પૂરક પરીક્ષા: વડોદરામાં 46 કેન્દ્રો પર પરીક્ષાનો માહોલ, જિલ્લા શિક્ષણ વિભાગની તૈયારીઓ પૂર્ણ

• પરીક્ષાનો પ્રારંભ: આવતીકાલથી ધોરણ 10 અને 12ની પૂરક પરીક્ષાઓનો રાજ્યવ્યાપી પ્રારંભ.
• નવો નિયમ: વિદ્યાર્થીઓ માટે આ વર્ષે ‘બેસ્ટ ઓફ ટુ’નો નિયમ લાગુ, જે સ્કોર સુધારવામાં મદદરૂપ થશે.
• વિદ્યાર્થીઓની સંખ્યા: ધોરણ 10માં 8,555 અને ધોરણ 12માં 15,328 મળી કુલ 23,883 વિદ્યાર્થીઓ પરીક્ષા આપશે.
• કેન્દ્રો અને બ્લોક્સ: વડોદરા સેન્ટ્રલ જેલના 6 કેદી વિદ્યાર્થીઓ પણ પરીક્ષામાં સામેલ થશે,કુલ 46 પરીક્ષા કેન્દ્રો અને 447 બ્લોકમાં પરીક્ષાનું આયોજન.
• સુરક્ષા અને સુવિધા: તમામ કેન્દ્રો પર CCTV સર્વેલન્સ અને ચુસ્ત પોલીસ બંદોબસ્ત. વિદ્યાર્થીઓ માટે કંટ્રોલ રૂમ (0265-2461703) અને હેલ્પલાઈન કાર્યરત

ધોરણ 10 અને 12ના વિદ્યાર્થીઓ માટે પૂરક પરીક્ષાનો મહત્વનો તબક્કો આવતીકાલથી શરૂ થઈ રહ્યો છે. વડોદરા જિલ્લા શિક્ષણ વિભાગે આ પરીક્ષાને શાંતિપૂર્ણ અને પારદર્શક રીતે પૂર્ણ કરવા માટે સંપૂર્ણ તૈયારીઓ કરી લીધી છે. આ વર્ષે ‘બેસ્ટ ઓફ ટુ’ નિયમ અમલી બનતા વિદ્યાર્થીઓમાં નવી આશાનું કિરણ જોવા મળી રહ્યું છે.

વડોદરામાં કુલ 23,883 વિદ્યાર્થીઓ પૂરક પરીક્ષામાં ઉપસ્થિત રહેશે. જેમાં ધોરણ 10 માટે 26 કેન્દ્રો પર 8,555 વિદ્યાર્થીઓ અને ધોરણ 12ના સામાન્ય તથા વિજ્ઞાન પ્રવાહના 15,328 વિદ્યાર્થીઓ ઓ 20 કેન્દ્રો પર પરીક્ષા આપશે. શિક્ષણ વિભાગે આ પરીક્ષા માટે 46 બિલ્ડીંગો અને 447 બ્લોકની વ્યવસ્થા કરી છે. સૌથી વિશેષ વાત એ છે કે, વડોદરા સેન્ટ્રલ જેલના 6 વિદ્યાર્થીઓ પણ શિક્ષણ મેળવવાની ધગશ સાથે આ પરીક્ષામાં ભાગ લઈ રહ્યા છે.

🧐ચુસ્ત વ્યવસ્થા:

પરીક્ષામાં ગેરરીતિ અટકાવવા તમામ કેન્દ્રો સીસીટીવી કેમેરાથી સજ્જ કરવામાં આવ્યા છે. સાથે જ કાયદો અને વ્યવસ્થા જાળવવા ચુસ્ત પોલીસ બંદોબસ્ત ગોઠવી દેવાયો છે. વિદ્યાર્થીઓ કોઈ તણાવ અનુભવે તો તેમના માટે કાઉન્સેલિંગ હેલ્પલાઈન અને કોઈપણ મૂંઝવણ માટે જિલ્લા કંટ્રોલ રૂમનો નંબર 0265-2461703 જાહેર કરવામાં આવ્યો છે.

🫵શિક્ષણ વિભાગની આ આયોજનબદ્ધ તૈયારીઓ વચ્ચે હવે વિદ્યાર્થીઓની મહેનત રંગ લાવશે તેવી અપેક્ષા સેવાઈ રહી છે.