તંત્રની બેદરકારી કે માનવસર્જિત ભૂલ? ‘કટ’ ના હોવાથી વાહનો રોંગ સાઈડમાં દોડ્યા અને એક હસતો-ખેલો પરિવાર વિખેરાયો

• NH-48 પર કાળમુખી કારે લીધો પરિવારનો ભોગ: સુંદરપુરા પાસે રોંગ સાઈડમાં આવતી કારે બાઈકને અડફેટે લેતા પિતાનું મોત.
• ઝારખંડનો પરિવાર વિખેરાયો: અકસ્માતમાં 11 વર્ષના પુત્ર અને પત્નીની હાલત ગંભીર, સયાજી હોસ્પિટલમાં સારવાર હેઠળ.
• તંત્રની બેદરકારી સામે જનઆક્રોશ: હાઈવે પર ‘કટ’ ન હોવાથી સર્જાયો અકસ્માત, લોકોએ 1 કલાક સુધી હાઈવે ચક્કાજામ કર્યો.
• એમ્બ્યુલન્સ મોડી પહોંચતા લોકોમાં રોષ: ઘાયલ યુવક રસ્તા પર તરફડતો રહ્યો અને અંતે દમ તોડ્યો.

મુંબઈ-અમદાવાદ નેશનલ હાઈવે 48 પર આજે ફરી એકવાર સ્પીડ અને બેદરકારીએ એક નિર્દોષનો ભોગ લીધો છે. વડોદરાના સુંદરપુરા પાટિયા પાસે રોંગ સાઈડમાં આવતી એક કારે બાઈક સવાર પરિવારને જોરદાર ટક્કર મારી હતી. આ અકસ્માતમાં 38 વર્ષીય મકસૂદ અન્સારીનું ઘટનાસ્થળે જ કરુણ મોત નીપજ્યું છે, જ્યારે તેમના પત્ની અને માસૂમ પુત્ર જીવન-મરણ વચ્ચે ઝોલા ખાઈ રહ્યા છે.

ઘટનાની વિગતો મુજબ, મૂળ ઝારખંડનો અને હાલ અંકલેશ્વરમાં રહેતો અન્સારી પરિવાર અમદાવાદથી પરત ફરી રહ્યો હતો. આ દરમિયાન અંબા ચોડીથી આગળ GEB કટ પાસે રોંગ સાઈડમાં આવતી કારે તેમની બાઈકને અડફેટે લીધી હતી. પ્રત્યક્ષદર્શીઓના જણાવ્યા અનુસાર, અકસ્માત એટલો ભયાનક હતો કે 11 વર્ષના અનિશનું માથું છુંદાઈ ગયું હતું.

🧐સ્થાનિકનો આક્ષેપ:

સ્થાનિક રમેશ પંચાલે ભારે હૈયે જણાવ્યું કે, “અમે ઘટનાના 10 મિનિટમાં પહોંચી ગયા હતા. મકસૂદભાઈ જીવતા હતા અને તરફડિયા મારતા હતા. પરંતુ પહેલી એમ્બ્યુલન્સમાં માત્ર બે જણની જગ્યા હોવાથી પત્ની અને બાળકને લઈ જવાયા. બીજી એમ્બ્યુલન્સ આવે ત્યાં સુધીમાં તો તેમણે દમ તોડી દીધો હતો.”

🚨(પોલીસ અને તંત્રની કાર્યવાહી)

અકસ્માત બાદ ઉશ્કેરાયેલા ગ્રામજનોએ હાઈવે પર ચક્કાજામ કર્યો હતો. જેના કારણે વાહનોની લાંબી કતારો લાગી હતી. કપુરાઈ પોલીસ અને DCP અભિષેક ગુપ્તા તાત્કાલિક ઘટનાસ્થળે પહોંચ્યા હતા. DCPએ જણાવ્યું હતું કે, રોંગ સાઈડમાં આવી રહેલી કારને કારણે આ અકસ્માત સર્જાયો છે અને હાલ કાયદેસરની કાર્યવાહી હાથ ધરવામાં આવી છે.

👉(મુખ્ય સમસ્યા: હાઈવે પર કટનો અભાવ)

સુંદરપુરાના ગ્રામજનોનો આક્ષેપ છે કે હાઈવે પર યોગ્ય ‘કટ’ કે ગરનાળું ન હોવાથી વાહનચાલકો મજબૂરીમાં રોંગ સાઈડમાં વાહન ચલાવે છે. વારંવાર રજૂઆતો કરવા છતાં નેશનલ હાઈવે ઓથોરિટી દ્વારા કોઈ પગલાં લેવામાં આવ્યા નથી, જેના પરિણામે આજે એક પરિવારે પોતાનો મોભી ગુમાવ્યો છે.

👮હાલ પોલીસે હાઈવે ખુલ્લો કરાવ્યો છે અને ઉચ્ચ અધિકારીઓ સ્થળની મુલાકાત લેવાના છે. પરંતુ સવાલ એ થાય છે કે શું તંત્ર હજુ પણ કોઈ મોટા અકસ્માતની રાહ જોશે કે પછી સુંદરપુરા પાટિયા પાસે કાયમી ઉકેલ લાવશે?