વડોદરા પોલીસની સતર્કતાથી સિનિયર સિટિઝન ‘ડિજિટલ અરેસ્ટ’માંથી મુક્ત, ₹16 લાખ બચ્યા!

વડોદરા ગ્રામ્ય પોલીસને સાયબર ક્રાઇમ રોકવામાં મોટી સફળતા મળી છે. મની લોન્ડરિંગના ખોટા કેસમાં ફસાવીને 5 દિવસ સુધી ‘ડિજિટલ અરેસ્ટ’ રાખવામાં આવેલા એક નિવૃત્ત સિનિયર સિટિઝનને વડોદરા તાલુકા પોલીસે લાખોની ઠગાઈનો ભોગ બનતા બચાવી લીધા છે. સાયબર ઠગો દ્વારા ₹16 લાખ પડાવવાની પૂરેપૂરી તૈયારી હતી, પરંતુ બેંક મેનેજરની શંકા અને પોલીસની તાત્કાલિક કાર્યવાહીએ આ ખેલ બગાડી નાખ્યો છે.

🚨ડિજિટલ દુનિયામાં છેતરપિંડીના કિસ્સાઓ વધી રહ્યા છે ત્યારે વડોદરામાં એક ચોંકાવનારો કિસ્સો સામે આવ્યો છે. એક નિવૃત્ત સિનિયર સિટિઝનને ગત 16 ફેબ્રુઆરીના રોજ TRAI ના નામે કોલ આવ્યો હતો. ઠગોએ તેમને ડરાવ્યા કે તેમના નામનું સિમ કાર્ડ મની લોન્ડરિંગના ગુનામાં વપરાયું છે.

❓કેવી રીતે ઠગાઈનો પ્રયાસ થયો?

• ડિજિટલ અરેસ્ટ: સાયબર ઠગોએ મુંબઈ ક્રાઈમ બ્રાન્ચના નકલી અધિકારી બનીને પીડિતને વોટ્સએપ વીડિયો કોલ પર 5 દિવસ સુધી સતત નજર હેઠળ રાખ્યા હતા.
• ખોટા આરોપ: જેટ એરવેઝના નરેશ ગોયલ કેસ સાથે પીડિતનું નામ જોડી, ₹2 કરોડના ટ્રાન્ઝેક્શનના ખોટા ડોક્યુમેન્ટ્સ બતાવી માનસિક રીતે તોડી નાખ્યા હતા.
• ધમકી: જો જેલ જવાથી બચવું હોય તો ₹16 લાખ ગુડગાંવની એક બેંકમાં ટ્રાન્સફર કરવા દબાણ કરવામાં આવ્યું હતું.

પીડિત વૃદ્ધ જ્યારે ભાયલી સ્થિત ઇન્ડસઇન્ડ બેંકમાં પોતાની FD તોડાવીને ₹16 લાખ ટ્રાન્સફર કરવા પહોંચ્યા, ત્યારે તેમની ગભરાયેલી હાલત જોઈને બેંક મેનેજરને શંકા ગઈ. મેનેજરે તાત્કાલિક વડોદરા તાલુકા પોલીસનો સંપર્ક કર્યો. પીઆઈ વી.એમ. ટાંક અને તેમની ટીમે સમય સૂચકતા વાપરીને બેંક પહોંચી વૃદ્ધને ડિજિટલ અરેસ્ટની જાળમાંથી મુક્ત કરાવ્યા હતા.

🧐અધિકારીઓનું માર્ગદર્શન:

વડોદરા વિભાગના પોલીસ મહાનિરીક્ષક સંદીપસિંહ, ગ્રામ્ય એસપી સુશીલ અગ્રવાલ અને ડીવાયએસપી મિલિત મોદી દ્વારા સાયબર અવેરનેસ માટે જે અભિયાન ચલાવવામાં આવી રહ્યું છે, તેના જ પરિણામે પોલીસ અને બેંક વચ્ચેના સંકલનથી આ ગુનો અટકાવી શકાયો છે.

👮વડોદરા પોલીસ નાગરિકોને અપીલ કરે છે કે કોઈપણ સરકારી એજન્સી વીડિયો કોલ દ્વારા ક્યારેય ‘ડિજિટલ અરેસ્ટ’ કરતી નથી. જો આવો કોઈ કોલ આવે તો ગભરાયા વગર તરત જ નજીકના પોલીસ સ્ટેશનનો સંપર્ક કરો.