વડોદરામાં ‘શિવજી કી સવારી’ પૂર્વે દબાણ શાખાની કડક કાર્યવાહી; VIP રૂટ પરથી લારી-ગલ્લાનો સફાયો

વડોદરામાં આ વર્ષે મહાશિવરાત્રીનો પર્વ અતિ ઉત્સાહ અને ભવ્યતા સાથે મનાવવામાં આવશે. ‘સત્યમ શિવમ સુન્દરમ’ સંસ્થા દ્વારા આયોજિત પરંપરાગત ‘શિવજી કી સવારી’ અને સુરસાગર ખાતેની મહા આરતીમાં કેન્દ્રીય ગૃહ મંત્રી અમિત શાહ અને નાયબ મુખ્યમંત્રી હર્ષ સંઘવી વિશેષ ઉપસ્થિત રહેવાના છે. આ હાઈ-પ્રોફાઈલ મુલાકાત અને સુરક્ષા વ્યવસ્થાને ધ્યાનમાં રાખીને વડોદરા મ્યુનિસિપલ કોર્પોરેશન (VMC) દ્વારા શહેરના વિવિધ વિસ્તારોમાં દબાણ હટાવવાની મેગા ઝુંબેશ તેજ કરવામાં આવી છે.

• VIP રૂટ પર કડક કાર્યવાહી: આગામી શિવરાત્રી સુધી સુરસાગર તળાવની આસપાસના વિસ્તારો અને જે માર્ગો પરથી વીઆઈપી મુવમેન્ટ થવાની છે, ત્યાંથી લારી-ગલ્લા હટાવવાની કામગીરી પાલિકા દ્વારા યુદ્ધના ધોરણે હાથ ધરાઈ છે. આ ઝુંબેશ દરમિયાન છેલ્લા બે દિવસમાં જ તંત્રએ 8 થી 10 ટ્રક ભરીને માલ-સામાન જપ્ત કર્યો છે.
• શુક્રવારી બજારમાં પણ તવાઈ: શહેરના ભૂતડી ઝાપાથી કારેલીબાગ અંબા માતાના મંદિર સુધીના નિર્ધારિત વિસ્તારમાં શુક્રવારી બજાર માટે સીમા નક્કી કરવામાં આવી હતી. જોકે, કેટલાક ફેરિયાઓએ આ મર્યાદા ઓળંગીને રસ્તા પર પથારા લગાવતા પાલિકાની દબાણ શાખાએ લાલ આંખ કરી છે.
• સીમા મર્યાદાનું ઉલ્લંઘન: ભૂતડીઝાપા મેદાનથી કારેલીબાગ વચ્ચે નક્કી કરેલી સીમા બહાર દબાણ કરનારા વેપારીઓ સામે કાર્યવાહી કરી પાલિકાએ એક આખી ટ્રક જેટલો સામાન કબજે કર્યો છે.

🧐કેન્દ્રીય ગૃહ મંત્રીના આગમન પૂર્વે સમગ્ર રૂટનું મ્યુનિસિપલ કમિશનર અને પોલીસ કમિશનર દ્વારા પણ નિરીક્ષણ કરવામાં આવ્યું છે. આ મુલાકાત દરમિયાન કોઈ અનિચ્છનીય અડચણ ન આવે અને ટ્રાફિક વ્યવસ્થા જળવાઈ રહે તે માટે આગામી દિવસોમાં પણ દબાણ હટાવવાની કામગીરી ચાલુ રહેશે.

• અમિત શાહનો કાર્યક્રમ: તેઓ સાંજે 6:30 કલાકે વડોદરા એરપોર્ટ પર આગમન કરી સીધા સુરસાગર તળાવ પહોંચશે, જ્યાં ‘શિવજી કી સવારી’નું સ્વાગત અને મહાઆરતીમાં સહભાગી થશે.
• સુરક્ષા વ્યવસ્થા: સુરસાગર ખાતે ફાયર બ્રિગેડની 6 બોટ તૈનાત કરવામાં આવશે અને શહેરના 34 રસ્તાઓ પર વાહન વ્યવહાર પ્રતિબંધિત રહેશે.