ કરીને તેના મોબાઈલ માંથી વિડીયો ડીલીટ કરાવી દીધો હતો.

તેરી ભારત સરકાર કી….*** સરકાર વિરુદ્ધ પણ અપશબ્દોનો પ્રયોગ કર્યો
જે કાર ચાલકે મોપેડ ચાલકોને ગફલતભરી રીતે છુટા હાથે મોપેડ ચલાવવા મામલે હોર્ન મારીને સાઈડ પર ખસી જવા ઈશારો કર્યો હતો. તે કાર પર ભારત સરકાર લખેલું હતું. હુમલો કરનાર હિંસક ટોળાએ યુવકને માર મારીને ગાડીના કાંચ તોડી નાખ્યા બાદ ભારત સરકારને સંબોધીને અપશબ્દોનો મારો ચલાવ્યો હતો.