ગંભીર અકસ્માત: ઓવરસ્પીડ i20 કારની ટક્કરથી બે લોકો ગંભીર ઈજાગ્રસ્ત, કારચાલક ફરાર

• હિટ એન્ડ રન: i20 કાર ચાલકે મોપેડને ટક્કર મારીને ફરાર થઈ જતાં પોલીસ તપાસ શરૂ.
• ગંભીર ઈજાઓ: અકસ્માતમાં બે લોકો ગંભીર રીતે ઘાયલ થતા સયાજી હોસ્પિટલમાં સારવાર હેઠળ.
• ઓવરસ્પીડિંગ: અકસ્માતનું મુખ્ય કારણ વાહનની બેફામ ઝડપ હોવાની ચર્ચા.
• પોલીસ કાર્યવાહી: સીસીટીવી ફૂટેજ આધારે ફરાર કારચાલકની ઓળખ કરી ધરપકડ માટે ટીમો રવાના.

વડોદરા: વડોદરા શહેરમાં બેફામ રફ્તારે વધુ એક વખત લોહીયાળ અકસ્માત સર્જ્યો છે. શહેરના અમિતનગરથી L&T સર્કલ તરફ જતા માર્ગ પર એક ઓવરસ્પીડ i20 કાર ચાલકે મોપેડ સવાર બે વ્યક્તિઓને જોરદાર ટક્કર મારતા ગંભીર અકસ્માત સર્જાયો હતો. અકસ્માત બાદ કારચાલક માનવતા નેવે મૂકીને ઘટનાસ્થળેથી ફરાર થઈ ગયો છે.

❓શું બની ઘટના?

મળતી માહિતી મુજબ, કાર ચાલક અત્યંત ઝડપે અને બેફામ રીતે વાહન હંકારી રહ્યો હતો. દરમિયાન અમિતનગરથી L&T જવાના માર્ગ પર તેણે મોપેડને અડફેટે લીધું હતું. ટક્કર એટલી જોરદાર હતી કે મોપેડ સવાર બંને વ્યક્તિઓ રોડ પર ફંગોળાયા હતા અને રસ્તા પર લોહીના ડાઘા જોવા મળ્યા હતા. અકસ્માત બાદ કાર ચાલક ત્યાં રોકાયા વિના જ કાર લઈને પલાયન થઈ ગયો હતો.

🚨પોલીસ તપાસ શરૂ:

સ્થાનિક લોકોની મદદથી તાત્કાલિક બંને ઈજાગ્રસ્તોને સારવાર અર્થે સયાજી હોસ્પિટલ (SSG) ખાતે ખસેડવામાં આવ્યા છે, જ્યાં તેમની હાલત ગંભીર હોવાનું જાણવા મળી રહ્યું છે. ઘટનાની જાણ થતા જ સ્થાનિક પોલીસનો કાફલો ઘટનાસ્થળે પહોંચી ગયો હતો. પ્રાથમિક તપાસમાં ઓવરસ્પીડિંગ અકસ્માતનું મુખ્ય કારણ હોવાની ચર્ચાએ જોર પકડ્યું છે. હાલ પોલીસે આસપાસના વિસ્તારના સીસીટીવી ફૂટેજ મેળવીને ફરાર કારચાલકને પકડવા માટે તપાસના ચક્રો ગતિમાન કર્યા છે.